الموضوع: تويوتا _ستارليت_ ..... (أراء وتقييمات + صيانات + أسعار قطع غيار)

المشاركة الأصلية كتبت بواسطة pro_samir

الحمد لله تم تقفيل الموتور علي خير ، اللي تم عمله الأتي :

تنظيف الموتور بالكامل من الداخل ومجاري الزيت والمياه
تغيير الجوانات وكاوتش الصبابات وأحد الصبابات كان فيه شرخ بسيط اتغير
تركيب طقم شنبر
تنظيف وش السلندر في المخرطه وتطبيع الصبابات
تنظيف الرادياتير
تقفيل وظبط التاكيهات
تغيير الزيت وتنظيف البوجيهات

التكلفه :
جوانات 100 ج
طقم شنبر الأصلي 300 ج
مصنعيه مخرطه + تغيير صباب 150 ج
زيت 60 ج
مصنعيه ميكانيكي 200 ج
وشويه نثريات طبعا قول 100 ج بالكتير

الاجمالي حوالي 850 ج

النتيجه الموتور ما شاء الله بقي ناعم جدا عن الأول وفي فرق في العزم بشكل ملحوظ ، لكن السرعه مفرقتش في حاجه واستهلاك البنزين واضح انه فرق بس لسه محسبتهاش

بالاضافه ان كان في مشكله قارفاني : لما اجي ادور العربيه الصبح كانت بتبقي مخنوقه جدا ولو دوست بنزين تبطل وبالتالي مكنتش اعرف امشي غير لما اسخن ،، في الفتره الأخيره كانت بتدور بصعوبه صباحا ولازم ازود بنزين كتير قبلها وتدور وتبطل تاني لوحدها فورا وطبعا مبعرفش ازود بنزين وهي دايره زي ما قلت سابقا هتبطل .. كنت بفضل ادور اربع خمس مرات لحد ما تبتدي تسلك شويه وبعدين تثبت واسخن شويه وامشي

الحمد لله كل المشاكل دي اتحلت وبقت تدور من لمسه مارش وخفيفه جدا عن الأول في الدواره مبقاش في خنقه وكذلك لو زودت بنزين بتستجيب بسلاسه ما شاء الله وممكن امشي حتي لو هي متلجه ، المشكله دي كان تم تشخيصها في قسم الورشه انها بسبب الكاربيراتير وكنت شاكك فيه فعلا لكن عملته قبل كده ومفرقش في حاجه واحيانا كنت بزود الكهربا بيحل المشكله نسبيا لكن مش بتريحني في المشي ، حبيت اقول علي السبب علشان لو حد بيعاني من الموضوع ده

بس الميكانيكي للأسف مش ظابط التاكيهات كويس وصوتها عالي عايز اروح لحد تاني يظبطها

مبروك يا استاذ محمد وربنا يسترها معاك
على فكرة انا كان عندى نفس مشكلة الدوارة الصبح بس كانت بتدور على طول ولو جيت امشى بيها كانت تبقى مخنوقة وسحبها مبيكونش زى وهية سخنة مش عارف لية بس الحمد لله مكنتش بتبطل ولا حاجة هوة بس الخنقة الى فيها دى وبعد ما غيرت طقم الصباب اختفت بردوة بس لو شغلت الشفاط الصبح ومشيت وهوة شغال بتتخنق تقريبا كدة كان هوة سبب المشكلة دى معايا زمان بس بصراحة مش متاكد
وياريت لو تعرف حد هنا فى القاهرة يكون بيفهم فى التويوتا ويكون بيعرف يظبط تكيهات صح تقولى او اى حد من الاخوة الاعضاء لان الميكانيكى الى انا بتعامل معاة كل شوية يظبطها ويقولى كمان شهرين نظبط مش عارف لية ومبحسش بفرق مع انها المفروض تفرق كتير فى سحب العربية واستهلاك البنزين لانى اول ما اشتريتها كانت بسم الله ماشاء الله
وعلى العموم ربنا يسترها معانا كلنا والف مبروك