الموضوع: الى كل من يطلبون انتهاء التظاهر كفاية لو سمتحو

المشاركة الأصلية كتبت بواسطة dr-mohamed

يا شهدي متدوخنيش وراك اكتب المشاركة في موضوع واحد
والشريف مين وسرور مين كله دلوقت بيشتغل بتعليمات الجيش وعمر سليمان واحمد شفيق وفي حدود ما يضمن انتهاء هذه الفترة الرهيبة ونقل سلمي للسلطة

يا يعني الفترة دي ما ينفعش تعدي
غير في وجود الشريف وسرور ومفيد شهاب رغم ان دول من رؤؤس الفساد وترزية القوانين
دا حت لو غوروهم ممكن كتير هيفكر في حسن نية الفترة المقبلة
ايه المبرر لوجود هؤلاء يا ريت تقولي
على الرغم انهم عارفين انهم مبغضين من الشعب

يا جدعاااااااااااااان الناس ال ضد المتظاهريين كل حججهم جابوها من عملاء التلفزيون المصري مالهومش اي فكر هما اتضحك عليهم ولسة بيضحك عليهم بكلام خااااايب ومالوش اساس من الصحة.. دا طبعا بعد ما قدرو يكرهوهم في كل القنوات الاخبارية العربية علشان يفضل ققاعدين قدام ساعة التنويم قصد التلفزيون المصري الغبي جداااااااا .. الناس لا بتاعت ثورة ولا نيلة ولا عايقدرو اصلا علي حاجة في حالة البلد دي دخلت حرب لقدر الله واول الناس ال هتعد في بيوتها

زي ما ذكرت في مشاركه سابقه بكرر ان اللي اعرفه و يتفق عليه العقلاء , انه لما يكون مطالب شعبيه اتفق انها مطالب مشروعه و تم التعبير عنها من جانب قوي من الشباب الواعي بغض النظر عن الوسيله التي جمعتهم علي هدف واحد المهم انه لولا انها اهداف مشروعه و عادله لم تكن لتتحقق , و يتفق العقلاء ايضا ان تحقق حجم هذه المطالب في زمن وجيز هو مكسب سياسي كبير لمن يعي هذا و انه من ذلك التاريخ ستنمو قوي سياسيه واعيه تستطيع مراقبه اداء الحكومات و اسقاطها ان ارادت , و انه لن يجرؤ اي سياسي مهما بلغ من الذكاء و المهاره علي التلاعب بآمال الشعب مره اخري بعد حدوث ذلك .

لكن ما يحدث الآن هو الخروج و التعدي علي نظام الدوله العام , و محاوله فرض الرأي بالقوه و الاتصال بقوي خارجيه لمحاوله الحصول علي التأييد الخارجي , و تشويه صوره مصر خارجيا , يكفي ان اشرف السعد طالع علي الجزيره و يقوم بتوجيه احد المعتصميين و يقول له عايز تقول ايه للرئيس اوباما عشان يتدخل ؟؟؟!!! ده ينفع؟؟ ده اسمه استقواء خارجي و خيانه الدوله و طبعا كلنا عارفين مين اشرف السعد و مين الشباب اللي كان بيكلمهم في الميدان .

كفي ذلك. لأن السيناريو القادم شيء مرعب لن يتحمله احد , و احب اقول للناس اللي عايزيين مبارك يترك الحكم دلوقتي , انتم نسيتم جورج دبليو بوش لما طلعت مظاهرات مليونيه عديده تريد اسقاطه من الحكم بسبب حرب العراق و انتشار البطاله هل مشي في وقتها و لا مشي في وقت الانتخابات ؟؟؟؟


اعتقد انه من الواضح جدا النوايا الحقيقيه لمن يعتصمون الآن و انهم الآن في مأزق حقيقي , لأنهم ببساطه هم من لا يريدون ان تنفض الجموع من حولهم عشان يتوهوا فيها عملا بمبدأ ( الكثره ستره) , و يريدون ان يضغطوا
بمبدأ سياسه النفس الطويل عملا بورقه محاوله استثاره المزيد من الجموع ممن يتضررون من الوضع الحالي و من توقف حال البلاد و ادي لخسارتهم .

رجاء سرعه ادراك الموقف , و انا بقول ذلك و انا وانا شاب عادي في اواخر العشرين مش راجل كهل و اقسم بالله العلي العظيم اني لا انتمي لأي توجه سياسي او اؤيد افكار حزب ما لاني ببساطه لا احترم اي حزب سياسي في مصر فكلهم هدفهم الزعامات سواء وطني او غيره من الأحزاب و اللي بيحصل دلوقتي هو عباره عن اتفاق و تصفيه حسابات بين جميع احزاب المعارضه المشروعه و الغير مشروعه ضد الوطني ممثلا في مبارك و استغلوا تردي الحاله الاقتصاديه و غياب العداله الاجتماعيه و غباء الشرطه في الكثير من الأحيان في التعامل السليم مع المواقف و خروج جهاز امن الدوله عن اطاره المرسوم له و اصبح يتدخل فيما لا يعنيه مما ادي لرصد الكثير من حالات اختراق القانون و استغلتها قوي المعارضه و بالتنسيق مع القوي الخارجيه و بدعم منها علي شحن جموع الشعب بشتي الوسائل و السبل للحصول علي ما يريدون .

و بالنظر لما خسرته مصر في فتره حظر التجول و الذي يتجاوز المليارات و الذي لم يحلم به الد اعداء مصر و قد قدموه لهم , و هم الآن خائفين من وقت الحساب لأنه ببساطه سيتم محاكمتهم بالقانون العسكري الذي تخضع له البلاد الآن و سيحاكمون كخونه للوطن و لن تقف لمساندتهم اي دوله ممن يلجأون لها .


يجب ان نفيق يا جماعه و ندرك ما حققناه من مكاسب شرعيه , و ان مصر تولد من جديد و ينبغي ان يتم دعمها بكافه الجهود المخلصه للنهوض بها , لان اللي بيحصل دلوقتي ده يعتبر حرب علي مصر تدار بحنكه شديده وبدعم اجهزه مخابرتيه . اتقوا الله يا جماعه و عودوا لدياركم واثقين من انفسكم قادرين علي التغيير حاملين الأمانه و شرف النضال الحقيقي لما آمنتم به و حققتموه بسواعدكم البناءه طامعين في غد افضل و اتركوا الخونه و المندسين ليواجهوا مصيرهم المحتوم .