الموضوع: يا جماعه خلي بالكو من تقارير واسعار الصيانه في مركز السبع

المشاركة الأصلية كتبت بواسطة ahmed.tv

-لو حد فينا معاه عربية لسه فى الضمان , مفروض يروح فين يا جماعة , يروح ورشة ميكانيكى عادى ويضيع الضمان منه !!

كل الناس اجمعت انهم بعد نهاية الضمان هيروحو بره التوكيل لأن مافيش حد عايز يخسر الضمان والموضوع دا معمول للناس اللي فترة ضمانهم خلصت او مافيش ليهم ضمان وبيفضلوا يتعاملو مع التوكيل وبكدا يكون التوكيل برده خسر العملاء دول


-التوكيل فى اى ماركة سيارة عموما معروف جدااا ان اسعارهم واسعار قطع الغيار غالية جدا عندهم عشان بتاخد الاصلى منها وكمان بيكون لسه فى ضريبة على الحاجات اللى بتشتريها من عندهم

معروف ان التوكيل اسعاره اغلى من اي مكان ومفيش اي حد معترض على الاسعار او الضريبه كل الاسعار اللي تم ذكرها كانت من باب المعرفه ما عدا كاوتشة التراب هي اللي مبالغ في سعرها ودي اللي كان فيها نقض


وغير كدا بتاخد ضمان على القطعة اللى بتركبها فوق ضمان السيارة وبتاخد حاجة جديدة واصلية

الضمان بيكون في حالة طلب العميل وبيكون من اسبوع الى شهر كحد اقصى ومما لاشك فيه انها حاجه جديده والمفترض تكون اصليه


-انا واحد من الناس يوم ما اخرج من الضمان مش حروح كل الوقت التوكيل الا كل فترة عشان اظبط العربية على الكمبيوتر , واشترى قطع غيار اصلية من عندهم

دي حاجه ترجع لحضرتك تروح التوكيل ولا اي مكان تاني بس واضح من كلامك انك مش هتروح التوكيل غير نادراً وبكدا هيكونو خسروا عميل محترم زي حضرتك
وبالنسبه لضبط العربيه على الكمبيوتر دا اللي انا طلبته ومتعملش معايا وماشوفتش عندهم اي كمبيوتر


-ولو مش قادر يبقا غلطتى انى اروح لهم , والمفروض من الاول اطلع على الحرفين او بورسعيد واشترى استعمال من هناك

موضوع القدره الماليه مش جميل ان احنا نتكلم فيها هو المفترض ان كل الناس اللي بتتكلم قادره انها تدفع بس شايفه ان المبالغ دي كتيره ومبالغ فيها والدليل على كدا المهندس مدير الصيانه قالي دي لو عربيتي انا هروح اشتري الحاجات اللي العربيه محتجاها استعمال من برا بسعر اقل بكتير وهاخد عليها فتره للتجربه ولو الحاجه مش عجباني ممكن ترجع وقالي ان بيكون في الغالب خلال شهر يعني الراجل متفق معانا

لان معروف زى ما قولت الاسعار غالية لانها جديدة واصلى

الاسعار مختلفه الحاجات اللي بتطلب كتير اسعارها مش غاليه معقوله لحد ما اما الحاجات النادر طلبها سعرها غالي والدليل ان مجموعة الدبرياج سعرها نزل من 1700 جنيه الي 900 جنيه مره واحده ودا لأن في مشكله في النيسان في مجموعة الدبرياج بتاعته وبتبان اوي بعد 120 الف كم ولما بدأت تظهر كتير التكلفه نزلت
لو كلامي غلط في النقطه دي يبقى السعر نزل علشان هما جابو حاجات ارخص وبالتالي كفاءه اقل ومش اصلي ودا مش مفترض منهم


-غير كدا الفنيين ماشين بالكتالوج ,بيقولك غير فلتر هوا 20 الف او 30 الف ,يبقا يتغير ويخليك تشترى واحد تانى , مع انه ممكن يتنظف , ويركب تانى , وبعدين انت ممكن تقولهم لا متركبوش لانهم بيسالولك

كلام جميل بس الكتالوج مش مكتوب فيه بعد 150 الف كم غير شكمان كامل وغير قواعد موتور كامله اصل تقريبا فيهم واحده مقطوعه بالرغم ان مافيش اي مشاكل او تاثير بشهادة كل الناس
تاني حاجه لو هما ماشيين من الكتالوج يزودو مياه الراديتير مياه عاديه ليه بالرغم ان الراديتير فيه مياه خضراء ومكتوب في الكتالوج يفضل استخدام مياه مضاده للصدا ودا اللي حصل ما احد الاعضاء وقال الكلام دا في مشاركه ليه في الموضوع دا


