الموضوع: نيفا و شركة الأمل

المشاركة الأصلية كتبت بواسطة TheDieSeL

لو حضرتك تعرف تنزل الاسكندرية خلال الاسبوع ده هانزل معاك للتوكيل عالصحراوي خدمة فوق الممتاز وكل الناس بتشكر فيهم من القاهرة لمطروح بييجوا لفرع الاسكندرية الرئيسي عالصحراوي .... انا باتكلم بجد على فكرة مش عزومة مراكبية .. تليفوني وايميلي موجودين عالموقع هنا

و ان شاء الله تتحل المشكلة وتروق كده ..... وعلى فكرة برضه توكيل الأمل في القاهرة سيئ جدا جدا جدا جدا بشهادة كل القاهروية في المنتدى .... و ان شاء الله المشكلة تتحل و عندي اعتقاد انهم مش عاوزين يصلحوها لحد ما تمشي الف كيلو كمان يعني تعدي الــ 10000 وتطلع برة الضمان ... لو حضرتك فعلا على استعداد لزيارة الاسكندرية الأسبوع ده قولي وانا هابقى مع حضرتك ... وماتسيبش حقك انت لسه فالضمان ماتصلحش برة الضمان غصب عنهم يصلحوها دي لسه فالضمان ولو الموضوع اتعقد جهاز حماية المستهلك هيقوم بالواجب معاهم

و الله إنت راجل جدع و شهم و أصيل و إن شاء الله لما آجى إسنكدرية حا ظبط معاك و أقابلك و نقضى يوم سوا بإذن الله.

و لله الحمد ربنا رؤوف و أكرم الأكرمين و أرحم الراحمين , ربنا كرمنى و رحمنى و حررنى من سجن و أسر الضمان و التوكيل.

شوف يا أخى أن و لله الحمد و الفضل و المنة و بالتوكل على الله و حده لا شريك له , ربنا يسر لى واحد زميل فى الشغل يعرف ميكانيكى صاحبه متخصص لادا.

رحنا له إمبارح , و فك الكرونة الأمامية و غير جوان الكارتيرة كان نوعه وحش و جابه فل على كاوتش و ظبط ماستر الفرامل عشان الفرامل الأمامية كانت محملة بزيادة على الطنابير , فظبتها الحمد لله رب العالمين.
و فيه كمان جلدة إسمها جلدة أولسيل أو أويل سيل محتاجة تتغير فادى حا أغيرها فى يوم تانى بإذن الله لأنها لازم يتفك الفتيس و ينزل.

المهم بقه المفاجئة الكبرى , من يوم ما جبت العربية قلتلهم حطولى زيت 10,000 كم عشان أنا , ما أنا ناصح بقى , لما آجى أغيره على 5,000 كم يبقى الموتور يرتاح , ناصح عمركوا شفتوا حد فى نصاحتى يا ريتنى ذاكرت فى ثانوى و دخلت هندسة على النصاحة اللى بتشر منى دية , قوم إيه يا واد يا سليمان يا غانم فى مسلسل ليالى الحلمية قالك إيه , لما الولد الصنايعى بتاع الراجل جه ينزل الزيت صاحبى قاله حط الزيت فى جردل نضيف عشان نرجعه تانى الموتور دا زيت 10,000 كم , الولد نزل الزيت و قالى بالحرف , زيت إيه يا بيه اللى إنت عايز ترجعه دا الزيت محروق , فا قلت له خلاص مش إشكال نغير الزيت المهم رحت جيبت زيت شل هيليكس ألترا 10,000 , قالولى أحسن من موبيل للمواتير , الله أعلم أنا باجرب , و حطينا الزيت , فكرت كدة بعد ما حطو الزيت و جبت الولد و قررته و قلت له يابنى أنا حا أسألك سؤال لو عارف الإجابة جاوب لو مش فاهم السؤال أعيده عشان أنا حاسس بحاجة كدة , إنت الزيت اللى فضيته إمبارح دوة هل هو زيت 10,000 كم ماشى 3,000 كم , قالى يا بيه الزيت محروق , طبعا إنتم دلوقتى عرفتوا ليه أنا قلت أنا كنت فاكر نفسى ناصح , لأن طلع إن فيه ناس أنصح منى , بس صاحبى قاللى بلاش نظلمهم و نستنى كمان 3,000 كم و نشوف , المهم الى خلانى أسأل الولد السؤال دوة إن أنا لما نزلت النهاردة الصبح أشوف الزيت و بشد قياس الزيت إتخضيت إفتكرت الزيت و قع من العربية , أتارى إن زيت ال 10,000 كم شفاف زى القزاز و مالوش لون!!!!!

