الموضوع: Getz Club

المشاركة الأصلية كتبت بواسطة _Ahmed_casper_

الله يبارك فيك يا كوكس انا عربيتى اسود فتحه سقف و عامل بيها حوالى 1000 بس لسه مروحتش الصيانه و المشاكل اللى ظهرت ان الفرامل بقت واطيه شويه بس ده هوا بس متهيئلى مش تيل ولاحاجه و كمان الكاسيت هنج معايا مرتين كده بس الحاجه الملحوظه انها بتسخن بسرعه و صوتها عالى مش عارف بقا ده عادى ولا حاجه و هتتظبط بعد الصيانه ولا اييييييه

ربنا يخلهالك وتعمل بيها كده 1000000 كم
أنا اللي عرفتوا أن صيانة 1000 دي مهمة جدا عشان بيشيكوا على العربية كلها من عيوب الصاعة وكده
وانا هقولك اللي متأكد منه في الحاجات اللي أنت قلقان منها بس ده ميمنعش برضه أنك تسألهم تاني في الصيانة أنت بتسأل بفلوسك
موضوع الفرامل ده معرفش عشان محصلش معايا ( بس ممكن الواير عايز يتشد ) أو جرب أي جيتز تانية شوفها زي عندك ول لا
يتسخن بسرعة دي أنا كان متهيألي زيك كده بس عرفت أن ده طبيعي فيها مادام لمبة الحرارة مش بتنور والمية مش بتنقص يبقى مش بتسخن عن الطبيعي ( مع انها تحسسك انها مولعة ) وانك محتاج تهويلها
وأن صوتها عالي ده بقى أنا برضه بحس بيه بالذات وانا بكبس بنزين بس في كذا واحد ركبوا معايا معاهم فيرنا قلولي صوتها أوطى من الفيرنا وكمان أحلى فأطمنت أني أحسن من غيري (أنا سألت كمان قلولي عادي عشان المطور قريب هو أحنا تقريبا بنبقى حطينه على حجرنا هو ممكن أنا حاسه عالي عشان أول ماجبتها كنت بقارن الصوت بأخر عربية كانت معايا ( الاوبترا ) )
أبقى طمني في الصيانة يا كبير وكنت عايز أعرف هما بيكشفوا على ايه في الصيانة دي

المشاركة الأصلية كتبت بواسطة koks

ونبي يا رجالة اي حد معاه جيتزاية بس تكون اوتوماتك يقولي هو جاب بيها كام أقصى سرعة؟؟ بس ضروري
أصل انا بجيب بيها 170 وبعد ماغيرت فلتر الهوا والبوجيهات والزيت بقت بتقرب أوي على ال 180 بس مش بتجيب أ كتر من كده
طبعا انا مش محتاج أكتر من كده بس انا مش عارف ده فعلا أخرها في كل الجيتز ولا أنا عندي حاجة غلط
اصل انا نفسي اجيب 220 أشوف شكل العداد وهو متقفل

معالى كريم باشا
صباح الفل يا بوب
والله انا عربيتي مانيوال , واخر حاجة جبتها انا مش العربية 195 على الطريق الدائري ومقدرتش اكمل بصراحة لان الدارئري ده كله مطبات هوا وقرف يعني بس انا كنت بشد مع واحد مجنون معاه النترا . بأمانة كان ورايا لغاية لما هديت .
بس مش عارف بقى الاوتوماتيك نظامها ايه ؟ بس خد بالك بلاش تهور يا بوب وياريت تسيبك من ال 220 دي .
برضه الـ 180 منظرها جامد

المشاركة الأصلية كتبت بواسطة _Ahmed_casper_

الله يبارك فيك يا كوكس انا عربيتى اسود فتحه سقف و عامل بيها حوالى ١٠٠٠ بس لسه مروحتش الصيانه و المشاكل اللى ظهرت ان الفرامل بقت واطيه شويه بس ده هوا بس متهيئلى مش تيل ولاحاجه و كمان الكاسيت هنج معايا مرتين كده بس الحاجه الملحوظه انها بتسخن بسرعه و صوتها عالى مش عارف بقا ده عادى ولا حاجه و هتتظبط بعد الصيانه ولا اييييييه

اهلا بيك يا استاذ احمد والف مبروك على العربية وان شاء الله يبارك فيها ويكفيك شرها يا رب .
انا برضه عربيتي اسود وما ادراك ما الاسود . انا مش بكرهك ولا حاجة بس اكيد انت دماغك زي . كل الناس قالتلي بلاش اسود بس انا بحبه . انا عايز اقولك اني ببقى خارج من البنزينة والعربية لسة بتنقط ميه الغسيل وتمشي صباعك عليها كده تلاقي تراب . عايزين نعيش في بلد تانية مش متربة زي بلدنا .

