اوبل استرا هاتشباك الجديده 2010 ولا برافو

**abdo_kmal** · 03-09-2010 06:51 AM

أنا أحب دايما يبقى كلامنا في المقارنات ده عن تجربة مش مجرد كلام وخلاص !! يعني مثلا مينفعشي أقول البطيخ أحسن مليون مرة من الشمام وخلاص كده من غير دليل ولا إيه ؟!! لازم أجيب دليل على كلامي من الواقع ....كذلك الحال بالنسبة لمقارنة السيارات ببعض.

وبالنسبة للبرافو ....طبعا لو بنتكلم على ال 150 حصان فـ دي خارج المقارنة تمااما لأنها وبكل أمانة تطحن السيات ليون وأفضل من الاسترا كمان , وبالنسبة لل 120 حصان لازم الأول نقول حاجة إن موتور ال 150 حصان هو هو بتاع ال 120 حصان لكن الفرق بس في حجم التربينة (أكبر) وكمان في نسب خلط البنزين والهواء (fuel mapping ) طبعا الكلام ده لاني شفت ناس بتقول إن الموتور مختلف وده طبعا غير صحيح ..... إنما الفرق بين الإتنين في بعض الكماليات وبس.

لو حنقارن بين البرافو 120 و الليون .... ناخدها كده واحدة واحدة .... نبدأ بالشكل والتصميم , طبعا منكرش إن شكل الليون جذاب لكن البرافو شكلها أحسن 100 مرة وماعتقدش إن في خلاف على كده(ولا إيه ؟) .... أنا العربية معايا باسم الله ما شاء الله مبتعديش في حتة إلا وتلاقي الخلق كلهم مبحلقين فيها
ندخل على الموتور ..... طبعا مفيش مقارنة بين الاتنييين نهائي , واحدة 1600 و 102 حصان ....والتانية 1400 تربو 120 حصان وعزم تسارع 206 (وهمي ) وعلى فكرة صحيح ..... البرافو ال 120 دي مطلعتش 120 !!! دي طلعت 135 وشوف اللينك ده http://www.nilemotors.net/Nile/12291...135-stock.html وعن تجربة .... أنا طلعت بيها من 318 i وياعيني صاحبها كان حيتجنن !
نيجي للأمان والثبات .... البرافو حصلت على 5 نجوم في اختبار السلامة الاوروبي و السيات حصلت على 4 نجوم فقط , إذن البرافو تتفوق ايضا , بالنسبة للثبات ... أنا ركبت الإتنين وملاحظتش فرق ! طبعا أنا ركبت البرافو أكتر بحكم إنها عربيتي والحمدلله أنا شايف إن ثباتها باسم الله ما شاء الله جيد جدا على الطريق مع السرعات العالية وملفات وكده ....يعني أساسا العربية عريضة وجنوط 17 يعني معرفش على أي أساس الكلام اللي بيشكك في ثباتها ده !!!

نيجي للكماليات .... أنا عايز أسأل سؤال للناس اللي بتقول إن كماليات السيات أكتر .... إيه اللي موجود في السيات مش موجود في البرافو ؟! أنا لو قعدت أعد كماليات البرافو مش حخلص .... يا راجل ده كفاية الإزاز الفاميه والجنط 17 و الفوجات اللي بتتحرك مع الدركسيون .... ده غير ال blue & me و ال voice commands , ولا التلاجة ولا ولا ولا ...مش حنخلص! يا ترى السيات بقى فيها الكلام ده كله ؟!!!

بعد كل اللي اتقال فوق ده ..... أقدر أقول بكل ثقة إن البرافو أحسن من الليون 50 ألف مرة !! يمكن النقطة الوحيدة اللي تتفوق فيها الليون هي الجير بوكس DSG اللي هو أفضل من dual logic بتاع البرافو .... و أنا على فكرة ليَّ واحد أعرفه معاه ليون لما أنا جبت البرافو وركبها وشاف اللي فيها وكده قال لي ابصملك بالعشرة

أما بالنسبة للاسترا .... فـأنا شفتها ووبصيت عليها ولكن حسيت إن كتير قوي المبلغ اللي حيدفع فيها وصرفت نظر عنها ... بصراحة مفيهاش جديد للدرجة (بستثناء الشكل,اللي أنا شايف إنه متغيرش قوي من قدام لكن من ورا بقى أفضل بكتير ) يعني وكماليات عادية كعادة الالماني ..... لكن أكيد جودة عالية جدا وعربية معمرة وتعيش كعادة الالماني برده .

