الموضوع: كل شئ عن 620

من وجهة نظري المتواضعه انا شايف ان موديل 620 من اجمل موديلات اسبيرانزا
ماعدا تجهيزات الزجاج ..... افضل نوع 516

بس طبعا التسارع بتاع 620 بطئ فى الاول .... وده ممكن يضايق ناس كتير وممكن مايفرقش مع ناس كتير

كان نفسي تنزل "الانفي" اوتوماتك وفتحة سقف ....... بس الواضح انها تطوير ال516 (مش عارف قى ايه) ومنزلنها بشكل جديد ....مع ان المفروض من سياسات اي شركه انها تطور من نفس المنتج بنفس الاسم وتقدمه بشكل افضل وامكانيات اعلي او علي الاقل تقدمه مع تلافي اخطاء الاسبق ....لكن سياية اسبيرانزا مختلفه ....وده انما شايفه مش كويس من وجهة نظري

الحاجه التانيه اللي عايز اتكلم فيها:
- اسم الصيني فى مصر مازال سئ جدا ومحدش مقتنع بيه الا المضطر......مش عارف ليه
- اسم اسبيرانزا مازال مش حلو وبيعتبروها عربيه تعبانه ..... ومش بتنفع غير فى التاكسي

لكن لو جيت اتكلمت عن "البريليانس" الناس تقول " لا لا لا لا دي حاجه تانيه خالص ..دي البافاريه" ..... طبعا انا بضحك جدا من القول ده ...لان الناس بتعتبرها bmw..... وهي بريييييئه تماما عن تصميم او صناعتها او قطع غيار البي ام .... لكن الناس بتحب تتمسح وخلاص
بل بالعكس ....الاسبيرانزا امكانياتها اكتر من البريليانس ..... والسعر اقل وقطع الغيار متوفره واقل فى السعر
بس تقول ايه للعقول اللي لسه بتقول "المرسيدس مرسيدس....الالماني الماني" وهي مالهاش اي دعوه بالالماني

وده يا جماعه خلاني اشعر ببعض الاحباط وخيبة الامل فى عربيات بقالها من 2006 حتي الان يعني 7 سنوات حتي الان ولسه الناس خايفه منها بل وبتقول فيها كلام وحش جدا
كل ده خلاني بجد افكر ابيع واشتري اي موديل تاني يكون اوروبي او ياباني ....لكن العربيه بصراحه كويسه اوي ورخيصه جدا فى قطع الغيار
انا مثلا اول مره اغير تيل فرامل من ساعة ماشتريتها ..... لسه مغيره من شهر عامل امامي وخلفي =70+65=125ج وتكلفة تركيب =30ج وبكده يكون المجموع =155ج
شوف كده اي عربيه اوروبي او اسيوي تعمل كام فى الحركه دي
انا تقريبا يوماتي علي صفحات الاتي
1-فلونس
2-بيجو (508)
3-كورولا
4-بي ام
5-سيراتو
وبلاقي فى التكلفه كلهم غاليين جدا بالنسبة للاسبيرانزا ..... وماتقوليش معمره ..... خش كده علي الكورولا وشوفو الفضايح فى تغيير التيل مع الطانبوره كل 25الف كم وساعات تيل بس وشوف بيتكلف كام
انا مغير التيل علي 68الف كم بعد 3 سنين !!!

بس يمكن فعلا ان الانواع اللي ذكرتها فى الاعلي دي تسارعها اعلي بكتير من الاسبيرانزات كلها .... اعادة البيع كويسه وسريعه
وحاجات كتير اوي ياجماعه .....فاعذروني لو كنت بقول عايز ابيع ....بس ده بجد من قرفي

ودمتم فى امان الله

المشاركة الأصلية كتبت بواسطة fourseasons

يا جماعة عاوز اغير من 516 ل 620 ايه رائيكم فى الموضوع ده

توكل ومش حتندم الافى الاتي:
1-تكلفة الضريبه غاليه
2-التسارع فى الاول بطئ ابطأ من 516
3-حتفقد خواص الزجاج الكهربي من وحدات رفع والنزول التلقائي(التاتش)

المشاركة الأصلية كتبت بواسطة akmm

اتكل على الله وخلى باللك انها 2000 سى سى والضريبه حوالى 950 جنيه ومشكله الحجم ومكان الركنه فى البلد الزحمه ولازم تكون جيده مش شرط الموديل سنه كام لانهم كلهم شكل واحد من 2007 الى 2011 ولكن المهم العربيه واكشف عليها كويس وبالتوفيق .

موضوع انها 200 سي سي ده مش مشكله خالص......بقولك وعن تجربه انها بتوفر كويس ....او تقريبا زي 516 طبعا لوماشيك عادي .....مش بتكلم عن الشد والحرق لانه ده بيختلف من شخص الي اخر
ولو بتمشي علي طرق سريعه كتير ..........حتوفرلك اكتر من 516 عن تجربه فى العربيتين(كان عندي 516)

اما الضريبه ....زي ماقلتلك فعلاغ كتير مش اقل من 900ج

الحجم ليس بالعائق خاااالص .... حتمشي عادي جدا وحتركن برضه عادي .....ده بيعتمد علي مهارة السائق

اكشف عليها كويس وياريت تكون حاله جيده ومش متهاتنه
ولو متهانه فتكلفة توضيبها رخيصه جدا بالمقارنه باي موديل تاني

المشاركة الأصلية كتبت بواسطة akmm

-حتفقد خواص الزجاج الكهربي من وحدات رفع والنزول التلقائي(التاتش معلش الجزئيه دى مش فاهمها ياريت توضيح ولسيادتك جزيل شكرى ...........

