مقارنه بين ثبات السيارات الكورى واليابانى والالمانى على مطبات الهواء فى الطرق المصريه

**bmwosama** · 18-08-2010 11:15 PM

المشاركة الأصلية كتبت بواسطة eng.geo

سر جمال العربيات الألماني انهم بيحاولوا يعالجوا كل حاجة ... ميحبوش كلمة حاجة علي حساب حاجة
يعني تلاقيهم عاملين عربية عفشتها ناعمة ( ده بيأثر علي الثبات ) يقوم معالجها ب esp
الملفات خطر يخلي والأستهلاك عالي يقوم مخلي رسمة العربية بشكل أنسيابي يخلي الهوا يساعدها علي الثبات ( بيخلي الهوا ضغطه عالي في مناطق ومنخفض في مناطق )
الألمان عندهم سر الخلطة وعاملينه من زمان
ودلوقتي في شركات كتير خدت بالها

كلام مظبوط بنسبه كبيره
واحب اضيف عامل مهم جدا من عوامل ثبات اي عربيه
مركز ثقل العربيه + عرض العربيه + طول قاعده العجلات
وده بياثر بشكل كبير في المنحنيات وخاصه لما تكون عربيه عاليه وعرضها صغير
بيعمل عزم دوران علي العربيه في اتجاه معاكس لاتجاه المنحنى او الدوران
فكل ما يكون مركز ثقل العربيه منخفض + عرض العربيه كبير = ثبات علي في المنحنيات
دغير طبعا دور العفشه في امتصاص عزم الدوران ده

**Eng.Geo** · 18-08-2010 11:15 PM

المشاركة الأصلية كتبت بواسطة richman

في عضو فاضل قال "اللي مركبش الماني مركبش عربيات"

جملة تقيلة جدا
الألماني تحفة طبعا وانا شايفه رقم واحد ( مش انا بس )
ولكن في كتير كويس جدا وفي قريب من الألماني

المشاركة الأصلية كتبت بواسطة noctis

طيب انا بقول ان ثبات الفيات برافو ولينيا جامد برده وده على كلام كل الي جابوهم بس يمكن عيوب الفيات في التقفيل الداخلي شويه

عربيات زي الفل
ثباتهم وتسارع محترم جدا
تقفيل كويس
توكيل سئ ( زي الغالبية )

**Eng.Geo** · 18-08-2010 11:17 PM

المشاركة الأصلية كتبت بواسطة bmwosama

كلام مظبوط بنسبه كبيره
واحب اضيف عامل مهم جدا من عوامل ثبات اي عربيه
مركز ثقل العربيه + عرض العربيه + طول قاعده العجلات
وده بياثر بشكل كبير في المنحنيات وخاصه لما تكون عربيه عاليه وعرضها صغير
بيعمل عزم دوران علي العربيه في اتجاه معاكس لاتجاه المنحنى او الدوران
فكل ما يكون مركز ثقل العربيه منخفض + عرض العربيه كبير = ثبات علي في المنحنيات
دغير طبعا دور العفشه في امتصاص عزم الدوران ده

ده من ضمن الأيرودينامكس
وشكرا لأضافتك جدا

**bmwosama** · 18-08-2010 11:20 PM

المشاركة الأصلية كتبت بواسطة lepermessiah

انا امتلكت فى حياتى 4 عربيات و ترتيبهم و تقيمهم كالتالى

1- لانسر كريستاله 1300 فى مصر (معقوله)
2- بروتون ويرا سيدان 1600 فى ماليزيا (كانت كويسه جدا جدا)
3- هوندا سيفيك 2000 type r (نفس الشكل اللى هنا بس 2000 سى سى و عدد احصنه اعلى) فى ماليزيا و كانت ممتازه
4- لانسر بومه 1600 فى مصر و كانت كافيه بالغرض بس انا مكنتش بعرف اجرى بيها بسبب الثبات و التعليق

انتوا بقى ممكن تحددوا عفشه كل واحده منهم ايه و تقيموا الموضوع

انا مش فاهم الترتيب 1 2 3 4 علي اساس الافضليه ولا علي اساس تاريخ الشراء ؟؟؟
يعني انت قلت ان الويرا اول عربيه تمتلكها ومعني كده انه مش ترتيب بالاقدميه
بكده افهم مثلا ان لانسر كرستاله افضل حاجه ؟؟؟
ولا لانسر بومه ؟؟؟

**noctis** · 18-08-2010 11:30 PM

طيب انا عندي سؤال بيلح عليا
الوقتي احنا عارفين ان الاوروبي بشكل عام ثباته ماشاء الله شيء رائع وبالأخص الالماني كله والفيات والسيات
بس مشكلة العربيات دي انه قطع غيار غاليه وعربيات عايزه مصاريف للي يجيبها وكدا
في ناس غاويه كوري وياباني

السؤال بقا ايه هو أعلى ثبات في الياباني وايه هو أعلى ثبات في الكوري؟ انا في اعتقادي اني هسمع كلام كتير عن الهوندا سيفيك والسوبارو لكن هل في غيرهم ثباته قوي؟

