الموضوع: Getz Club

المشاركة الأصلية كتبت بواسطة mada_76

حبيبي كريم باشا
نعيما على الدوش الجامد . فعلا باين ان دقنك بتطلع بسرعة اوي يا بوب انا لو منك اربيها احسن .
( الغريب ان الايموشن واشح ان شعر جسمه كله بيطلع من دقنه , مافيش اي شعر في راسه حتى )

بالنسبة لسامية انا راي سيبك منها بما انها بتاعة مطاوي وكده ( هابقى اقولك بيني وبينك هي بتعمل ايه )

اما بقى موضوع السرعات ده . ( وحياة الماما بتاعة الإنت ) سيبك منه وكفاية علينا يا عم ال 130 . وخصوصا على الكورنيش عندكو . السرعة مالهاش كبير يا بوب .
انا لما كنت بشد مع الانترا دي والله مكنت اعرف اني جبت ال 190 او 195 بس انا كنت متنرفز شوية فدوست جامد على الدواسة . بس اول لما شوفت عداد السرعة سيبت البنزين وفضلت اهدي وحاولت انبه بتاع الانترا عشان يهدي بس هو كان سخن وطار من جنبي ومعرفش راح فين . انا بنصحك عشان ده واجبي ( بس انا من جوايا بعشق الجري ) بس خلينا متفقين ان بلدنا مش مجهزة للجري ده . يمكن طريق او طريقين بالكتير في مصر هما اللى ممكن تجري فيهم .

كنت اخد رايك في موضوع السماعات والكاسيت ده عشان انا فعلا عايز اغير العدة في العربية . بس مش عايز اركب جي ام والجو ده . لا انا عايز صوت نقي ونضيف . فبفكر اغير سماعات الاربع ابواب برضه واجيب كاسيت كويس . بس مش عايز سوني لاني بسمع انه مش تمام ( والله اعلم ) . انا عايز اجيب كينوود .
فكنت عايز اسالك او لو ممكن تسال صحبك اللى انت بتركب عنده . ينفع اركب سماعاتين في البابين اللى ورا يكونوا جامدين شوية وقدام يبقى السماعات اقل نوعا ما من اللى ورا .
يعني اللى ورا يكونوا دبل بيز ( هو في اصلا دبل بيز دائري ) ؟ واللى قدام يكونوا اكتر مدرينجات وتويترات .
والـ 16 ده اللى مقاس سماعات الابواب عندنا في الجيتز ؟؟؟؟ ودوي 16 سم ولا انش ولا ايه ؟

حبيب هارتي معلش اتأخرت عليك في الرد مش عارف مالي اليومين دول بس انا في موود مش لطيف خالص خالص
المهم بالنسبة لموضوع الكاسيت ده بص انا هقولك على حاجة بس من غير تريقة انا السوني اللي معايا ده هو موديل جديد وفيه usb و aux حلو بس انا بصراحة واخده تخليص حق يعني مش شاريه بس لو كنت هشتري مكنتش هجيب سونى .. انا اللي جربتهم قبل كدده الكينود ود والبيونير وال jvc واحلاهم كان معايا هو الكينوود
وبالنسبة للسماعات الكينوود حلوة برضه والبايونير حلوة وال jbl احلى حاجة بس نادرة اوي
وفي رأيي احسن حل للعربية من غير الجي أم والكلام ده يعني عده عادية أنك تركب اللي قدام هما اللي جامدين بما انك قاعد قدام دايما واللي ورا يكونوا على البورده وبيضاوي عشان البيضاوي اجمد طبعا وعشان يكون توزيع الصوت مظبوط بس لو جبت اللي ورا هما الجامدين في رأي مش هيكون الصوت متوزع حلو

المشاركة الأصلية كتبت بواسطة _Ahmed_casper_

جميله اوى يا مادا ربنا يباركلك فيها و يكفيك شر سرعتها و جنانها . ان شاء الله هرفع صور عربيتى كمان ان شاء بس عايز اعرف برفعها ازى اصل انا مستجد

ربنا يخليك ويبارك فيك وفي عربيتك
موضوع رفع الصور ده عايز تركيز معايا جامد
بس انا هاحاول ابسطهولك . اول حاجة في موقع لرفع الصور لازم تعمل عليه account وتنزل صورك عليه ماشي ؟
وهو موقع مجاني
http://imageshack.us/
اعمل الخطوة دي على ما افكر هاشرحلك طريقة التنزيلل هنا ازاي

المشاركة الأصلية كتبت بواسطة nana96

ازيكم ياجماعة عاملين ايه فى البرد؟؟؟؟ بالنسبة للى سألوا عن صيانة الألف كيلو اتكلفت 270 جنيه شامل:
تغيير زيت موتور (هيليكس شيل) 227 جنيه
تغيير فلتر زيت محرك 18 جنيه
ضريبة 24,5 جنيه
اداء العربية احسن شوية وكمان حاسة ان الفرامل احسن شوية