-مراكز خدمة كبيرة جدا زى فولكس وبى ام ومرسيدس وكيا وهيونداى وشفورليه ,وابو غالى مالين اخطاء كتيرة جدااا , ووارد الخطا فى اى مكان

كلام مظبوط وفي حالة الاخطاء بنقول في غلط علشان ما يتعملش تاني وبنعرف الناس علشان الغلط ما يتكررش تاني معاهم ويكونو عارفين

وورارد الخطا عند اى مكيانيكى بره التوكيل بردوا وحتتسوح عندهم وتقلب بخناقة كبيرة وضرب بمفكات وكواريك كمان

كلامك مظبوط الغلط وارد من اي عنصر بشري وعلشان ما نعملش خناقه ونضرب بعض بنفضل نروح مكان محترم وبنطلب منه زي ما هو بيعاملنا كويس كمان تكون باقي الحاجت اللي عنده كويسه


-والناس زى ما بيشتكوا قى السبع فى ناس كتير بتشكر , زى اللى بردوا مش عاجبه مودرن وعاجبه يونايتد وزى بردوا اللى بيزم فى يوناتيد وبيشكر فى ابو غالى وفى الاخر ابو غالى اتسحب منه توكيل نيسان

كل المشاركات اللي اشتكت من السبع قالت في آخر المشاركه ان هو افضل توكيل لنيسان في مصر واعتقد ان مافيش لازمه لذكر ناس تانيه ونقول ان هما وحشين كل المشاركات كانت بتقيم الجوده بدون ذكراسماء ما عدا اسم السبع لأن الكلام كان عليه من حيث النقض ومن حيث انه برغم النقض افضل توكيل لنيسان في مصر والغرض من النقض انه يتحسن في النقط اللي تم ذكرها اللي زعلت الناس منه علشان يستمرو معاه بعد نهاية فترة الضمان


-وبخصوص انهم مش عندهم اجهزة , خالينا نسال بعض , الناس اللى عندهم عربيات مورانو وانفيتنى جوة عندهم فى الورشة وبيصلحوا فيها هل دول معندهمش اجهزة ومش فنيين محترفين ؟!

لو هما عندهم اجهزه ماستعملوهاش معايا ليه او مع احد الاعضاء اللي شارك في الموضوع وقال ان عنده مشكله في الموتور وماتمش حل المشكله ليه ورجع ليهم اكتر من مره ولم يتم حل المشكله
لكن لو فيه عندهم اجهزه يبقى حاجه من اتنين الاول هي بتطلع لناس وناس لأ او هي مخصصه لموديلات تانيه غير الصني وفي الحالتين دا عذر اقبح من ذنب
وسبب معرفتي ان العربيه ماتمش الكشف عليها باي جهاز اني كنت موجود جوه الورشه وواقف بتكلم مع المهندس وقت الكشف على الموتور وقبل كدا كنت شايف العربيه من فوق من الفاتحه الزجاج الموجوده في الاستراحه


المركز صغير وعليه ضغط شغل كبير , والحمد لله 20 % فقط بيشتكوا والباقى بيخرجوا مبسوطين , وعلى العلم فى مودرن بيستعبوا اكبر منهم والناس بيخرجوا كتير يشتكوا

لو المركز صغير وعليه ضغط يبقى المفروض التنسيق في حجز العملاء واعتقد دا اللي بيحصل وبالرغم من كدا فيه شكاوي ولو نسبتها 20% فقط نحاول نحل المشاكل دي علشان نقلل النسبه ولو هما نجحوا وفعلا دا حصل يبقى المفروض انه يتوسع علشان يستوعب الزياده في عدد العملاء الخاصين به

فالسبع لو قدروا يتوسعوا حيكون ليهم شان كبير

نتمنى ذلك لان احنا المستفيدين من ذلك اكترمن اي حد تاني


-مش معنى ان حد حصل معاه مشكلة عند اى مركز يبقا المركز ده حيقفل لان وارد الخطا زى ما قولنا عند اى حد , الا لو كل الناس بتشتكى فى المركز ده , يبقا نيسان حتسحب منه التوكيل زى ما حصل مع ابو غالى لان بيجى تقرير لنيسان باللى بيحصل وعارفين بكل ده

ما حدش طلب انه يقفل بالعكس احنا بنقول انه احسن واحد وبنطالب بحل مشاكل معينه علشان تكون كفائته 100% مش اقل لان ممكن تكون الكفائه 80% وبرده هو احسن واحد علشان مفيش حد اكتر من كدا


و-كمان فى لجان تفتيش من اليابان بتزور مراكز الخدمة دى كلها وبيتابعوا وبيكون فى جرد ,وكل ده انا شوفته بعينى

حاجه جميله جدا وانا سمعت الكلام دا برده من احد العملاء هناك اتعرفت عليه واحنا بنقول المشاكل اللي شوفناها علشان تتحل كمان


فمش معمول حيسبوهم يشتغلوا بايدهم فى مراكز الخدمة من غير اجهزة وكمبيوترات , ولا ايه يا جماعة !!

