الموضوع: تقييم ميجان 3 على الطرق المصريه

بسم الله الرحمن الرحيم
ميجان 3 بعد 10000 كم

اولا العربيه ككل كانت بالنسبه ليا غربيه شويه غير اللى كنت متعود عليه فى استرا و كنت مفتقد شويه حاجات زى الفتيس الايزيترونيك و الدريكسيون الناشف اللى انا كنت فاكر انه معناه انى متحكم فى العربيه بالكامل و حاسس بالطريق و الكلام الكتير ده غير انها كانت فى مقارنه بين البرافو و الفوكاس و الليون عموما انا همشى بالترتيب فى الموضوع ده غلشان متكلمش فى تفاصيل فرعيه:

1- التصميم الخارجى: انا عجبى شكل ميجان جدا و مش هنكر انه شكل ميجان 2 مكنش عجبنى شكل الشنطه بتعتها و ده اللى يمكن خلانى اجيب اوبل وقتها بس على الرغم انه كميه الاوبشنز اللى موجوده فى ميجان 2 الفكره انه انا شفت ميجان 3 عجبتنى جدا لانها مكنش فيها العيب - من وجهه نظرى- اللى كان فى ميجان 2 غير انه الشكل لسه اول سنه و بالتالى هتفضل ريها رونق فتره من الزمن و دى حاجه بتعجبنى انه متكنش العربيه منتشره اوى

2- التصميم الداخلى : اول انطباع انه العربيه من جوه فاضيه جدا بمعنى انه مفيش دوشه الزراير اللى المفروض تبقى موجوده فى اى عربيه لمجرد انه تدى احساس انك فى طياره مش عربيه بس فى ميجان اكتشفت انه مش محتاج زراير تانى و لا فى حاجه ناقصه يعنى cruise control & speed limiter نفس التحكم و الراديو و البلوتوث فى نفس الموضوع و دراعين ورا الدركيسيون والتكييف و بس خلاص كله سهل و بسيط و فى متناول اليد عادى جدا طيب ايه اللى ناقص ..ولا حاجه
و بالنسبه للكراسى مريحه جدا بالنسبه للسفر -بروح اسكندريه صد رد ساعات- و فى نفس الوقت مش لما تأخد ملف جامد او حاجه تلاقى نفسك اتحركت من الكرسى بمعنى supportive & comfortable و خصوصا مساند الرأس ال anti whip lash

الخامات و التقفيل:الجلد صحيح هو مش جلد تعبان ولا الكنترا زى BMW 750 بس من النوع الممتاز برضه نفس الكلام على القماش و الجلد اللى فى الكونسول و الابواب العربيه تحس فيها بلمحه رفاهيه زى الدول زون و فى نفس الوقت العمليه زى موضوع القماش و الجلد سوا حتى البلاستيك من نوع محترم جدا يعنى تحس انه العربيه اعلى من الفئه بتاعتها بكتير مش متواضعه ولا حاجه

3- الامان: 2 ايرباجز و حزام السواق بيدى انذار لو مش مربوط مش بيبطل نهائى من النوع الزنان يعنى ودى حاجه عجبانى فيها جدا غير انه ممكن تلغى الابواب اللى ورا تمام بزرار واحد -ابواب و شباببك- العربيه واخده 5 نجوم فى NCAP -ده العادى من رينو- و طبعا العربيه اخدت اللى فيه النصيب كعاده كل العربيات فى مصر .. بسيطه الحمدلله مجرد خدوش
و اظن حادثه الفلوانس اللى كانت هنا فى المنتدى من فتره تشهد على الكلام ده

4- الاداء:الموتور 105 حصان و فتيس 4 سرعات- اللى مكنش عاجبى- و طبعا و لا sports mode و hill climbing زى اللى موجود فى استرا مثلا بس برضه اكتشفت انه دى سياسه تحويل العربيه لعربيه ذكيه و يمكن ده يبان فى كميه الوظائف اللى بتشتغل اوتوماتيك سواء فى فتح و قفل العربيه نفس الموضوع مع الفتيس اللى بشغل 3 انظمه على حسب طريقه القياده و طبعا كل ده لازم معاه تحكم و ده بيعتمد على دريكسون دقيق لابعد الحدود فعلا و دى محدش يعرفها غير اللى جربه اختلاف تام عن اى حاجه تانيه و التعليق متحكم فى العربيه على الطريق و كل انواع الملفات - انا مش ببالغ علشان دى عربيتى كل الفكره انى بقارن بينها و بين الاسترا اللى لسه معايا برضه و كملت 100 الف من فتره و المفروض انه الاتنين torsion beam بس الاداء مختلف جدا- و طبعا الفرامل abs -ebd-bas و اكبر من اى فرامل فى الفئه يعنى لا قدر الله العربيه تحت السيطره فى اى موقف و على الاقل احسن 25% من الاسترا فى الناحيه دى بالذات و كتقييم عام العربيه تعتبر الستاندرد فى التحكم فى الفئه دى بالكامل و بالنسبه للسفر العربيه معموله علشان كده مريحه جدا و مجرد انك تظبط ال cruise على 100 ممكت تسوق العربيه من الدريكسيون بس و ممتع جدا و ممكن يبقى ادمان و ممكن يخليك تنام لانه تقريبا انت مش بتعمل حاجه بس للاسف مينفعش جوه البلد غير انه الموتور من النوع اللى بيحب الريدزون و الحراره العاليه عادى جدا تحس انه موتور heavy duty مش موتور هاتشباك

5- الاستهلاك و الصيانه: المتوسط 10لتر لكل 100 كم (92) على الطرق السريعه و بسرعه 100 الاستهلاك مزدش عن 6.5 لتر انا شايف انه معقول جدا
بالنسبه للصيانه 5 و10 فى العبور و التوكيل ممتاز قطع الغيار و الزيوت معقوله جدا بس يمكن المصنعيات اغلى بنسبه بسيطه عن الباقى

تقييمى العام عن العربيه: انا كنت شايف ان 145 الف قليل على هاى لاين و كل الاوبشنز دى وواضح انه رينو فكرت بنفس الطريقه و رفعت الاسعار بس كالعاده هى عربيه ممتازه و مظلومه هنا بس اعتقادى انها افضل فيمه مقابل سعر و فعلا
the best hatchback the money can buy

اسبكم مع شويه صور و يا رب اكون عرفت اعمل تقييم موضوعى للعربيه

تقرير ممتاز ربنا يباركلك فيها ويكفيك شرها