وأنا الحمدلله قبل مااجيبها عملت survey كويس وارتأيت انها بالفعل الأفضل من المقارنات دي وأنا على فكرة أنا بقارن عربيات ببعضيها يعني أنا لم اتعرض لموضوع الوكيل واعادة البيع وقطع الغيار والكلام ده .....أنا بتكلم عن السيارة الأفضل بغض النظر .

**Mzeid** · 03-09-2010 09:22 AM

abdo_kmal

أنت جبت من الآخر
و أنا زيك مبحبذش المقارنات عن غير تجربة
و بالنسبة لثيات الفيات أنا مركبتهاش قبل كدة بس كان عندي إحساس انها ثابتة علشان عريضة

**osamy** · 03-09-2010 02:09 PM

المشاركة الأصلية كتبت بواسطة kamalsalem

للأسف اه بس عن خبرة لو بعد شوية زهقت من التوكيل الاوبل قطع غياره في الحرفيين هتبقى موجودة وأغلى من الفيات

البرافو؟؟؟؟ معقدة اوي اوي اوي اوي يعني مش متخيل انه حتى التوكيل هيعرف يشتغل فيها لو مثلاً حاجة ضربت في الكمبيوتر

للدرجادي العربيه معقده !

**osamy** · 03-09-2010 02:10 PM

المشاركة الأصلية كتبت بواسطة ghazy12

لو استبعدنا التوكيلات, و قارنت عربيه بعربيه فقط من كذا جانب...

يبقى نظرياً (حتى الآن)... الأسترا احسن من البرافو و بكتييييير في رأي...

لكن لو عملت حساب التوكيل و باقي العوامل من السعر, لقطع الغيار و غيره

يبقى تجيب برافو افضل و اريح و اسهل و ارخص (لو عجباك و جربتها)...

ده رأي بشكل عام, و ربنا يوفقك للخير ان شاء الله...

تقبل تحياتي...

للاسف مجربتش ولا دي ولا دي

**osamy** · 03-09-2010 02:12 PM

المشاركة الأصلية كتبت بواسطة kamalsalem

م الاخر يا باشا... الفيات عايزة الركيب اللي هيعرف ياخد باله منها وتفضل فبريكا وان شاء الله متعملش مشاكل

الاوبل معمرة اكتر بس مش هنحس وانت جوا انه فيها حوارات كتير.... انزل اركب الاتنين وهتعرف انا بتكلم ف ايه.. وياريت تركبهم دايرين عشان تقدر انا بقول ايه... البرافو سفينة فضاء وهي دايرة

يعني ايه ياخد باله منها
يعني ماتقعدش ست سبع سنين؟

**osamy** · 03-09-2010 02:19 PM

المشاركة الأصلية كتبت بواسطة ahmed samy

عربية x عربية

الأسترا احسن من البرافو

بس الأسترا أغلى تلا تيـ ـن ألـ ـف جنيه مش خمسة و لا عشرة

التوكيلات ........

الاتنين مش اقوياء أو بمعنى أصح سمعتهم مش قد كده

بس الفرق ان منصور توكيل قذر "بيعمل حركات كده يعني مش ولا بد" و أجدع عربية تغوووووووووووووور من وشه
لكن أوماترا مش كده .....بس مش بالقوة المطمئنة برضه

انت عايز هاتش ألماني أو أوروبي

ما تشوف الليون ...أنا ما عاعرفش موقفك منها ايه بس دي بديل و منافس قوي جدا

انا بحبها جدا بس في مشكلتين

اولا انا هجيب ال145 بالعافيه علشان تقسيط
ثانيا التابلوه بتاعها حاسه مش حلو وقديم عكس البرافو

**osamy** · 03-09-2010 02:21 PM

المشاركة الأصلية كتبت بواسطة ghazy12

+1111111111

أستــــــــــــــــاذ و رئيـــــــــــس قســــــــــــم

مرضتش اقوله كده والله علشان مخرجش بره اختياراته اللي هو مقتنع بيها...