**abo samra** · 19-08-2010 09:34 PM

المشاركة الأصلية كتبت بواسطة noctis

السؤال بقا ايه هو أعلى ثبات في الياباني وايه هو أعلى ثبات في الكوري؟ انا في اعتقادي اني هسمع كلام كتير عن الهوندا سيفيك والسوبارو لكن هل في غيرهم ثباته قوي؟

السيفيك
والماذدا الشيب القديم مش بتعجبنى فى مطبات الهواء بعكس ثباتها فى المنحنيات ممتاز مقارنة بنفس الفئه !! وياريت حد من ملاك الماذدا يقول رايه فى الكلام ده!!!
واعتقد افضل عربيه عجبتنى فى الكورى هى الالنترا القديمه مش الجديده اللى هيا موديل 2005
وانا بتكلم عن الموديلات اللى فى مصر علشان محدش يقول سوناتا او جينسيس او اكورد
بالنسبه للفيكترا والجيتا والاوكتافيا فارقه كتير عن الموديلات اليابانى والكورى
بالنسبه للبيمر والمرسيدس بجد ما شاء الله وان كنت برده افضل البيمر بفرق بسيط
وبالنسبه لاسوء عربيات ركبتها بتنطط بطريقه مزعجه هى النيو اكسنت - سيراتو الجديده - لانسر بومه والغريب بقا ان لانسر بومه السوبر اكشن ثباتها كويس قوى على المنحيات اكتر من البومه العاديه ولكن البومه العاديه افضل فى مطبات الهواء !!!!!!!
وياريت محدش يزعل من كلامى انا بقول رايىء الشخصى ومش معنى ان العربيه مش عجبانى فى نقطه يبقى العربيه كلها مش تمام لان مفيش عربيه بلا عيوب لانى بحس لما بتكلم عن عيب لاحظته فى عربيه بلاقى هجوم شديد كانى غلطت فى شخص اللى يمتلكوا السياره وليست السياره
ومع انى بعشق البيمر موت ولكن لو مشيت بيها فى شارع متكسر بكره اليوم اللى جبت فيه العربيه

يعنى مفيش حاجه كامله ابدا والكمال لله وحده
تحياتى

**LeperMessiah** · 20-08-2010 12:47 PM

المشاركة الأصلية كتبت بواسطة bmwosama

انا مش فاهم الترتيب 1 2 3 4 علي اساس الافضليه ولا علي اساس تاريخ الشراء ؟؟؟
يعني انت قلت ان الويرا اول عربيه تمتلكها ومعني كده انه مش ترتيب بالاقدميه
بكده افهم مثلا ان لانسر كرستاله افضل حاجه ؟؟؟
ولا لانسر بومه ؟؟؟

الترتيب يا باشا بالاقدميه و الكريستاله كانت عربيه الوالده مش عربيتى شخصيا علشان كنت لسه صغير ماكنتش اشتريت عربيات و اول واحده اشتريتها من فلوسى كانت الويرا

عموما احسن عربيه ركبتها فى دول هى السيفيك مع ملاحظه انى ركبتها بره مصر بأمكانات اعلى و فى طرق انضف 100 مره من هنا و هناك مابيفرقش معاك سعر اعاده البيع

يارب اكون وضحت

**eljazeera77** · 20-08-2010 05:37 PM

طيب والدايو نوبيرا يا جماعه من العربيات الرائعه فالثبات و ناعمه جدا
ولا ايه رأيكوا

**KHALED AYMAN** · 20-08-2010 05:49 PM

احمد باشا ابو سمره ...
اخبارك ايه يا باشا ؟؟ ايه يا عم تختفى تختفى و تطلع بموضوع جامد ..
واحشنى والله ..
بالنسبه للموضوع ..
بصراحه انا شايف ..
ان تصميم العفشه ان كانت ناعمه ولا ناشفه بيفرق ..وكمان نوع العفشه ..ملتى لينك او بيم ..
وزن العربيه
الباور بتاع العربيه لان مطب الهوا ممكن يخلى الدركسيون يلعب و بالتالى العربيه تعوم
مركز ثقل العربيه
ارتفاعها عن الارض ..
حاجات كتير
فى النهايه الحاجات دى بتكون فى مصلحه الثبات عموما مش مطبات الهوا فقط..
انا بعشق حاجه اسمها مطبات هوا ...وملفات
ويا سلالالالالالالالالالالالا لالام لو مطب هوا جاااااااااامد فى ملف قاااااااااااسى
احساس تحفففففففففه

**noctis** · 20-08-2010 08:42 PM

المشاركة الأصلية كتبت بواسطة eljazeera77

طيب والدايو نوبيرا يا جماعه من العربيات الرائعه فالثبات و ناعمه جدا
ولا ايه رأيكوا

لا للأسف انا لا اتفق معاك ابدا
الدايو سواء كان لانوس ولا نوبيرا متاخدش منهم ثبات اصلا الكوري ثباته مينفعش في وسط العربيات المحترمه الي في الموضوع الوقتي
ده حتى العربيه نفسها تحس انك ممكن تتقلب بيك في اي ملف

وبعدين ناعمه جدًا = ثبات قليل