الموضوع: Getz Club

المشاركة الأصلية كتبت بواسطة mada_76

السلام عليكم
اولا اهلا بيك ومبروك عليك الجيتز وثانيا اشكرك انك خصتني بالشكر وده شرف ليا .
ثالثا الاجابة على سؤالك الاخير دواسة البنزين سلك. ولو حاسس انها بتاخر شوية ولا حاجة ممكن تنضف البوابة بضمير هاتلاقي دواسة البنزين نعمت وبقت حساسة .
بالنسبة لاسئلتك السابقة بقى
تعالى اما اقولك يا سيدي :oc_sun1[1]:

الزجاج الامامي ده مافيش اسهل منه . على مصنع جريش عدل وهاتركب واحد نضيف سعره 480 درخمة .
جريش في في شارع دمشق فرع وفي المصنع في العاشر من رمضان وده هايبقى ارخص حاجة بسيطة.

بالنسبة للرجة بتاعة العربية وهي باردة دي قاعدة الموتور زي ما ردوا عليك الاخوة الزملاء بالظبط .
والحلول سهلة وبسيطة :
1- معاك فلوس ومتريش تطلع على التوكيل تجيب قاعدة اصلي ب 900 جنيه ( ودي هاتديك افضل نتيجة )
2- العملية مش مبحبحة اوي لدرجة التوكيل تطلع على الشرقاوي ( في فرع في جسر السويس . معرفش فروعه التانية فين ) وتجيب القاعدة الكوري الاصلي ودي سعرها 420 بندق . وبصراحة مجربتهاش .
3- العملية مقشفرة يبقى عليك وعلى نافع بتاع شارع دمشق تجيب القاعدة التقليد هي كوري برضه بي 225 رينجد . ودي انا لسة جايبها من شهر وبصراحة شغالة بس مقارنة بقاعدة التوكيل غبور يكسب انما دي ماشي حالها يعني الرعشة اختفت بنسبة 90% بس في حاجة بسيطة خالص لا تذكر ( معلش اصل انا محسوك شوية ) والحاجة البسيطة دي بتديني احساس ان القاعدة دي مش هاتعيش كتير انما بيني وبينك مش مهم طالما مش مدفوع في الف بلبل .

اي حاجة انت عايزها في ام العربية دي اسال وانا معاك .
ومبروك عليك العربية وربنا يباركلك فيها وعلى مهلك عشان هي بتطمع الناس في الجري .

الف شكر يا معلم علي النصيحة وبما اني حطيت اخر مليم معايا في العربية (فقدت الأمل اجيب الأيفون الجديد) فشكلي هعمل زيك وهروح للحل الأرخص لأني فعلا مش عارف اجري بسبب صوت زنة الغسالة اللي عملاة قاعدة الموتور المهببة دية ... صحيح هي انهي قاعدة ؟؟ يعني اروح للراجل اقولة عايز انهي قاعدة موتور ؟

انا غيرت الإزاز علي فكرة عند واحد اسمة الثلاثي في السابع مدينة نصر عمل حوالي 350 كلة علي بعضة وبعدها بيومين خد نقرة علي طريق اسكندرية من مقطورة محملة زلط.. بس خبطة مش مهمة اوي يعني

بدور اليومين علي المساحات والولاعة علشان مش موجودة في العربية .. حد يعرف الاقي فين الإكسسوارات دية ؟

طلب سريع يا جماعة

ممكن حد يقولي الكود بتاع قاعدة الموتور اللي بتسبب اللإهتزاز والزنة في الجيتز علشان مسافر كمان يومين وعايز اجيبها معايا من برة ويا ريت لو يقولي هي دية صورتها ولا لأ ؟

Hyundai Getz TB 9 02 ON 1 3L 1 6L RH Auto Manual Engine Mount | eBay

مساء الخير
والله انتو جيتولى من السما
انا عندى عربيه جيتز ٢٠٠٩ والاكصدام الخلفى شبك فى كاوتش عربيه نقل كان مرمى على الطريق الصحراوى وخده وطار :)
المهم انا مش لاقيه الاكصدام ده فى حته بره التوكيل وسعره عال اوى فى التوكيل، ممكن تدلونى الاقيه فين؟
وشكرا والله
وكنت عاوزه كمان اقوى نور العربيه بس مش عاوزه اركب الزينون علشان بيأذى اللى سايق قدامى و كمان عاوزه اركب مسند جمبى و حاجه ترفع الازاز مع اللوك بتاع العربيه والسنتر كمان فيه مشكله :)
معلش بقى استحملونى مهو انا جبت العربيه دى بناء على نصايح نايل موتورز :)
شكرا مقدما

بندحرج التماسي علي الأخوة الجيتزاوية اللي عاملين بيات شتوي بقالهم كام اسبوع

امبارح اشتريت شوية حاجات كدة قولت برضة أقولكم سعرها من شارع دمشق

روحت اجيب فلتر بنزين من غبور .. طبعا الرزالة في التعامل وكأنهم بيدونا الحاجة ببلاش، ورغم انهم كانوا قايلين انة موجود، روحت الفرع قالي لا دة خلصان، وسعرة 195 .. علي الناحية التانية لاقيت الأصلي برضة عند محمد عاصم وأرخص 20 جنية ودخلت تاني للبية بتاع غبور قالي ايوة هو الأصلي ... علي فكرة، محمد عاصم عندة قاعدة الموتور الأصلي أرخص بـ 330 جنية من غبور وسعرها كان 650 جنية لكن خلصانة وهتيجي في خلال أسبوع للي محتاجها ... علي فكرة محمد عاصم موزع معتمد هيونداي، كيا، رينو

اشتريت كمان القاعدة الكوري بتاعت الموتور بـ 230 من عند واحد اسمة المصرية تقريبا .. كانت خلصانة من عند الكل بما فيهم نافع كمان !

الخبر الكويس بقي اني عديت علي عشم نوار يظبطلي السنتر علشان كان في باب مش شغال، غير الطلمبة وخد 60 جنية (دة طبعا الجزء اللي مش كويس) .. الجزء الكويس بقي انة بقي بيعمل اخيرا الشنطة ضمن السنتر، تفتح السنتر تفتح معاها، تقفلة تتقفل معاها، ودة بيعملة بـ 120 جنية بالظبط.

سؤال بقي للشباب .. حد يعرف اجيب منين صباع الولاعة علشان ضايع وطلع عيني علية مش لاقية ... وبتاع الفيرنا مش بيشتغل عليها لأني جربت من كذا فيرنا مفيش فايدة

كنت بسأل انت بتصين في التوكيل و لا عند مين؟ كمان بتحط زيت ايه؟ أخيرا لو في تجمع للجيتزاويه يا ريت نعمله و سلام للكل