لكن حيث انك فتحت موضوع الليون يا دوك, فاسمحلي اطلع الطلعه دي

الليون في نظري احسن من البرافو 30 ألف مره (نظرياً و عملياً و كله)

الليون بتنافس الاسترا جداا, لكن تتفوق عليها في انها عربيه متجربه و مافيش منها شكوى
و سعرها ارخص من الاسترا, و كمالياتها كتيييييييير, و كل اساسياتها جولف (و شوف انت بقى)

احسن 30 الف مره !!!
بس شكلها بقالو مده وخايف ينزلو شكل جديد قريب

**osamy** · 03-09-2010 02:24 PM

المشاركة الأصلية كتبت بواسطة bedo13

ياباشا لو بتتكلم في ال150 الف يبقى كده الاسترا بره المقارنة اصلا يعني ياما ليون ياما برافو 120 حصان البرافو تتفوق في الموتور والليون تتفوق في الثبات والوكيل..بس انا بحب البرافو كفاية الجنط 17 والفاميه وطبعا استهلاك البنزين اقل
اما لو 175الف يبقى برافو وش دول 150 حصان ياعم مش هزار ومنصور ده توكيل ابن تيييييت
انا هقولك اللي حصل معايا:
عربيتي فيكترا سي عملت حادثة طلعت على رصيف والايرباجز 2 اتفتحو التلفيات كلها تحت ما عدا رفرف واكصدام وفانوس تمام..
اعمل المقايسة يامعلم طلعت كام؟؟ 101 الف جنيه!!!
لأ ولسة اتفقت اجيب قطع الغيار استيراد وقفت عليا تقريبا 37 الف بالمصنعية طبعا اتأخرت اسبوع عن معادها وانا واقف على دماغ الصنايعية هناك عشان يشتغلو فيها اصلا...
بعد الاستلام :
ماظبطوش زوايا للعربية ورا خالص وقدام كانت معمولة غلط.
اسمع دي... العربية جابت موتور وان مروح بيها!!!
غيرتو بره ب10 تانيين
اكتشفت بقى حاجه كمان قريب: شغل السمكره بتاعهم زبالة في حتة الي بتشيل القنطرة دي مش معدولة ولازم الموتور يتفك تاني عشان تتعمل....
من الاخر ابعد عن منصووووور وغنيله..
والله انا نفسي في الكابتيفا بس عمري ما هجيبها.
على فكرة ال3 عربيات سعر اعادة البيع بتاعهم في الارض

انتوا قفلتوني من الاوبل بسبب منصور وبسبب سعرها

**osamy** · 03-09-2010 02:26 PM

المشاركة الأصلية كتبت بواسطة bedo13

نسيت اقولك حاجة كمان..
لما جيت اشتري العربية في 11/2007 اداني البرشور بتاع مو2007 المانيوال جيت استلم قاللي دي 2008 مانيوال ومافيش اوتو بردو طلعت بقى ال2008 دي ناقصه عن 2007 مرايات ضم فوجات حساس نور ومطر وجنوط صلب مش المونيوم!!! كماليات معدية 10000 وبنفس السعر ونزل من الكاتيجوري ده عدد قليل جدا من العربيات وانا لبستها

هوه ايه حساس النور والمطر ده؟

**osamy** · 03-09-2010 02:27 PM

المشاركة الأصلية كتبت بواسطة ghazy12

يا جماعه صاحب الموضوع بيتكلم عن البرافو الـ120 حصان, و هو اللي قال كده...

و ده كلامه...

يبقى بلاش نخرج بره الموضوع, و نتكلم عن البرافو الـ150 حصان...!!!

البرافو فعلا موتورها اقوى, لكن ثبات مش على مستوى القوه دي...

الليون تتفوق في الباقي كله, و كمان ثبات محترم جداا و نظام تعليق اكثر احتراماً
و فيها كمان tcs, و ده تأكيداً على جانب الثبات...

البرافو الـ120 حصان مافيهاش esp ولا حتى tcs..!!
ده غير انها على تورشن بيم خلفي..!!!

و في الاخر... موتور قوي, مع ثبات دون المستوى... يبقى بلاها احسن

عموماً ده رأي الشخصي المتواضع...

انا كده كده مش هتفرق معايا اكتر من 120 حصان كده حلو اوي عليا