الحمد لله الجنوط جت، ربنا يقدرنى على الكاوتش

**Hossam_Hassan** · 04-04-2008 10:54 PM

من فترة و انا نفسى اركب جنوط 14 لللانوس و كنت محتار بين الحديد و الاسبور و بعد لف و اسئلة كتير كانت البدائل كالأتى:

- طقم سبور: و سعر الماليزى و الأندونيسى كان بين 1300 - 1500 عند أغلب المحلات زى اشرفكو و محلات شارع احمد سعيد بس كنت مقلق من الجودة و مشاكله فى حالة لاقدر الله اتعوج او اتكسر، يبقى الطقم كله باظ.

- طقم حديد جديد: سعره 800 جنيه بس طبعا شكله مش حلو زى الاسبور انما مفيش خوف من اعتماديته

- طقم اسبور الأصلى: اللى بينزل مع النوبيرا الكورى و بيبقى شكل الطاسات بتاعة النوبيرا وفى نفس الوقت متين، ده لقيت منه فى احمد سعيد و سعره كان 1500 اول كلام و مفصلتش فيه و فى الحرفيين سعره 1000 - 1200

المهم، النهاردة بالصدفة البحتة فايت من عابدين لقيت محل جنوط و كاوتش اسمه (عمرو الجميل) رحت و قفت اسأل عن الجنوط الاسبور قمت لقيت طقم شكله نضيف من الاسبور الأصلى اللى بينزل مع النوبيرا و لما سألت لقيت تمنه 800 جنيه، بصراحة قلقت و طلبت من صاحب المحل انى اجيب حد يبص عليه و فعلا جبت ميكانيكى ثقة من عابدين و قالى الطقم زى الفل، الحمد لله اشتريته و ربنا يكرم و نركبله كاوتش محترم

**إسلام شاهين** · 04-04-2008 11:01 PM

مبروك يا حسام وكان المفروض تنزل صورته

المهم المحل ده اللي في عابدين في الشارع اللي في وشه المحافظة ؟ صح ولا لأ ؟

**Hossam_Hassan** · 04-04-2008 11:03 PM

ان شاء الله اصوره بكره الصبح و ارفع الصورة، عموما هما نفس شكل اغلب طاسات النوبيرا اللى بتبقى ريش عريضة و ريش رفيعة، المحل فى شارع الشيخ ريحان قدام قصر عابدين قبل المطافى

**إسلام شاهين** · 04-04-2008 11:07 PM

أه عرفته المحل ده اسمه ماكسيم في الشارع اللي بيطلعك على شارع بور سعيد وقبليه محل الاكسسوار المشهور قوي تصدق نسيت اسمه ولسه فاتح جديد وفعلا حاجته حلوه

مبروك يا حسام ومستني الصور ضروري