بالنسبة لسعر الشراء فهو 170 لل2000 و 190 لل2400 و بينزل 5000 جنيه عند الموزعين معرفش بينزل اكتر من كدا و لا لأ , حاول عموما.
انا معايا ال2400 منها و طبعا سيبك من الكلام الناس اللى مش فاهمة , انا هجيبلك الخلاصة.
اولا سعر العربية بينزل جامد فى المستعمل اكتر من الجيتا و الاوكتافيا بسبب خوف الناس من الاستهلاك العالى للبنزين و الضريبة و ناس من انها مجمعة فى مصر خصوصا انها كورى.
2-العربية نزل منها شكل جديد (صحيح متجمعش فى مصر لسه) بس انا متوقع انه كمان سنة او اتنين بالكتير غبور هيوقف انتاج القديمة و ينزل الجديدة بدلها فهتنزل اكتر فى سعر اعادة البيع و الشكل مش هيبقى احدث حاجة, بس الصراحة العربية شكلها الحالى مبهر جدا.
3-موتور العربية ال2400 يدوبك كويس اوى عليها لان العربية تقيلة وزن و يعيبها ان فتيسها 4 نقلات بس فمش عارف الصراحة ال2000 هتبقى كويسة برده و لا ضعيفة شوية بس طبعا مش زى الاوكتافيا و لا الجيتا نهائيا لان انا والدتى عندها الفانتازيا و اقدر اقولك بطة فعلا يعنى الاوكتافيا سحبها اضعف كتير جداااا من الالنترا مثلا لانها تقيلة و موتورها ضعيف جدا.
4- غبور منزل فيها الNavigation system مش اصلى لان السوناتا دى منزلهاش بره navigation و لا شاشات dvd فى المخادع و لا زينون و لا كاميرا خلفية و مرايات اللى فيها اشارات , كل دا مش اصلى , بس الفكرة ان الnavigation بنظام plug and play يعنى زى سماعات الكمبيوتر كدا حتى لو وحشة بتشيل الكوبس بتاعها و تركبه تانى بس كدا يعنى متاثرش على كهربة العربية (مش غبور بس اللى بيعمل كدا مثلا نيسان فى الx-trail و الchevrolet ال captiva و عربيات تانية كتير زى الماهيندرا و البريليانس و الالنترا الخليجى و عربيات كتير.
نيجى لمميزات العربية , اما معايا ال2400 و استهلاك البنزين بتاعها ممتاز , بفول التانك لو كان منور ب 115 تقريبا بنزين 92 يعتى حوالى 60 لتر غير الاحتياطى حوالى 10 لتر , ال60 لتر دول بيمشونى حوالى 540 كيلومتر و بيبقى مكتوب فى التابلوه و فعلا الرقم شبه دقيق ساعات اكتر شوية و ساعات اقل شوية.
قطع غيار العربية متوفرة جدا , س اسعار قطع كتير لسه غالية جدا مع ان غبور كل شوية بينزل اسعارهم زى تيل الفرامل ب 1000 جنيه بالضريبة تقريبا و الخلفى ب 650.
انا غيرت الشماسة (فى الضمان ) كانت موجودة و غيرت الباب الامامى علشان كان اتخبط جامد و التيل و الصيانات علطول , فلتر الهواء و سير المجمع مثلا مكانوش موجودين على صيانة ال60000 و قالوا هنجيبوا بعد اسبوع , انا نمت شوية معرفش جابوه و لا لأ بعدها علطول بس الصيانة اللى بعدها كانوا موجودين
العربية معايا بقالها 3 سنين دلوقتى و ماشى بيها 75000 الف كيلو و هتخرج من الضمان كمان كام يوم , كل اللى غيرته فى الضمان (1-غطا التابلوه علشان اول دفعة اتجمعت فى مصر الغطا كان زى مخبوط كدا كانه فيه بالونه , 2- الشماسة بتاعت السائق الامامى و دى كان معمول عليها recall لموديل 2006 و 2007 بره مصر , 3- كوبلن مش عارف بتاع ايه كان لما بلف الدركسيون و انا واقف و دايس فرامل بسمع صوت زى حكة كدا) يعنى من الاخر كل دا اى كلام اوى , دا فى عربيات بنص مليون و مليون و يتغيرلها حاجات اكتر من دى بكتر فى اول 3 سنين , بس طبعا كل عربية غير التانية و كل سوناتا غير التانية , يعنى ممكن واحد ميغيرش اى حاجة و ممكن واحد يغير فيها حاجات, يعنى تجربتى فردية .
العربية كويسة جداااااا فى كل حاجة و خصوصصصا الثبات و المساحة الداخلية و هى متتقارنش اساسا بالعربيات الى فئات اقل منها زى السيفيك اللى قال ايه ب 190 الف جنيه و الكلام الفارغ دا .
العربية عالية جداااا و عمرها مبتحك فى اى مطب مهما كان علوه .
بصراحة نصيحة شخصية , انا لو كنت نازل اشترى انهردة مش هشتريها بسبب نزول الشكل الجديد و نزول سعر المستعمل خصوصا انى بحب التغيير و الكماليات الزيادة اللى فى العربيات التانية (الزينون الغبورى مش حلو خالص مثلا) بس مثلا الموضوع محير اكتر لان الفانتازيا اللى ب165 فاضية خالص الا لو خليجى بمية حاجة و سبعين و دى منغير ضمان + مفيهاش تصفيح صاج تحت الموتور يعنى متصلحش لمصر , و الفانتازيا متتجابش غير اللى ب 183 على الاقل و دى بتنزل 5000 عند الموزعين برده.
اما لو كنت هتشرى تانى من 3 سنين هشتريها برده لان العربية عالية و مريحة جدا و ثابتة جدا و ممتازة فعلا و تحسها عربية بجد من ناحية كل حاجة يعنى الواكتافيا فى رايى الشخصى مش زيها ابدا و هى زيرو فتخيل بعد ما تستخدمها كام سنة!
عموما انت معندكش بديل ليها غير الفانتازيا غير لو عايز حاجة اقل بكتير زى السيفيك و الفوكاس و الكلام دا ,و دول اقل فى كل حاجة منها فعلا.
العربية فعلا حلوة , التقفيل المصرى غبور مهتم بيها كويس , انا عندى كان ممتاز ميكانيكيا و كل حاجة و جيد جدا من جوه لان كان فى قطع ضغيرة بلاستيك مش راكبة كويس بس قالولى لان دى اول دفعة اعتقد بعد العامل ما جمع فوق ال1000 عربية الموضوع اختلف كتير , بس موضوع التقيل يختلف من عربية للتانية و على رايك اذا كانت الصنى و لا الدايو النوبيرا تقفيلها كويس تخيل دى اكيد احسن بكتير خصوصا لان غبور مهتم بيها.
لو ميفرقش معاك موضوع الشكل الجديد و سعر اعادة البيع اوى( هو مش فى الضياع بس اقل من الاوكتافيا و على فكرة انا رايى انه كويس فى ال2000 لان الضريبة 1000 جنيه سنويا بس) يبقى توكل على الله و هاتها لان ملهاش منافس اساسا و منافسينها ب 440 الف و 560 الف مستوردين.
معلش نسيت اقول ان عيب ال2000 ان مفيهاش cruise control و عيب ال2400 ان سعرها بيقد اكتر بكتير من ال2000 علشان ضريبتها 3800 جنيه و بتقل 5% سنويا
المفضلات