يعني اقصد ان موديل 516 فيها:
1- وحدات رفع ........ مش موجوده ف620
2-زراير الزجاج تفتح كامله من دوسه واحده(نظام التاتش) ........ مش موجوده ف620(الا زجاج الساق فقط)

السلام عليكم ورحمة الله وبركاته , تحياتي لجميع الاعضاء الغاليين , حابب اشاركم في بعض الحجات ال عملتها في العربية خاصة ان دا المكان الوحيد المتنفس بأخبار 620
اولا العربية موديل 2007 شريها وكان فيها الباور مش شغال وكانت عايز مقص يمين وبيض .... المهم توكلت على الله وقلت اروح المتحدة وابدء وعملت الاتي:-
1-غيرت طلمبة الباور ودي انا جبتها بمعرفتي من توكيل او رواش ب 1551 ج عشان المركز كان هياخرني على ما يجبوها وخاصة ان سعرهم كان 1250ج فلقيت الفرق مش كبير
2-تغير علبة الدركسيون بمعرفة المركز سعرها1650 ج
3-تغير المقص امامي يمين 300ج
4-جلبة مقص امامي شمال 75 ج
5- تغير 2 بيض خلفي يمين وشمال 350 ج
6-تغير 2 تيش ميزان خلفي 150ج
7- تغير 2 كوتش ميزان 70 ج
8- قاعدة قنطرة فتيس خلفيه 125 ج
9- صرة عجل شمال خلفي 375 ج
10-بطاحة مساعد يمين 120ج
11- طقم طنابير امامي 280ج
12-تغير طقم كاتينة 775ج ضمان 30000ك وكان بيقولي من غير ضمان 675ج
13-تغير خرطوم ضغط باور 145 ج
14- 2 لتر زيت باور 75 ج
15 - اولسية .....20ج
16- مصنعيات 900ج خصمت منهم 100ج بقت 800ج
الاجمالي مركز المتحدة 5300ج+1550 ج طلمبة باور =6850ج طبعا خلاف اكراميات العمال
بعد التغير والسفر بالعربية لاحظة ان زيت الباور نقص كشفت تحت العربية لاحظ تسريب من علبة الدركسيون من ناحية الشمال رجعت تاني للمتحدة الاسطى حسين قالي ان فيه تسريب من لاكور وربطه وبقى تمام وانا متابع ...... وهوا بيركبة كسر مشترك المياه الثلاثي وجبولي واحد جديد وركبوه وجركن مياه خضرا عادي حسبوه ب 45 ج
*العربية بالباور حاجة تانية ، تغير المقص اليمين فرق معايا في ثبات العربية خاصة على الطرق الغير ممهدة ، تغير صرة العجلة الخلفية شمال الصوت العالي الكنت بسمعة اختفى وانا الكنت متصور ان صوت الماتور عالي بصورة ملحوظة طلع من البلية
* لما بعدي على مطب صغير بسرعة بحس بان العربية بتعوم من وارة الميكانيكي بتاع المتحدة بيقولي ات محتاجة تغير مساعدين ياترى ايه احسن انواع المساعدين بتوعها وكمان افضل نوع كوتش عشان عايز اغير كوتش على الاقل اغير فردتين

*اتمنى ان تشاركوني وان احنا نفيد بعض في اي شيء يخص العربية
تحياتي للجميع

المشاركة الأصلية كتبت بواسطة semsem85

استاذ احمد تحياتي لك ليه بتقول كده عايز تبيع ده انت اكتر واحد حببتني في العربية واقنعتني بيها وكان زماني اشتريت من بدري بس الواحد مستني حاجه كويسة نضيفه واضح الضريبة زعلتك انت كده هتخليني اغير رأيي فيها .........

اهلا بيك semsem85 عامل ايه

انا بفكر فى البيع مش لسوء العربيه ....ابدا زي ماقلتلك العربيه كويسه جدا وقويه جدا وتحدي وموفره فى البنزين وقطع الغيار
زي ماكنت قلتلك قبل كده ان نظرة الناس هي اللي مش مريحاني ..... الناس بتخمن اي حاجه وبيتهموها اتهامات وحشه جدا وبالتالي فبحس اني انا المتهم وانا والعربيه برءاء من اي تشويه

لكن بصفة عامه العربيه كويسه جدا

شوف كده زميلنا hafez75 كاتب ايه وغير حاجات اد ايه ومع كل ده التكلفه طلعت كام ؟!!! فتااااات بالنسبة لاي موديل تاني
ياراجا ياطيب دي السيراتو الجديده الفانوس بتاعها ب5000ج والموديل العادي ب2000ج
تغيير طنابير وتيل فرامل للكورولا حيكلفك مش اقل من 5000-6000ج
تخيل لو حتغير الحاجات دي كلها فى اي موديل تاني حتدفع اد ايه !!! مش اقل من 15-20الف

والاجمل من كل ده ......شوف الاداء بتاع العربيه بعد ماخرجت من الصيانه ...... زي مازميلنا hafez75 بيقول انها اصبحت انعم وافضل ..... يعني بتجيب نتيجه بعد الصيانات

انا بس مدايق شويه من كلام الناس السخيف ..... وكل ما اخش اي موضوع خاص باي اسبيرانزا لازم الاقي خناقه وناس بتتهم وناس بتدافع وحاجه صعبة اوي

ماتاخدنيش فى الكلام ...... انت فين ؟ ولا كلمتني ولا حاجه ....انت زعلان مني ولا ايه ؟ وعملت ايه فى موضوع يوم الجمعه ؟
مستنيك

دمتم فى امان الله