ياجماعه مش عايزين ننسى إن الراجل أبو البنت اللي بيقولك عايزين قايمه و مهر و مؤخر وشابكه ده هيديلك بنته أو أخته فياريت نراعي شعوره .
تاني حاجه و في الآخر هو مابيخدش حاجه يحطها في جيبه ولا إيه ماهو يا إما دهب بيروحلك " مع بنته " أو عفش في شقتك بيروحلك برده " مع بنته " أو حبر على ورق "فعلاً حبر على ورق " طول ما الحياه مستمرة و إنتا راجل كويس .
و مش كده و بس ده انت لو مزنوق نسايبك هما اللي بيفكوك عن أهلك و يساعدوك " عشان بنته " و لو حصل للراجل ده حاجه مين اللي هيورثه " بنته برده "
والبنات دول غلابه " أنا عارف أنا بقولك إيه " كل البنات غلابه ممكن بكلمه منك لو إنت راجل محترم تديك كل حاجه " ماهي إداتك نفسها "
و الست كل حياتها بتبقى للراجل و العيال مهما طلبت بيبقى عشان البيت و العيال بعكس الراجل " الكثير من الرجال يفكرون في أنفسهم أولا "
معلش الكلام ده ممكن مايعجبش البعض
بس لو إديت لنفسك فرصة وفكرت هتلاقي فلوس الدنيا كلها مش كفاية
ملحوظة
زمان ماكنش الراجل بينطق " عارفين يعني إيه مش بينطق " على أي حاجه و كان بيمضي على القايمة من غير ما يبص فيها و كان يقول لو مليون جنيه أنا هامضي عليهم كان الراجل كده بيبقى فرحان بالجواز و أهله فرحانين و مستعدين لأي حاجة ماعرفش ليه دلوقتي بقت الناس تتكلم على الشابكة و القايمة و المؤخر طب يكلموا على الشابكة لكن القايمة و المؤخر يتكلموا فيه ليه؟ و أنا أعترض عليه ليه؟ ده اللي أنا مش قادر أفهمه هو خلاص بقينا كلنا ناصحين في كل حاجة و زمان الناس كانوا هبل أهالينا كانوا هبل أهم الهبل دول عاشوا وبنوا بيوت وجابوا عربيات و جوزوا عيالهم و اللي إحنا فيه ده كله من خيرهم هو إحنا بدأنا حياتنا زيهم بمرتب 35 جنيه روحنا حاربنا زيهم شفنا الويل في تعليم زيهم أسألوا أهاليكم جبتوا الغسالة أمتى و التلاجه أمتى و التليفزيون بعد أد إيه
دول ناس كانوا عارفين قيمة كل حاجة في حياتهم اللي شافوه من الحرب و الأزمات خلاهم يعرفوا قيمة الواحده اللي هيتجوزوها
" لايغير الله ما بقوم حتى يغيروا ما بأنفسهم "
آسف للإطالة
و شكراً