الموضوع: Getz Club

المشاركة الأصلية كتبت بواسطة salah_86

السلام عليكم
ياجماعة انا معايا عربية لانسر بس من شهرين اشتريت جيتز كمان موديل 2005 بحالة الزيرو هيا كملت ال50000 معايا كنت جيبت من التوكيل سير كاتينة وبلية كاتينة وفلتر الزيت وفلتر البنزين والبوجيهات فى حاجة تانية بتتغير عند ال50000 وايه رائيكم فى توكيل غبور

اولا اهلا بيك معانا ومبروك العربية الجديدة .
ثانيا انت بتقول انك جبت من غبور وده معناه انك ركبت الحاجات دي هناك ,,,,,,,,, ولا ايه ؟؟؟؟
لو انت ركبت الحاجات دي عند غبور يعني اكيد انت عملت صيانة الـ 50000 واكيد مافيش حاجة ناقصة لان لو في حاجة ناقصة كانوا هما قالولك عليها .
اما لو انت اشتريت بس وهاتركب بره فمش هايبقى ناقص غير انك تغير فلتر الهوا والبنزين وتربط العفشة وترجلش الفرامل وتبص على زيت الفرامل ومياه الرداياتير .
وعايز اقولك على معلومة ان طقم السيور في الجيتز بيتغير كل 60000 كيلو بس طبعا انت قولت اغير عشان العربية مكنتش معاك من الزيرو .
بالنسبة لتوكيل غبور هو كويس في حاجات ومش كويس في حاجات .
وبما انك خرجت من الضمان فاحنا هنا في getz club عندنا التوكيل بتاعنا الخاص بينا , لو عايز قولي في رسالة خاصة وانا هاظبطك .

قطع غيار قديمة للبيع
عندي بعض قطع الغيار ممكن ابيعها وطبعا ينفع استخدامها
1- طرمبة البنزين ( قلب الطرمبة )
انا كان عندي عيب في العربية وروحت مركز خدمة واقنعني ان العيب طرمبة البنزين وللاسف اشتريت الطرمبة من غبور ( الاصلية ) بـ 900 جنيه ومطلعش العيب عيب طرمبة وطلع حساس الكرنك .
فاصبح عندي طرمبة البنزين الاصلية اللى كانت في العربية وجاية معاها وهي زيرو سليمة وزي الفل .
ودي صورة العلبة اللى انا اشتريتها من غبور وصورة الطرمبة اللى كانت راكبة في العربية .




ممكن ابيعها بـ 500 وفترة اختبار لمدة شهر لو حصل حاجة خلال شهر ممكن ترجعها وتاخد فلوسك . ( بس ان شاء الله مش هايحصل حاجة لانها سليمة )

2- كف المرآة اليمين والمكنة ( مانيوال )
كانت المراية اليمين اتكسرت واضطريت اغيرها كلها عشان الشاسيه اتكسر لكن الكف بتاعها سليم واصلي .


لو حد محتاج الكف او المكنة كلها سليمة بالدراع الداخلي اللى بيحرك المراية .
بس بصراحة انا مش عارف احدد السعر
انا اشتريت المرايا جديدة من غبور كوري اصلي بـ 425 جنيه وواحد صحبي معاه النترا اتسرق منه الكفين بتوع المرايات وراح جاب الواحد من غبور بـ 200 . لو حد شايف سعر مناسب يقول ومش هانختلف .

3- كاسيت رود ستار شرايط وده اللى كان نازل مع العربية .






الكاسيت حالته جيدة جدا وكل حاجة في شغالة والكاسيت شغال بكفاءة
كاسيت قلاب اوتوماتيك - LOUD - BASS - treble - راديو FM , am
ممكن ابيعه بـ 200 جنيه


4- دي بقى حاجة للي عايز خردة
قواعد موتور ( القاعدة الكبيرة اللى تحت الكاتينة + الشداد اللى بيكون اسفل الموتور ) وهما للامانة بايظين وكانوا عاملين رجة في الموتور وبرضه معرفش اسعرهم ازاي .
دي القاعدة الكبيرة


وده الشداد


طبعا كل الحاجات دي خاصة بالعربية الهيونداي الجيتز لكن طرمبة البنزين تنفع للفيرنا والالنترا ( والله اعلم )
ياريت لو حد عنده حاجات كده يعرضها برضه لعلها تنفع ناس تانيين ويعم الخير علينا

المشاركة الأصلية كتبت بواسطة micom

انا فعلا عاوز حاجات في العربية وممكن تكون مستعملة. بس أنا عاوز صدر + فانوس أمامي يمين + شبكة أمامي . أصل أنا بعيد عنكم عملت حادثة. يا ريت لو تساعدوني ألاقي الحاجات دي

اولا قدر الله وما شاء فعل وحمد الله على سلامتك
ثانيا انا هافترض ان عربيتك جيتز لان مش واضح الماركة ايه في البروفايل بتاعك . وفي الحالة دي محتاج اعرف الموديل لان على اساه هاقدر افيدك .
لو الشكل القديم اللى هو قبل 2005 هاتلاقي قطع الغيار استيراد في الحرفيين او بورسعيد بسهولة لان كل تجار الاستيراد بيجيبوا الشكل القديم على اعتبار انه ارخص وهي هي نفس العربية لكن اللى بيختلف الفوانيس والشبكة والتابلوه .
لو عربيتك الشكل الجديد في واحد في الحرفيين عنده عربيه واحدة استيراد وهو الوحيد اللى عنده الشكل الجديد وعنوانه الحرفييين - شارع المرسيدس لكن للاسف مش فاكر اسم المحل ايه .
غير كده تقدر تلف لفة على محلات قطع الغيار بتاعة هيونداي في شارع دمشق وجسر السويس ولو مكانش يبقى مافيش قدام غير غبور .
هو اكيد هايبقى غالي لكن الحاجات اللى هاتجيبها هاترجع العربية زي الاول .
اتمني انك تلاقي حاجتك بسهولة ويارب اكون قدرت افيدك واهلا بيك معانا ولو في اي استفسار احنا موجودين في وقت .

