الموضوع: عربيتى اتبهدلت على ايدك يا مصر , منك لله يا مصر

يمكن مش اول مره , وطبعا مش هتكون اخر مره

ربنا يخلى مصر وشوارع مصر ومطبات مصر اللى عشت معاها تجارب كتير كلها سيئه ومؤلمه ومكلفه والحمد لله

يتضمن خط سيرى للعوده للبيت كل يوم المرور من الشارع اللى ميتسماش اللى فى وش المنصه واللى فيه الفندق اللى ميتسماش بتاع القوات المسلحه , ومن فتره قريبه اداره الفندق اللى متتسماش قررت انها تعمل مطبات من اللى هى برعايه حديد عز بعرض الشارع

المطبات اتعملت بأسياخ حديد عرضيه وتم عمل قبه خرسانيه عليها بعدد حوالى 12 مطب يمكنهم بكل سهوله فرتكه كاوتش عربيتك واحلال وتجديد العفشه لو بتعدى عليهم كل يوم بسرعتك العاديه , وعليه بعد ما كنت باخد الشارع ده 60 - 80 بقيت اخده 90 - 100 حيث يختفى الاحساس بالمطبات دى وتبقى الحياه اريح

وبالبرغم من انى مش عارف اساسا ايه لزمه المطبات , لأنها مثلا مش منطقه سكنيه ولا حد من نزلاء الفندق هيعدى الشارع منها , فأنا استنتجت انها معموله علشان اللى ميتسموش اللى خارجين من الفندق يستخدموا يوتيرن فى وش الباب علطول بسهوله بدل ما الكل جاى بيجرى الاول وبيبقى الموضوع صعب علشان طبعا البهوات مكسلين يستخدموا اليوتيرن اللى بعده , ده طبعا كله بعيد عن ان ملكيه الشارع اساسا لا تخص الفندق ومش من حقه يعمل فيها مطبات ولكن حيث اننا فى بلد تحكمها الشوربه كل واحد بيعمل قصاد بيته اللى هو عايزه

من كام يوم ظهرا الفندق قفل الشارع امامه تماما لغرض ما وكان فى اعمال تبدو كصيانه فى الطريق وتم تحويلنا كدا بلدى من غير يافطات ولا قراطيس للاتجاه المخالف ودى حاجه قمه فى عدم المسؤوليه وقله الذوق ولكن فى اليوم ده كنت مستعجل ومخدتش بالى بيعملو ايه الناحيه التانيه , النهارده بقا خدت بالى

راجع من الشغل تعبان ومصدع جدا ومش مركز كويس وانا سايق , وبالطبع داخل على المكان اللى اعرفه للمطبات دايس على العربيه علشان اعدى منهم بسرعه وتحديدا على سرعه 100 كم وطبعا الطريق اساسا منزل لقيت فى وشى مطب عملاق مفيش قبله اى يافطات او اضاءه وهو اساسا مش باين , المسافه كانت لا تتعدى ال 6 - 8 متر وانا بجرى ومعدل استجابتى اساسا بفعل الارهاق اقل من العادى , يادوب دوست فرامل والصريخ اشتغل وعلشان الشارع منزل لقيت العربيه بتتزحلق منى بالجنب ومش هلحق اهدى حتى روحت سايبها زى ما هى ودخلت فى وضع القنفذه استعداد لأنى هنط البس فى شجره او فى سور الفندق

ارتفاع المطب كبير جدا جدا جدا وهصوره لكم ان شاء الله وطبعا السرعه كبيره والطريق منزل فمش مساعد على التهديه , العربيه اساسا وهى طالعه المطب اتخبطت فيه بشده من ارتفاعه ولقيت الوش اترفع فى الهوا ومبقتش شايف الشارع اساسا وبعدين انا طرت خبطت فى السقف وخبطتين فى الارض والعربيه اتشالت واتحطت مرتين وكل حاجه معاى فى العربيه جت عندى قدام

اول ما لمست الارض كان كل همى انى اسيطر على العربيه علشان كان فى خيالى ان اكيد فى حاجه صعبه حصلت , فتيس اتكسر او موتور وقع او عجله هتضرب , الطيران كان فظيع والخبطه فى الارض عنيفه جدا ويادوب مسكت العربيه وشغلت انتظار وركنت فى جنب

شباب ماشيين ورايا وقفوا يشوفو اذا كان حصلى حاجه طبعا من الفيلم الاجنبى اللى حصل قصادهم وطمنتهم ونزلت من العربيه اتلم على اعصابى

بفضل الله قعدت ابص تحت العربيه لقيت كل حاجه سليمه ومفيش اى حاجه بتنقط او حاجه متضرره وكله يبدو على ما يرام , ركبت العربيه ومشيت لقيت ان كل اللى حصل ان بس الكلاكس فصل فقولت ابقى اشوفه بعدين

لكن على ما قربت على البيت حاسس صوت الموتور مش طبيعى وفيه رجه زياده شويه عن العادى وانا بطلع , ربنا يسهل بقا هبقى اكشف كدا بكره فى النور واشوف ايه اللى حصل

وفوق البيعه بقا , النهارده اساسا وانا خارج من الجراج لقيت عجله من اللى ورا على الارض , روحت كشفت عليها لقيت فيها مسمار حوالى 10 سم فى جنب العجله ونفسى اعرف دخل ازاى وطبعا العجله كدا بالشفا

بعد ما رحت لحمت العجله وانا راجع عند كليه بنات الازهر وجاى من مصطفى النحاس أكلت بلاعه مجارى مفتوحه مشوفتهاش , والحمد لله نفس العجله اللى لسه لاحمها ورايح احطلها نيتروجين الجنط بتاعها اتعوج ورميتها فى الشنطه ومشيت على الاستبن تانى

يعنى شوارع مصر عملت معاى النهارده واجب كومبو بكل ما لديها من اسلحه , كان ناقص بس اتمسك رادار فى شارع سكه الوايلى ويبقى كدا اتعشت

كل اللى عايز اقوله , حسبى الله ونعم الوكيل , مش مسامح فى حقى ابدا عند اللى عمل المطب

وحسبى الله ونعم الوكيل فى اللى سايبنا كدا للناس دى تبيع وتشترى فينا لأن محدش كان هينفعنى لما ادخل بالعربيه فى شجره وتجيب أجلى

صحيح انا كنت فوق السرعه المقرره بس انا حتى لو كنت ماشى 60 كنت هلبس برضه المطب لأن الدنيا ظلمه كحل والمطب مش عليه اى فسفور عاكس ومفيش اى يافطات تقول ان فى مطب , ده غير ان المطب عالى بدرجه لا توصف وحجمه غبى جدا حتى لو الواحد طلع عليه براحه

خلى بالكم يا جماعه وربنا يستر طريقكم , مش عارف هنلاقيها منين ولا منين

حسبنا الله ونعم الوكيل