الموضوع: تقرير عن اللوجان و صيانة ال 5000 عند مركز العدوي المعتمد

السلام عليكم و رحمة الله و بركاته

العربية الحمد لله إستلمناها يوم 14 ديسمبر من المصرية و إترخصت الحمد لله و دلوقتي العربية عاملة حوالي 7500 كيلو

النهاردة رحت انا و والدي عملنا صيانة ال 5000 كيلو عند مركز العدوي المعتمد لصيانة السيارات على طريق المحلة - المنصورة
و السبب ان احنا أتاخرنا في الصيانة أن مندوب المبيعات قالنا مينفعش نروح الصيانة من غير الضمان و مكناش استلمناه حتى الآن ( و لسة )

المهم العربية حتى الآن مفيهاش أي مشاكل زي ( السخونة - الدواسة - عضة الفتيس )
بس النهاردة و احنا راجعين دواسة البنزين علقت و كانت اول مرة تعملها و للأسف والدي مش عارف هي علقت لوحدها و لا هو السبب
و كمان الفتيس نقلاته سهلة بس مش عارف بالنسبة للعربية هل دي الطبيعي و لا لا

المحرك مكتوم و متفتحش
و أدائها جيد و إن كنت أتوقع منها الافضل و دة يرجع لن المحرك زي ما ذكرت نايم بسبب أن 98% من إستخدام العربية لوالدي و بينقل عند حوالي ال 2500 rpm
بالنسبة للمحرك صوته عالي آه بس أنا بالنسبة لي شايفه كويس و مش مزعج و لا ملفت للدرجة
بس فيه حاجة في المحرك أنه عند بداية من 2500 rpm المحرك بيعمل vibration جامد و صوته بيعلى جدا و اللي يحس بكدة اللي بيسوق بس و بيصل لذروة ال vib عند ال 3000 rpm و بيبدأ يقل بعدها
أنا مش عارف هل دي ال critical speed للمحرك ولا ايه ؟
فيها زي صوت فسة أو ونة صغيرة كدة عند ال 100 - 110 - 120
فراملها كويسة و حلوة
ركنتها صعبة علشان الشنطة و بتعتمد على التخيل كتير و أنا راجع بظهري
التكييف لم يختبر إلى الآن
الكاسيت صوته نقي و جيد بس الراديو يلزم معه الاريال لأن من غيره مفيش قنوات خالص
الشنطة بسم الله ما شاء الله تساع و تكفي
و بالنسبة للوسع واحد من أصحابي لما ركبها اتعجب من وسعها و بيقولي انا كنت فاكرها ضيقة
ارتفاعها عن الارض جيد باخد المطب و انا مستريح
الابواب و الشنطة بيقفلوا مستريحين مش جامد يعني
بس في عيب في زرار ضبط المرايا وضعه غريب شوية و مرة كنت بضبط منه المرايا بس المرايتين متحركوش من مكانهم و طبعا كنت بختار منه كل مرايا على حدى علشان محدش يفتكر اني كنت ناسيه على وضع التعادل اللي هو في النص
الكلاكس متعود عليه الحمد لله وفيه ميزة في وضعه ده حيث أن مرة كنت برعش علشان داخل على تقاطع فغصب عني ضغط الكلاكس فرعشت و كلكست مرة واحد و دي أنا شايفها ميزة

بالنسبة لنسب التخفيض عند 3000 rpm :
سرعة العربية على الثاني 40 كم/س
سرعة العربية على الثالث 60كم/س
سرعة العربية على الرابع 80كم/س
سرعتها على الخامس محددتهاش بصراحة

أعلى سرعة وصلت لها العربية هي 120 كم/س

الباور بتاعها مش بالنعومة اللي كنت متوقعها و تقيل شويةو الحكاية دي عاجبة والدي علشان تحكمه الكامل على الطريق أثناء السفر لأن أغلب إستخدام العربية طنطا - بنها - طنطا طنطا - اسكندرية

مكان الطفاية انا شايفه رخم مع اني مش مدخن
مستوى العربية من الداخل 7 /10 من وجهة نظري





بالنسبة للصيانة
وصلنا تقريبا على الساعة 10:15
الموظفة استلمت مننا العربية و في خمس دقائق خلصت اجراءات الاستلام و بعدين طلعنا الاستراحة
طبعا من الاستراحة تقدر تتابع الورشة
العربية دخلت اخدت حوالي 20 دقيقة
نظفوا الحوض بالهواء الاول
نظفوا فلتر الهواء
نظفوا حاجة تانية بس مشوفتهاش
نظفوا حوض المحرك بالجاز على ما اعتقد علشان ريحته كانت باينة في الصالون
رفعوا العربية و كشفوا عليها من تحت و ربطوا العفشة و كان واضح انها مكنتش محتاجة تربيط
دي الحاجات اللي شوفتها
و طبعا حطوا على الدريكسيون و الفتيس و الكرسي بلاستيك قبل ما الفني يدخلها الورشة

الخدمة هناك بين جيدة و ممتازة
حتى الآن لا يوجد إختبار حقيقي لجودة الخدمة طبعا


يا رب أكون أفدت

المشاركة الأصلية كتبت بواسطة ger

بس اللى اعرفه ان التنظيف بالجاز مضر بيسبب تاكل للكاوتش بتاع الخراطيم

و فيه كمان سلوك مكشوفة
بس المفروض هما عارفين بيعملوا ايه ؟

المشاركة الأصلية كتبت بواسطة mazenzyad

يا ريت حد يفهمنا ايه اللى بيتغير فى صيانة ال5000 و مجانا و لا ايه ؟

مفيش حاجة بتتغير
هو مجرد check عادي للعربية و تنظيف حوض المحرك
و فلتر الهواء
و تربيط للتعليق