السلام عليكم ياشباب

عملت من يومين صيانة الـ 10000 للبونتو إيفـو

ماتم في الصيانة:
- تغيير زيت ، موبيل 1 (للأسف)
- تغيير فلتر الزيت
- تغيير فلتر الهواء
- الكشف على زيت الفيتيس، الأنوار، التكييف، عمل المساحات، مياة المساحات وضبط ضغط الإطارات
- وكالعادة غسيل المحرك بالفوم

ده بالإضافة إلى تغيير شداد الباب الخلفي شمال، وضبط الباب الخلفي يمين، وده لأنى كنت لاحظت وجود "تزييق" فيهم،

تكلفة الصيانة:

زيت = 255 جم
فلتر زيت = 37 جم
فلتر هواء = 77 جم
مياة مركزة للمساحات = 7 جم
مياة مقطرة = 5 جم
فوم = 27 جم

مصنعيات = 135 جم

إجمالي بالضريبة = 551.24 جم


ما يحسب للتوكيل:

- اتصلت يوم السبت وكان أول ميعاد الأحد بس أنا طلبت يخلوها الثلاثاء.
- مهندس الإستقبال م / أحمد صلاح، شخصية محترمة ومهذبة.
- وصلت متأخر نص ساعة ومع ذلك دخلت على طول.
- موضوع تغيير الشداد، انا تصورت انهم بالكتير "هايشحمولي" البابين وشكرا.
- الصيانة كانت من الساعة 09:00 إلى 01:00 واستلمت العربية فعلا في الميعاد.

مايحسب عليهم:

- بعد ماستلمت العربية اكتشفت انها بقت متبهدله (كنت لسه غاسلها بره وجوه) من بره فوم وزيوت و"تلطيع" وبصمات ايدين على الزجاج ومن جوه بقعة زيت محترمة في الدواسة.
- زودوا ضغط الكاوتش من غير حتى مايسألوا نيتروجين ولا هواء، وإضطريت أروح أفضى الهواء وأحط نيتروجين تاااني.

وعلى الرغم من كرهي الشديييد لزيت موبيل 1، إلا ان صوت العربية اصبح اهدأ بعد التغيير، والسحب حاسس انه بقى افضل.

ملحوظة صغيرة: م / أحمد كان من المؤيدين لإستخدام بنزين 95 للإيفو. على عكس آخرين سألتهم وقالوا لا، مشيها 92 و90 كمان !!