الموضوع: زلزال؟ طيب كنت فين في الأولاني؟

انا بقي كنت لسة متجوزة جديد و متحمسة بقس لتنضيف النجف واخدين بالكو و كمان ساكنة في الدور العاشر و تخيلو بقي المراجيح اللي شفتها بس الحمدلله قبلها علي طول كنت بأمسح الألوميتال و فجأة سمعت صوت فرقعة تحت الأرض و طبعا قلت العمارة بتقع زي شعب مصر كلة ما قال المهم نزلت طبعا جري و الناس اللي قصادنا الراجل نازل و مراتة بتندة علية علشان يستناها قام شوحلها بإيدة و نزل جري و بعدين و إحنا في الدور التاني جار لينا عمال يطمئن الناس و يدخلهم عندة فبيقولي إتفضلي يا مدام إستريحي من السلم و مراتة برضة بتقولي ماتخافيش مافيش حاجة قلتلهم هو أنا نازلة من الدور العاشر علشان العمارة تقع علي رأسي هنا لأطبعا ماكنت خليتني فوق علي الأقل كنت هأبقي علي الوش و كل دة وأنا فريرة علي تحت و نزلت ركبت عربيتي و جريت علي بيت ماما و جوزي في الشغل و مافيش موبايلات و لا تليفونات عادية حتي و عايزة أطمن علية و كان يوم . المهم الناس في الشارع قالولي العمارة بتاعتكم كانت بترقص و قلنا إنها هتقع . بس ربنا ستر بس كان فيلم رعب.

انا بقى بموت على نفسى من الضحك لما بفتكر اليوم ده لانى كنت عبيطه بصدق اى حاجه بتتقالى انا كنت ساعتها فى اوله اعدادى وماعرفش يعنى ايه زلزال اصلا ولا سمعت عنه وكنا فى الفسحه وبعدين لقيت صحابى والمدرسه كلها بتجرى وبتسوط ومعرفش ليه فضلت مستغربه وكل همى اجيب شنطتى الجديده من الفصل لان فيها كراريسى الجديده هههه
وبعدين البنات كانت بتقع على السلم على بعض واللى يدوس على التانى فجريت وطلعت بره المدرسه وعيط وبسال فى ايه واحده قالتلى ده وحش كبير اوى بيمشى ويهز الدنيا كلها لو ضربوة بالرصاص على ديله او اى حته فى جسمه بيموت صدقتها وخفت اكتر وفضلت اجرى لقيت تاكسى وقفلى وخدنى وروحنى البيت من غير ماياخد منى فلوس هههه
كان يوم صعب روحت لقيت امى واخواتى الصغيرين بيعيطوا وبابايا كان مسافر وكنا لوحدنا وكنا بنكره الليل يجى اوى وبنخاف ننام وفى النهار بنخرج عشان حالتنا النفسيه
بس الزلزال بتاع اول امبارح ده فعلا واحد اتصل بجوزى وقاله كان فى زلزال قوى الساعه 2 ونصف بليل طيب ليه ماازعوش عنه فى نشره الاخبار وفى حاجه تانيه
انا قريت فى جريده الاهرام او الاخبار مش متذكره ان فى واحده مش فاكره اسمها مى ايه كده بتتنبىء بحدوث زلزال مدمر لمصر ودى اللى اتبئت بقتل الحريرى وبانهيار ابراج امريكا وبحاجه تلته حصلت فعلا بس برده مش فاكراها بس كل اللى تنبئت بيه حصل ربنا يستر على حدوث الزلزال ده

أنا عن نفسى ماكنتش فى مصر وقتها كنت بدرس فى الكويت و ماعرفتش الخبر دا غير من التليفزيون وكنت قلقان جدا على العجلة بتاعتى ليكون حصلها حاجة لو البيت كان وقع :D

أنا عن نفسى بعد ما رجعت مصر تقريبا حصل 3 زلازل عمرى ما حسيت بأى زلزال فيه غير واحد بس حصل قبليه صوت فرقعة