الموضوع: رحلتي لابو ظبي (مقارنه بمصر)

الحمد لله سنحت لي الفرصه ان ازور ابو ظبي لمده شهر كامل و ده خلال شهر رمضان و العيد المهم

قبل ما اسافر و انا بسمع حتكره مصر حتطلب تعيش هنا ها ها ........................
العيشه في مصر زباله الناس في مصر همج هنا مش عارف ايه و بتاع ايه ............

المهم الحمد لله نزلت مطار دبي لان التاشيره بتاعتي كانت دبي مش ابو ظبي و اكتشفت ان مقدرش اخد طياره لابو ظبي لازم دبي هما مش كلهم دوله واحده يعني انا لما اسافر مصر اعمل تاشيره قاهره اسكندريه اقصر اسوان مرسى مطروح شرم ؟؟؟؟؟؟؟؟؟؟؟؟؟؟؟؟

المهم طبعا نزلت من المطار استخدام صحيح و كامل للتكنولوجيا لدرجه ان الحمامات تدار بالكامل الكتروني بغض النظر عن التفاصيل
الاجرائات بسيطه جدا يادوب اخدوا بصمه عيني و سمحوا بالخروج حوالي 15 دقيقه علشان اخرج مش صعوبه في الاجرائات بس علشان المطار كبير

لسه بطلع من المطار و العربيه مستنياني الاقي نفسي بكح جامد و بتخنق دخلت العربيه بسرعه حراره عاليه جدا و رطوبه لا تطاق تحس انك بتستنشق ميه مش بخار ميه
الانسان في الامارات لازم يبقى في مكان مغلق مكيف
مفيش حاجه اسمها هواء طلق

المهم شوارع نظيفه منظمه العربيات ماشيه في الحاره بتاعتها فيه نظام البلد مش زاحمه او يمكن علشان كان الصبح بدري اشارات و وضع جميييييييييييييييل جدا احترام كامل و بالنسبه لدخولنا ابو ظبي مفيش كارتات زي عندنا بيبقى فيه باركود ملزوق فوق المرايه لكل عربيه و كاميرا بتبقى موجوده بتلقط البار كود و بتخصم من رصيده اللي انتا بتشحنه كانك بتشحن كارت تلفون بالظبط

الردارات عملوا نظام جديد بيطبق انهم يركبو مثلا رادار يلقط البار كود بتاع عربيتك وواحد تاني بعد تلاتين كيلو مثلا يلقطك و يحسب السرعه المتوسطه لو لقاها اكتر من المسموح بيه مخالفه علشان الناس متهديش عند الرادار و تجري تاني و مخالفه السرعه بتبدي من 700 درهم

خطوط مسارات للمشاه محدده باشارات و مينفعش سائر يعدي الشارع (بس كان بيحصل كتير من الهنود و شرق اسيا) لان اللي بيتمسك غرامه 200 درهم

ممكن تشوف جميع انواع السيارات اللي تتخيل و متتخيلهاش الحمد لله عشت و شوفت المايباخ و كان فيه واحده تانيه في مطار دبي كانت مفتوحه شفتها يا نهااااااااااااااار قصر مش عربيه

كان بيحصل في الشوارع بعض التجاوزات برضه من عرب و هنود دا غير كسر السرعه من المواطنين اللي مبتفرقش معاهم قيمه المخالفات

اتوبيسات نقل العام في المجمل جميله جدا بس لو فيه زحمه محدش بيشيل التاني زي مصر و مقدارها درهم واحد لاي مسافه انت عاوزها او تجيب كارت ب60 درهم في الشهر يا بلاش

التاكسيات في ابو ظبي يعتبر زي عربيه خاصه مستاجره يوديك اللي انتا عاوزه و يستناك و مينفعش يقولك لأ عربيه نضيفه غاليه المعظم عربيات التيما و كامري و كابريس و بعض انواع قليله جدا نيسان صني و تيدا بس الاجره غاليه ممكن مشوار يكلفك 20 درهم حوالي 9 كيلو لانه بيحسب حسب زمن الاستخدام و عدد الكيلو مترات بس بالنسبه لمستوى المعيشه رخيص جدا

بس ده بالنسبه لنظام المرور في ابو ظبي و حكمل الموضوع ان شاء الله

الله يسلمكم كلكم

كابوس الليل حمد الله على السلامه كلامك كله صح و مقدرش اقول حاجه عنه

نرجع تاني لاسلوب المعيشه و الاسعار

الاسعار في ابو ظبي لاحظت غلو الخضراوات بصوره عامه 6 درهم و انتا طالع فكره تقسيم الفاكهه اللي كنت دايما بسمع عنها و كان نفسي تظبق في مصر يعني انتا نفسك تشتري بطيخ و عايش لوحدك تشتري واحده بحالها ليه و تدبس فيها ممكن تشتري ربع بطيخه حتبقى غاليه بس حتبقى ضامن تاكلها كلها و انها تبقى حمرا مش مضروبه و ان مفيش حاجه تترمى و هكذا حتى لو عاوز تشتري موزه واحده مش زي مصر

بالنسبه للاكل و الشرب جميع انواع المنتجات متوفره من جميع انحاء العالم الخضار المصري مفضل اكلت اللحم البرازيلي و الاسترالي معجبونيش مش عارف ليه و لقيت المصري جبته بس و انا باكله قولت هو مصر مش فيها ازمه لحمه و بصيت للطبق انتي جيتي ازاي هنا ما علينا

المهم اللحمه رخيصه بالنسبه لمصر و بتتباع قطع حسب مكانها في البقره مثلا و مفيش الهبل القرف اللي ساعات بيتقطع مع اللحمه العاديه عندنا هنا

احسن ماركت في ابو ظبي كان الجمعيه في الاكل و الشرب و كارفور في الالكترونيات و اللعب الساعات
محلات الاكل و الشرب منتشره جدا و اشهر محلات زهره لبنان و جاد المصري و سويت بالاس دا مصري برضه
بالنسبه للفاست فود مبدائيا مفيش حاجه اسمها خدمه توصيل ياخد عليها فلوس جربت هناك ماكدونالدز زي مصر عدا ماك فلوري بتاع مصر احلى و كنتاكي مصر لو مكروتوش في الشغل حيبقى احلى طبعا الوجبه 4 قطع ب20 درهم يعني 30 جنيه بس احسن مطعم اكلت عنده و كنت ادمنت عليه اسمه popeyes و معرفش هل ليه فرع في مصر ولا لأ بس عمتا لو حتعيش لوحدك في ابو ظبي متدلع ممكن تسرف في الشهر اكل و شرب 1500 درهم تقريبا