السلام عليكم ورحمة الله وبركاته

اخوانى الاعزاء انا حبيت اكتب الموضوع ده علشان كل واحد مقبل على شراء تلاجة ومحتار فى الماركات

انا من حوالى 3 شهور اشتريت تلاجة ايديال زانوسى نو فروست

التلاجة اشتغلت اسبوع وبعدين التبريد انعدم نهائى لدرجة ان الاكل كله اترمى فى الزبالة

اتصلت بالصيانة وفعلا تم ارسال فنى قالى افصل التلاجة يوم وبعدين شغلها هتتحل المشكلة

اشتغلت تمام لمدة 3 ايام و ظهرت المشكلة من جديد

للمرة التانية اتصلت بالصيانة وتم ارسال فنى جديد قال العيب فى التايمر هنغيره

تم تغيير التايمر واشتغلت تمام لمدة اسبوع وظهرت نفس المشكلة

للمرة التالتة تم الاتصال بالصيانة وارسال فنى جديد واشتغلت تمام لمدة اسبوع وظهرت نفس المشكلة

للمرة الرابعة تم ارسال فنى اخر وقال الثرمو ديسك مش شغال وهيتم تغييره وتم تغييره وطبعا زى كل مرة الفنى بيطلب عدم تشغيل التلاجة الا بعد 3 ساعات وعند تشغيل التلاجة المرة دى تم اكتشاف الاتى
1- لمبة التلاجة مش شغالة
2- جسم التلاجة بيكهرب
3- التلاجة مش بتفصل نهائى
4- النوفروست برده مش شغال

اتصلت بالصيانة وقلتلهم حرام عليكم انتم استحالة تكونوا شركة محترمة انا عاوز اغير التلاجة دى لسه جديدة والعيب الاصلى مش بيتصلح بالاضافة لظهور عيوب جديدة المفاجاءة بقى انهم علشان يغيروا التلاجة عاوزنى ادفع فرق سعر هيتم تقييمه على اساس المدة اللى التلاجة اشتغلت فيها

طيب دى هى تعتبر ما اشتغلت اصلا وطول الفترة دى هم كانوا بيصلحوها مع العلم ان عند الاتصال بالصيانة يتم ارسال الفنى بعد يومين والفنى علشان يغير اى حاجة بياخد كمان يوم او يومين انا مش عارف اعمل ايه معاهم

اسف للاطالة والسلام عليكم ورحمة الله وبركاته