عندى سؤال بالنسبة للكاسيت زرار الباور على طول مطفى مش بينور كمان كل ما اشغل الusb افضل اشيل الفلاشة واحطها كذا مرة لحد اما الكاسيت يحس بيها وتشتغل وزوجى قالهم فى التوكيل واما استلم العربية قالوا انهم غيروا الكاسيت لكن كل العيوب زى ماهى نوع الكاسيت هيونداى هل عندكم نفس العيوب دى؟؟ وهل فعلا غيروا الكاسيت ولا بيستهبلوا؟؟؟

اولا حمدالله على سلامتك يا نانا وعلى سلامة العربية من الصيانة
ثانيا موضوع الكاسيت ده انا متاكد 500% انهم ولا غيروا ولا هببوا ولا بصوا عليه من الاساس .
انا لو مكانك كنت روحت عملت معاهم مشكلة .
طيب انا هاقولك على حاجة
مش انتي معاكي الضمان بتاع الكاسيت ؟؟؟؟ شهادة كده بتضمن الكاسيت ؟؟؟؟
انا لما جبت العربية كان فيها شهادة ضمان
المهم
الضمان هاتلاقي مكتوب فيه serial number بتاع الكاسيت اللى في عربيتك ولا يمكن يتكرر . شوفي السيريال ده مطابق للى ملزوق على الكاسيت من الظهر . بس ده حوار محتاج فك الكاسيت .
بس دي طريقة عشان تعرفي انهم نصابين
وربنا يرحمنا في بلدنا الجميلة دي

المشاركة الأصلية كتبت بواسطة koks

حبيب هارتي معلش اتأخرت عليك في الرد مش عارف مالي اليومين دول بس انا في موود مش لطيف خالص خالص
المهم بالنسبة لموضوع الكاسيت ده بص انا هقولك على حاجة بس من غير تريقة انا السوني اللي معايا ده هو موديل جديد وفيه usb و aux حلو بس انا بصراحة واخده تخليص حق يعني مش شاريه بس لو كنت هشتري مكنتش هجيب سونى .. انا اللي جربتهم قبل كدده الكينود ود والبيونير وال jvc واحلاهم كان معايا هو الكينوود
وبالنسبة للسماعات الكينوود حلوة برضه والبايونير حلوة وال jbl احلى حاجة بس نادرة اوي
وفي رأيي احسن حل للعربية من غير الجي أم والكلام ده يعني عده عادية أنك تركب اللي قدام هما اللي جامدين بما انك قاعد قدام دايما واللي ورا يكونوا على البورده وبيضاوي عشان البيضاوي اجمد طبعا وعشان يكون توزيع الصوت مظبوط بس لو جبت اللي ورا هما الجامدين في رأي مش هيكون الصوت متوزع حلو

ولا يهمك يا كريم , انا بس بحب الناس تكون موجودة على طول وخصوصا انك حبيبي من زمان .
ربنا يروق مودك كده ويبعد عنك كل شيء وحش يارب.
انا هابقى انزل ابص بصة كده على الكاسيتات والسماعات . هاعمل جولة يعني واشوف ايه الاخبار وابقى اقولك .

المشاركة الأصلية كتبت بواسطة _ahmed_casper_

٦٥٠‏ جنيه ساعه تابلوه ينهااااااار امال التابلوه كله بكااااااااام :ob_mak1[1]:

تهريج والله يا ابوحميد
طيب اقولك على حاجة كمان
هو انا اعتقد ان في حاجة حصلت عندي في المنطقة بتاعة الساعة دي . زي قفلة مثلا
لان عندي الزرار بتاع الانتظار في اللمبة بتاعته اللى بتنور دي على شكل مثلث اتحرقت . يعني الزرار مش بينور .
قولتله انا عايز اغير اللمبة اللى جوه الزرار دي . قولت يعني اكيد هايغيروها من غير ماياخدوا مني فلوس اصلا .
دي لمبة يعني بـ 25 قرش . لقيته بيقولى لا والله ده الزرار كله على بعضه هايتغير وده ثمنه 180 جنيه . قولتله لا يا عم الزرار شغال وزي الفل وانا مش عايزه ينور انا بحب التابلوه يكون مضلم كده احسن كفاية نورك .

بص هو التوكيلات دي بتكسب مكاسب رهيبة اولا في ثمن العربية يعني في الجيتز دي مثلا هو كسبان في عربية اعتقد يعني حوالى 15000 مثلا وبعدين قطع الغيار بقى دي هو بيكسب فيها اضعاف مضاعفة .
اصل مافيش حد هايدفع ملايين عشان ياخد توكيل عربية غير لما يبقى عارف انه هايكسب قدهم مرتين تلاتة .

المشاركة الأصلية كتبت بواسطة _ahmed_casper_

( madaهات الكاسيت بونير ممتاز صوت و جوده و هييش معاك انا كنت جايب بيونير فى العربيه اللادا القديمه فضل كتيييير زى ماهو و خرجه جميل و كان ب ٥٥٠ جنيه تقريبا)

الكاسيتات بتاعة زمان دي لا تعوض يا استاذ احمد والله . دلوقتي اللى موجود كله مضروب وبلاستيك من جوه والتروس مصنوعه من ارخص خامات البلاستيك . بس انا هابص على البيونير برضه واشوف كده وربنا يسهل .
شكرا يا باشا