[mark=#fffbcc]
هو فعلا مركز محترم.. عارف ليه؟ لأنه بيقدم خدمة معقولة ومعاملة ممتازة.. بقية مراكز نيسان خدمة معقولة برضه.. ومعاملة سيئة (أقصد طريقة الكلام والمواعيد والاهتمام) ولو طلعت برة النيسان .. هاتلاقي معظم التوكيلات بتقدم خدمة تتراوح من سيئة إلى عادية.. ومعاملة من سيئة إلى زفت!
يعني الحقيقة احنا أهل النيسان (أو بالأصح بعضنا) زعلانين من السبع علشان كان عشمنا فيه أفضل من كدة.. وكنا قربنا نشعر إننا بنتعامل مع توكيل بمستوى التوكيلات اللي بنشوفها برة مصر.. لكن زعلنا مش لدرجة الصدمة والإحباط .. أستأذن حضرتك ترجع للموضوع المثبت بعنوان (ما تقييمك لمراكز الخدمة وتوكيلات نيسان) وهاتلاقي تقييمات كتير لمختلف مراكز الخدمة مش بس السبع.. وهاتلاحظ إن الناس كلها بتشكر في السبع والناس كلها برضه ليها ملاحظات كتيرة جدا على بقية مراكز الخدمة..
وبالتالي فإن ملاحظاتنا وتحفظاتنا على السبع مش معناها إنه سيء قوي كدة أو إنه فاشل.. بالعكس.. لازم نعترف إن الضغط الشديد والإقبال عليه كان لابد أن يؤدي إلى تراجع في مستوى الخدمة.. ما ننساش إن زيادة الطلب كان لا زم يقابلها توسع في المساحة والأجهزة والفنيين والمهندسين.. وده اللي مفروض نطلبه من السبع.. يعني مثلاً:
1- بدل ما يبقى فيه اثنين موظفين أو ثلاثة خدمة عملاء يتصلوا بالناس بعد الصيانة علشان معرفة رأيهم.. كان أفضل لو يجيبوا اثنين فنيين أو ثلاثة زيادة لاستيعاب أعداد العملاء والسيارات الزيادة.. وكذلك المهندسين المشرفين على العمل في الورشة..
2- ممكن مثلاً يتم تحديد عدد معين من السيارات يستقبله المركز يومياً .. بحيث يكون توقيت إنهاء الصيانة واقعي وحسب ما يتطلبه العمل.. مش مواعيد مضروبة والناس تتلطع وتتأخر لغاية ما ييجي دورها وبعدين تتلطع تاني لغاية ما الصيانة تتم..
3- ليه مثلاً ما يفكروش يشتغلوا الجمعة؟ ولو بنصف الطاقة أو في مسائل بسيطة زي صيانة الألف كيلو.. والكشف على السيارات فقط.. بحيث يقل العبء عن بقية أيام الأسبوع وفي نفس الوقت يكون عدد العاملين محدود في اليوم ده حتى يمكن تعويض إجازاتهم في بقية الأسبوع..
زي ما قلت في مشاركة سابقة.. مطلوب الاهتمام بخدمة السيارة نفسها خدمة حقيقية وهو ده اللي ها يرضي العميل.. مش إرضاؤه بالكلام الجميل والمعاملة الذوق والعلاقات العامة..
واللي جرب توكيلات تانية يعرف كويس إن السبع برغم الملااحظات هو أفضل مركز خدمة في نيسان.. ومراكز خدمة نيسان من أفضل مراكز الخدمة في مصر.. واللي جرب منصور وغبور عمره ما يزعل من السبع.. بس احنا دايماً بنطلب الأفضل وده حقنا..
[/mark]
المفضلات