المشاركة الأصلية كتبت بواسطة micom

أولا ... شكرا على الاهتمام
ثانيا ... انا عربيتي hyundai getz 2010
انا فعلا سألت في غبور باشا وقالي التالي:
الفانوس : 900 جنيه
الصدر : 1350 جنيه
الشبكة : 180 جنيه

سألت بره عند واحد معرفة شغال في مركز صيانة وقالي:
الفانوس :650 جنيه
الصدر : 950 جنيه

بس انا مش عارف اذا كان الاسعار كويسة ولا لأ عشان كدة عاوز أسأل عند كذا واحد

لو اسعار غبور دي بالتركيب فانا انصح بغبور على الاقل هاتبقى ضامن ان الحاجة دي اصلي اصلي .
وبرضه استمر في البحث وخد بالك ان في فرق بين قطع الغيار بتاعة الوكيل وقطع الغيار الكوري .
يعني في السوق ع-هاتلاقي قطع غيار هيونداي يقولك دي كوري بس للاسف دي متصنعه في مصنع في كوريا غير مصنع هيونداي وبيكون خاماته اقل جودة شوية من حاجات هيونداي الاصلية .

الله ينور يا مادا بيه
كده الشغل وأحييك على افكارك الجديدة دائما
انت بترفع الصور ازاى يا مادا بيه؟
شكرا لمجهوداتك فى المنتدى

المشاركة الأصلية كتبت بواسطة mayki4u

الله ينور يا مادا بيه
كده الشغل وأحييك على افكارك الجديدة دائما
انت بترفع الصور ازاى يا مادا بيه؟
شكرا لمجهوداتك فى المنتدى

يا باشا افكاري الجديدة استوحتها من تعليقك اللى فات وده بيثبت فعلا اننا كلنا بنكمل بعض ولازم نتشارك وان شاء الله الفايدة هاتعم .
بالنسبة لرفع الصور يا باشا حاول تركز معايا
في موقع لرفع الصور وهو http://my.imageshack.us/
هاتعمل حساب باسمك مجانا وتبدأ بتحميل الصور بتاعتك على الموقع ده ودي سهلة ان شاء الله .
ثانيا لما تحب ترفع الصورة على الموقع هنا هاتفتح صفحة ( رد سريع او اقتباس او اي كان المهم انك هاتكتب تعليق ) هاتلاقي في شريط الادوات مربع صغير مرسوم عليه جبلين ووراهم شمس . لما هاتقف بالماوس عليه هايظهر وظيفة المربع ده وهو ( ادراج صورة ) . لما هاتدوس عليه هايطلع مربع صغير وفيه خانة فاضية مكتوب فيها برجاء ادخال رابط الصورة . منين تجيب رابط الصورة ؟؟؟؟؟؟؟؟؟؟؟؟
هاترجع للموقع اللى انت رافع عليه الصورة . هاتلاقي جنب الصورة ايقون كده على شكل ( i) او بمعني information عن الصورة . لما هاتدوس عليه هايظهر كل بيانات الصورة وهاتلاقي حاجة اسمها direct link
هاتاخد الرابط ده وتنسخه في المربع بتاع نايل موتورز هاتلاقي الصورة نزلت في الموضوع اللى انت بتكبته .
نلخص بقى الموضوع :
1- رفع الصور على موقع الصور .
2- ناخد ال direct link وننسخه في مربع ادراج الصورة في شريط ادوات نايل موتورز .

يارب اكون بعرف اشرح لاني عمرى ماتخيلت نفسي ينفع اشتغل مدرس
لو في اي حاجة مش واضحة قول يا بوب وانا معاك لغاية لما اشوف عربيتك شكلها ايه
وياريت تفاجأني والاقي صورة مرفوعة

المشاركة الأصلية كتبت بواسطة lost2008

انا معايا فرنا 2009 عاملة 20000 كيلو, طبعا الموتور واحد عندى و عندكو, انا غيرت فلتر البنزين و فلتر الهوا و بالمرة ميه الرادياتير بس غيرتهم بنفسى , المهم انا شايف البوجيهات كويسة و ممكن تكمل كمان شوية " سحب العربية كويس + استهلاك بنزين كويس" ايه رايكو اسيبهم شوية؟

اهلا بيك معانا يا باشا
برافو عليك ان انت غيرت الحاجات دي مع نفسك . بس انت ايه اخبار الضمان معاك؟؟؟؟
بالنسبة للبوجيهات انا شايف ان انت تغيرهم لو عملت بيهم 20 الف كيلو عشان تفضل دايرة الكهرباء سليمة واداء الموتور يفضل كويس وخصوصا ان احنا داخلين على الشتاء واكيد البوجيهات اللى عندك في ايامهم الاخيرة .