و بعد ما خلصت مع الميكانيكى قلت له عايزك تشوفلى زيت الكورونة مظبوط و لا محتاج يتزود , المهم الولد فك الطبة و كشف و قالى مظبوط و بلم كدة و قالى الزيت محروق , شم كدة لقيت رحتة صدأ , الراجل الميكانيكى بصلى و قالى إيه الزيوت المعفنة دية , بالمناسبة الميكانيكى دوة فاتح فى غيط و لما رحت أجيب الزيوت من واحد فى الغيط اللى جنبه لقيت عنده زيوت إسسو و موبيل.

المهم اتفقت مع الميكانيكى إن شاء الله إنه يغير زيوت الكرونات و الفتيس و قاللى أجيب زيت موبيل فالفالين 4 لتر و إن شاء الله كله يبقى تمام.

إلى الأستاذ عماد حبيب /
أرجوك ما تزعلش منى أنا إن كنت بأقول المواقف دية فهى للعلم بالنسبة لك و للشركة لمعالجة الموقف و لزملائى فى المنتدى الذين أخاف عليهم أن تكلبش الفرامل أو الكورونة أو الفتيس و هم على سرعة مما قد يودى بحياتهم فى حادث لاقدر الله , و أشهد الله أنى لا أريد تشويه سمعة الشركة أو أى من هذا القبيل و أنا بعد ما الميكانيكى ما طمئنى , الحمد لله رب العالمين , رجعت تانى لوجهة نظرى فى إن اللادا سيارة فى متناول الأسر محدودة الدخل و عملية جدا بالنسبة لهم فى بلدنا.
و أرجو منك أن تطمئن كل الإطمئنان أنا توكلت على الله و اعتبرت نفسى اشتريت العربية دية خارج الضمان و سأتعايش معها فهى رزقى و نصيبى الذى أرجو من الله أن يبارك لى فيه و الله المستعان و عايز حضرتك تطمئن بأمانة أنا بإذن الله لا أنوى لا أروح لا لحماية مستهلك و لا أقدم شكاوى و لا غيره , الحمد لله على ستره علينا و حمايته لنا جميعا من كل مكروه , بس أنا فعلا أكرر طلبى لك ياريت تهتموا بالناس اللى بيشتروا العربية على الأقل الغلابة منهم اللى ما يعرفوش ميكانيكية , تصدق بالله أنا شفت شابه فى العشرينات و رجالة على المعاش و واحدة ست جايباها لإبنها اللى ماكملش العشرين سنة لسه و جايه معاه تتفسح فى يوم الصيانة كلهم جايين فرحانيين يصلحوا عربياتهم اللى على قد حالهم عندكوا فى التوكيل أنا أرجوا منك إنك تهتم بأرواحهم و بحياتهم قبل ممتلكاتهم لأنهم فعلا غلابة و لا يعرفوا كيفية إكتشاف أعطال السيارات أو حتى المجادلة لإثبات وجهة النظر , إذا اهتممت بهؤلاء و راعيتهم صدقنى سأكون مسامح أمام الله كل السماح فى حقى و أعتبره وصل إلى و زيادة.

قال رسول الله صلى الله عليه وسلم , رحم الله عبدا سمحا إذا باع سمحا إذا اشترى سمحا إذا اقتضى
الراوي: جابر بن عبدالله المحدث: الألباني - المصدر: صحيح ابن ماجه - الصفحة أو الرقم: 1804
خلاصة حكم المحدث: صحيح
ط§ظ„ط¯ط±ط± ط§ظ„ط³ظ†ظٹط©