كلامك منطقي يبقى هي بتطلع لناس وناس لأ والدليل ما حدث معي ومع احد الأفراد المشاركين وعدم تأكدك من وجود الاجهزه لعدم رؤيتك ليها او سماعك ان فيه حد استعملها وانك بتستدل على وجودها بالمنطق مش بدليل مادي


-وبخصوص الحجز وكل حاجة مرتبة عندهم وكلوا بيدخل فى مواعيده , احيانا فى ناس بتيجى من سفر ومش حاجزين ومش قادرين يسكفوا حد , وحتى انا كمان لما ببعت حد من نايل موتورز ومش حاجز بيدخلوه , ده غير الشغل الموجود عندهم من الشركات واللى بيبعته المصنع ليهم عشان يصلحوه

كله بيدخل في مواعيده فعلا بس لو هيجاملو الناس اللي مش حاجزه او احد المعارف زي حضرتك على حساب التقصير في الشغل والمشاكل والشكاوي اللي حصلت يبقى تصرف غلط طبعا وبنطالب بتصحيحه اما بخصوص الشركات اعتقد انها بتحجز برده ولا اعتقد ان يكون المصنع بيبعتلهم حاجه يصلحوها لأن هما اللي بيلجؤا للمصنع في الحالات الصعبه ودا سمعته من اكتر من عضو في مشاركات اخرى مختلفه

انت بس شايفين اللى حاجز والظاهر فقط

لأ احنا شايفين ان عندنا مشاكل وكان الرد اصل احنا عندنا ضغط ومش قادرين اننا نهتم بكل حاجه وكان ردنا عن طريق الحجز انت تقدر تظبط موضوع الضغط اللي عامل المشاكل دي او تحل مشكلتك بالاسلوب اللي يتناسب معاك المهم في الآخر ميكونش في مشاكل عندك او عند اي عميل تاني حاجه احنا بنشوف الناس اللي حاجزه فقط علشان بيكونو متواجدين معانا في نفس الاستراحه وبما ان الناس اللي مش حاجزه ليها استراحه منفصله اعتقد ان مش من حقهم انهم ياخدوا من وقتنا ومن الشغل اللي بيتعمل عندنا او الاهتمام بينا


-وبعدين بخصوص الخصم , فى كمان واحد ركب فوجات وكان حيخدوا 220 وعملوا خصم ودفع 120 جنيه , فده خصم كبير

بالنسبه للخصم هل كان فيه غلط زي ماحصل معايا وكانوا عايزين 500 ونزلت لـ 100 لأن دا خصم اكبر ولا الخصم دا بيكون لناس معينه او ي حالات معينه فقط واتمنى ان كل الاعضاء تعرفها علشان تقدر تحصل على الخصم دا ولا دا سعر جديد للفوجات بدل 220 اصبح 120 ارجو التوضيح لأن لو دا السعر ناس كتير جدا هتروح تركب فوجات عندهم بس انا مش منهم لأن عربيتي فيها فوجات


-ففى النهاية احنا مش بنبرر , والصورة دى عامة فى كل التوكيلات السيارات فىى مصر

كلامك صح بس مش معنى كدا ان احنا نسكت ونقول هو دا الحال في مصر لازم نوضح ان فيه غلط علشان نحاول نحله ونوصل للافضل


يمكن بس افضلهم السبع ومراكز خدمة نيسان , لان لو لسه مشكلتك متحلتش يهتم ويجيبك تانى عشان يحلها

فعلا ناس كتير قالت الكلام دا وفيهم مشكلته اتحلت وفيهم لأ واللي مشكلته ماتحلتش قالولو انت مش عارف هي كدا كويسه ودا عرفته من خلال المواضيع المختلفه اللي موجوده في المنتدى هنا


وباذن الله يكون فى توسع اكتر لمراكز خدمة نيسان , لان السيارة بقا عليها طلب كبير

نتمنى ذلك وارجو من حضرتك بما انك ليك اتصال بيهم او بعض الاصدقاء بالداخل عرض مشاكلنا عليهم للاهتمام بها وحلها والجواب علينا في بعض اسئلتنا واستفسترتنا


تحياتى

وفي النهايه متشكر جدا على ردك واهتمامك بالموضوع