المهم يا باشا انا عايز اقولك اني عامل بالعربية حاليا 129000 كيلو واقدر اساعدك على قد ما اقدر .
الفرامل دي عادي جدا لما هاتروح الصيانة هاتلاقي الفرامل بقت 10\10 سواء رجل او هاند بريك . والصوت العالى بتاع الموتور ده لا تقلق منه برضه هايتظبط وهايهدى شوية لما هايظبطوا التاكيهات ويغيروا زيت لان الزيت اللى فيها ده بتاع المصنع في كوريا . ولازم يتغير في صيانة ال 1000 . والكاسيت هايتظبط برضه ده حوار عادي وماتشغلش بالك بيه خالص لان ده كماليات وحتى لا قدر الله لو باظ خالص سهل يتغير ويجاب احسن منه كمان . المهم اساسيات العربية .
موضوع السخونية انا بصراحة ماحتكيشتش بيه خالص وعشان كده مش هاقدر افتي فيه .
لما هاتعمل الصيانة هاتلاقي العربية مسكت نفسها وسحبها بقى احسن وهاتحس انها فاقت كده بس لازم تقولهم على كل الشكاوى اللى عندك وتراجعها بعد ماتستلم العربية ونصيحة من واحد اتمرمط في التوكيل فضى العربية وانت رايح عشان هما هايخلوك تشيل منها كل حاجة حتى الاريال وهاتفضل شايل حاجتك وقاعد بيها في الاستراحة . فمن الاول روح خفيف خفيف .
وربنا معاك وياريت اكون قدرت افيدك . وزي ما koks قالك بكرة الايام هاتثبتلك انك راكب احسن عربية هاتشباك في مصر .

المشاركة الأصلية كتبت بواسطة _Ahmed_casper_

طبعا احلى عربيه فى مصر علشان مع الناس الحلوه دى
انا عارف طبعا ان المشاكل دى ان شاء الله تتظبط قى التوكيل بس انا فى حاجات عايز اعرفها معلش اخوكم جديد فى الزيرو و التوكيلات و النظام ده
....هو ينفع اروح الصيانه و مخلهمش يغيرو زيت؟ انا عارف انه مهم و كل حاجه بس بسأل يعنى لو مش عايز اغيرو عادى ولا لازم؟ و هدفع كام ان شاء الله؟ و سؤال تانى معلش هو الكاسيت بتاعها حلو .ينفع يعنى لصبات و جى ام و كده ولا يتغير احسن؟ وفعلا يا باشا اللون الاسود روعه انا دماغى مطرقعه برضه و فضلت مصمم عليه حتى لو العربيه متربه بيبقى شيك انا اول مجبتها فيمت ازاز و فوانيس و العربيه بقت تحفه

طبعا يا باشا انت ممكن تغير الزيت بره وده شيء عادي مايخرجكش من الضمان . يعني انت ممكن على 950 كيلو مثلا او 980 تقوم مغير زيت في البنزينة اللى انت بتحبها . بس فكرني اقولك على حاجة على موضوع الزيت ده .
بالنسبة للكاسيت انا العربية بتاعتي موديل 2007 والكاسيت اللى فيها مختلف عن اللى معاك . ممكن اللى يفيدك في الموضوع ده koks .
وياريت بقى كام صورة للعربية بتاعتك . احنا كلنا كنا منزلين صور عربياتنا بس حلص مشكلة في الموقع هنا وكل ده راح مع الريح . احنا عندنا موضوع الفيميه ده رخم لان عندنا الظباط واللجان والكماين كتيييييييييييييييير والامناء بتوع الشرطة يا عيني محتاجين ياكلوا عيش وما بيصدقوا يلاقوا واحد مفيم او عامل حاجة غلط بيجري عليه ويقفوه تقولش هايتسجن . لكن طبعا هما بيجروا عشان يطلعوا بال 20 جنيه او ال50 على حسب المخالفة .
موضوع الزيت بقى يا بوب .
انا لما دخلت الموقع ده اكتشفت حاجات كتير اوي مكنتش اعرف عنها اي حاجة ومنها موضوع الزيت .
الزيت نوعين الاول المعدني وده اللى عمره من اول 1000 كيلو لغاية 5000
والنوع التاني تخليقي وده اللى هو بيقعد 7000 او 10000 كيلو .
لازم تعود العربية على نوع معين منهم وماتغيرش كتير من ده الى ده عشان بيحصل حاجة في الموتور انا مش فاكرها دلوقتي لكن انت ممكن تبحث عن موضوع الزيت ده في قسم الصيانة وتقرا براحتك . لكن المهم انك لما تيجي تغير من زيت تخليقي الى معدني او العكس لازم تعمل دورة غسيل للموتور من جوه . عشان كده حبيت اقولك وانت لسة في الاول كده وانا انصحك بال 10000 كيلو عشان تشتري داماغك ومريح للموتور وهما في هيونداي بيحطوا شيل وانا اعتقد انه احسن الزيوت الموجودة .