اولا اهلا بيك وشكرا على تعليقك الممتاز يا استاذ ناصر :
بس لو تسمح انا ليه تعليق على كلامك انت بتقول ان مشكلة الفتيس كلام مش صح وانا اعارضك فى ذلك لان مش معنى ان عربيتك ربنا يباركلك فيها مفهاش العيب ده يبقى الكلام مش صح بالاخص انى قلت بعض السيارات مقلتش كلها ا بكررها تانى معظم السيارات الاوتوماتيك فيها العيب ده وابن خالى معاه نفس المشكلة ولو عايز تتأكد اسأل فى التوكيل وكام عربية بتشتكى من الموضوع ده .
على فكره انا بقالى 10 سنوات بركب لانسر وحافظها مسمار مسمار طيب انت عارف ان مشكلة علبة الدريكسيون دى كلفتنى فى البداية علشان اتأكد منها واجرب تغيير وتعديل حاجات كتير فى العفشة وعلبة الدريكسيون كام كلفتنى ما يقرب من 9 الاف جنيه بس دى حرية شخصية وانا حابب اجرب تقول عليا اهبل تقول اى حاجة انا كده وفعلا توصلت للحل الامثل وتكلفته حوالى 25 جنيه وفى ناس فى التوكيل عارفين الموضوع ده كويس وكنت متواصل معاهم علطول .
وانا مش من الناس زى حضرتك اللى ممكن يطنش ويقول اخد المطب براحة طيب ما انا بركب التويوتا ومابلقيش العيب ده خالص والكورى كمان ومن رأى ان ده ضعف من التوكيل انه كان على ما اظن لا يخاطب الشركة فى اليابان ويعرفها ان العملاء بيستكوا ده انا قاعدت مع مدير التوكيل فى قليوب وفى جسر السويس وقال ايه كلمنا الشركة وقالت ان ده عادى والعربية للطرق الممهدة طبعا ده كلام فارغ طيب اشمعنى باقى الماركات .
اما موضوع الثبات ربنا يسترها معاك واحب اعرفك حاجة ان السرعة مالهاش كبير وربنا يسترها معاك ومعنا جميعا ولما أقول ان العربية ثباتها مش قوى بعد 120 يبقى ثباتها مش قوى فعلا يمكن حضرتك بتسوق زى باقى الشباب وفاكر ان دى الطريقة الصح وانك متمكن من السيارة .. هاديك مثال الاجانب وهم اعلم بالامر اكثر منا نفسى تشوفهم بيسوقوا ازاى بيبقى احرف منك بكتير ومع ذلك اول ما يركب يربط الحزام ويسرع بالسيارة حسب مقتضيات الطريق والسيارة ولما يلاقى العربية ثباتها بيقل عند سرعة معينة لا يمشى على هذه السرعة مع انه ممكن يتحكم فى السيارة كويس اكتر منك بكتير امال اللى صانع السيارة عامل ليه الانزار عند 120 هو مابيفهمش وكلنا بنفهم احسن منه .ملخص الكلام انى اقصد ان لما السيارة ثباتها بيقل مش معتاه انها خلاص بقيت تكتك ولكن بقول انه يصعب التحكم فيها وده من فرد لاخر دى يا راجل الطرق عندنا بترقص السيارة طيب حاول تجرى على الدائرى 150 مثلا وسيب الدريكسيون كده هتلاقى الدريكسيون بيرقص ويتعرعش يمين وشمال .
ملخص الكلاك العربية الانسر البومة عربية عائلية ممتازة ولكن مع مواصفات التقفيل والماتور والعفشة من وجهة نظرى كان لازم سعرها يبقى حوالى 50 الف جنيه وده من وجهة نظرى طبعا . عايز اقول ان الكمال لله وحده ومفيش عربية مفاهاش عيوب لكن بنقول لابد ان يكون الوكيل قوى ولما تحصل شكوى جماعية لابد من الاخذ فى الاعتبار وحلها حتى لو هيعدل على السيارة يا راجل انا ركبت عربية صينى مع احترامى للصينى لانها عربية ممتازة لاقيت تقفيلها احسن من اللانسر بكتير والله قفلة الباب فيها ملهاش حل كمان قوة ماتورها هتقولى دى فيها عيوب وعفشتها وووو . انا مش بقارن بس بقول ان فى عيوب فى اللانسر موجودة فعلا وحلها سهل وهو انا نكون مع بعض ونطالب التوكيل بحلها وليس تثبيتنا بالكلام .
وعلى فكرة ماتور اللانسر ضعيف مقارنة بسيارات اخرى من نفس السعة اللترية .
وعفشتها لو ناعمة ضعيفة جدا ولو رياضية ناشفة هو فى كده .
ويعنى ايه بتاكل قواعد ماتور ويعنى ايه كل شوية الناس تخرط طنابير ده خلاف اسعار قطع غيارها المبالغ فيها دى يا راجل بقيت اسعار قطع الغيار قريبة من السيارة اللى من وجهة نظرى مالهاش حل الهوندا .
واحتياطا ردا على سؤوالك اللى ممكن تسأله ليه جبتها جبتها يا سيدى علشان هى ارخص اليابانى اللى موجود فى السوق .
المفضلات