* عفشتها نوعا ما كويسة وبتستحمل يمكن ضعيفة شوية أمام التويوتا مثلا بس مش كلنا بنخش حلبة سباقات فالسيارة على أد الغرض منها ممتازة جدا بس فيها بعض العيوب من وجهة نظرى وبعض العيوب الاخرى اللى جمعتها من مشاكة سيادتكم فى المنتدى :
أولا : العزل فيها مش كويس يعنى لما بقفل الزجاج بسمع الضوضاء الخارجية اللى فى الشارع وصوت الماتور العالى طبعا غير بعض التقفيل اللى مش كويس زى مثلا بعض الناس ومن ضمنهم أنا عندى صوت تكتكة خفيفة من الزجاج الامامى ولقيت كثير من الناس بيشتكوا من عيوب التقفيل هذه .
انا معاك العزل مش ممتاز بس اهو لو ده العيب يبقي مش مشكله
ثانيا : فيها عيب كثير من الناس اشتكوا منه وأولهم أنا إن عند كسر الدريكسيون فى الملفات ويكون الملف فيه مطبات أو مطبات عين القطط بسمع صوت خبطة أو تكة حديد فى الدريكسيون والصوت ده صادر من علبة الدريكسيون وبيسمع فى الطارة نفسها والمهم ان فى التوكيل نفسه قالوا ان الصوت ده طبيعى فى اللانسر البومة وخلونى أجرب عربية تانية لقيت فيها نفس الصوت وعلى فكرة الصوت ده كان عندى فى المكواة وبرده هو هو فى البومة اللى لسة مكملتش 2000 كيلو والغريب ان بعض الناس أسألهم هل الصوت ده مضايقهم يقولون ان الصوت ده مش موجود أصلا مع العلم ان فى شكاوى كتير فى المنتدى عن هذا الصوت والسؤال ازاى شركة عريقة زى متسوبشى عارفة العيب ده ومش بتحاول تحله من موديل 2001 وحتى 2010 . وعلى فكرة انا لقيت الحل للمشكلة وكتبت عنه كتير وهو تغيير قطعة حديد فى علبة الدريكسيون واستبدالها باخرى فايبر .
بص كان عندى صوت زنه مجننانى والتوكيل مش عارف ايه ده لحد ما خليت المهندس يطلع يجربها بنفسه ومعرفش ايه ده والمره التانيه ليا في التوكيل قابلت مهندس تانى طلع جربها اكتشف ان الصوت من الزجاج بتاع الباب اصلي كنت فكيت الفرش اركب وحده رفع لكن عين القطط ده مش مشكله خالص
ثالثا : بعض الناس بتشتكى من الفرامل بس يمكن أنا شايفها نوعا ما كويسة .
لا لا فرامل ايه الفرامل كويسه جدا امال لو شوفت الكورى هتقول ايه
رابعا : العربية ممتازة جدا فى المنحنيات بس ثباتها بعد الـ 120 وحش جدا جدا جدا جدا وده لان الباور بيخف جدا لى السرعات العالية .
بص انا اصلا العربيه بتاعه والدي بس انا بسافر بيها كل اسبوع اسكندريه واقل سرعه مشيت عليها وانا راحع من الطريق الجديد اللي بكارته 150 والسرعه القصوى اللي جيبتها 185 والعربية ممتازه ممتازه لحد 160 وبعد كده خوفت
خامسا : الاوتوماتيك رائع حسب علمى لان عربيتى مانيوال بس عيبه حسب الشكاوى منه ان فى بعض السيارات لما يجيب n أثناء وقوف السيارة الـ rbm بينزل إلى 400 وتترعش السيارة ثم يصعد مرة أخرى وأحيانا بتبطل السيارة .
الموضوع ده محصلش معايا نهائي عمر العربية معطلت ولا بطلت منى نهائي
سادسا : من أشد الاشياء استهلاكا فى السيارة هى قواعد الماتور وكل فترة بتحتاج تغيير مش عارف ليه حتى الاصلى منها .
ولا اعرف حاجه عن المشكله دى لكن عاوز اقولك ان طريق القيادة بتفرق كتير الطلعة العنيفة بتهلك قواعد الماتور بسرعه
سابعا : استهلاك البنزين فيها عالى جدا حتى يمكن الـ 1600 بتعمل حسب علمى 200 كيلو فى الصفيحة وانا بسمع ان السيارات القديمة مثل البيجو مثلا 2000 سى سى بتعمل نفس الرقم .
يا راجل انا بفول لبابا يوم الاحد تخلص يوم الخميس بيروح الشغل بيها كل يوم حوالي 600كيلو بحوالي 45 لتر تقريبا 260 كيلو للصفيحة
ثامنا : الـ 1600 الرياضية حسب علمى أيضا عفشتها ناشفة شوية على الطريق .
مهو هو ده اللي مديها ثبات علي السرعات العاليه
اما انك تختار العشة الناعمه زى الالينترا بس مفيش ثبات
تاسعا : وده عيب تافه شوية ان لما لمبة فى التابلوه بتتحرق وتحاول تجيب غيرها من التوكيل بيكون لونها أصفر يعنى مافيش عليها الطربوش اللى بيدها اللون بتاع التابلوه فيتغير لون الاضاءه يبقى كوكتيل شوية أصفر والباقى نفس اللونز اللى بتزل بيه . وده انا عالجته ايضا وعامل نور التابلوه والتكييف والسى دى والساعة كله احمر زى البى ام والابيزا
اول مره اسمع عن العيب ده معنديش حاجه اتحرقت
10: موديل 2010 البومة غالى 10 الاف جنيه وكل اللى اتغير فى السيارة شكل ولون عدادات السرعة والبنزين والحرارة والـrbm أما التكيف والكاسيت فنفس اللون القديم يعنى بقيت كوكتيل واتغير أيضا شكل طارة الدريكسيون والجنوط فهل هذا يستحق ارتفاع السعر هذا انا شايف انها غالية جدا جدا يعنى ازاى اجيب عربية 1300 سى سى مانيوال بـ 100000 الف جنيه مع العلم ان فى سيارات اخرى منافسة للانسر فى السوق وأعلى أمكانيات ويمكن أقل فى السعر .
العربيه سعرها زايد مش اقل من 50 الف رايي انها تتباع كامله سوبر اكشن ب 80 الف
يا ريت يا جماعة تكتبوا تعليقاتكم على الموضوع وكل واحد موافق على كلامى أو معترض يكتب أيضا واللى شايف ان بعض العيوب اللى ذكرتها موجوده عنده يكتب أيضا واللى عنده عيوب أخرى يكتب حتى نستفيد من فكرة صاحب الموضوع المتميز وانا بشكره على فكرته .
عاوز اقول انو العربيه معايا 3 سنين ومع زميلي في الشغل 5 سنين ومع ابن خالتي سنتين ومع صاحبي 4 سنين والملام اللي انا قولته من واقع تجربتهم وتجربتى العيب اللي انا كارهه في العربية دى
1- صوت العربيه العالي
2- الشكل اللي بقاله 8 سنين زي ماهوه مفيش تطوير ولا اوبشن
3- محتاجه ثبات اكتر بعد 160
المفضلات