طب أنا كان ليَّ شوية اسئلة وخواطر كده في دماغي لمؤيدي استمرار التظاهرات ومؤيدي البناء وكفاية تحرير كده احنا لينا بيوت وشركة تلمنا.
دلوقتي الثورة أول يوم مكنتش عايزة تسقط مبارك بس تمسكوا بالطلب ده بعد احداث 28 يناير المؤسفة. بعد تطور الاحداث اتغيرت المطالب. وكل الشباب بيقولوا المطالب بتتغير بناء علي الظروف. طب امتي الثورة هترضي عنا. هل بعد حل الحكومة المعينة بالكامل. طب ومجلس الشعب مش هيكونوا عايزين يضمنوا نزاهته بعد كده. طب وانتخبات الرئاسة. ماهو احنا كلنا عارفين إن دوام الحل من المحال والظروف كل يومين بتتغير في الأيام ديه.
طب افرض من ال10 مليون ( أنا كنت بسمع كده رغم إني متأكد إننا كنا 2 مليون بالكتير ) اللي كانوا بينزلوا التحرير فيه 500 ألف بس لسة مش موافقين وعايزين زيادة فورية في الاجور و PlayStation لكل مواطن, مش من حقهم يستمروا في الاعتصام؟ ماهو دول برضه هيملوا ميدان التحرير وهيعملوا خيم؟ طب وبعدين هيكونوا برضه اغلبية وهيقولوا تسقط شرعية كل حاجة؟ طب ليه ميدان التحرير بالذات ليه مش مكان اخر نعبر فيه عن رأينا بدون وقف لعجلة العمل. علي الاقل اللي عايز يشتغل لبلده يكمل والمصلحين يكملوا من غير وقف لحال بعض. ليه الاصرار علي واقف الحال ل كل البلد؟
مش ده برده نوع من أنواع لوي الدراع والبلطجة اللي احنا كلنا رفضناها؟ ولا هما عشان وقفوا حال البلد يبقوا هما الشرعية؟ وكل مليون في البلد يطلع يعمل شرعية.
أنا حاليا مبقتش فاهم الثورة نجحت ولا لسة وفاضلها إيه؟ مش عارف امتي نبتدي نبني البلد ونتقضي علي الفساد اللي فينا ولحد امتى هيفضل فيه رموز فساد؟ طب ماهو كل موظفين الحكومة المرتشين رموز ليه مقلناش عايزينهم يمشوا هما كمان؟ مش الدرج المفتوح ده برده رمز للفساد ليه مطالبناش إن المكتب مايكونش فيها ادراج؟ ولا هي إيه الرموز وه اللي مش رموز؟
أنا اصبح همي إن شركتي متقفلش وتقفل باب رزق أكتر من 800 عائلة بس مش عارف ده صح ولا ايه؟ ولا أحسن تقفل وانا اقعد في البيت بس نكون رفدنا الحكومة اللي بتستجيب لمطالبنا لحد دلوقتي وجبنا ناس تكنوقراط يمكن يبقوا مش متفهمين مع بعض؟
ماهو ممكن نجيب زويل ( مش نجيب محفوظ ) كوزير تعليم أو بحث علمي يكون عايز يعمل حاجات ماتتفقش مع الميزانية اللي هايخدها ولا مع طموح وزير الصناعة مثلا. ومايكونش هما الجوز متفقين مع اللي فاروق الباز عايز يعمله. ماهو كل واحد فيهم طومحاته عايزة ميزانية البلد 3 سنين علي الاقل. هي مش الحكومة لازم يكونلها سياسة محددة؟
إيه هي المعاير أو المقياس الفعلي اللي ممكن نقول كده نجحنا؟
المفضلات