الموضوع: انا كنت باحترم الاخوان جدا

المشاركة الأصلية كتبت بواسطة som3aa

الموضوع مش رفض للنتيجة خالص و لا له علاقة بالنتيجة , الموضوع هو المصيبة اللى ممكن تحصل بعد كدا من الناس الجهلاء
أزاى عايزين ديموقارطية منغير منسيب فرصة للاحزاب و ناس تظهر بعد تجريف لحياة سياسية فى 60 سنة؟؟؟
لازم علشان اعرف احكم ابقى فاهم مش مضحوك عليا و نقول دى ديموقراطية.
الحل حملات توعية فى كل حتة فى مصر للناس اللى مش فاهمة او اللى مش مهتمة و حملات لمحو الامية دى تعتبر اول خطوة.

المصريين كلهم قاموا بالثورة ضد الفساد و النهب و البلطجة و الكلام دا بس كتير من اللى ثاروا عايزين التغيير بس مش عارفين طريقه ازاى , يعنى مثلا لو انا واحد جاهل بس بتعذب فى القسم و مش لاقى اكل و شاركت فى الثورة مش معنى كدا ان انا عندى وعى كفاية علشان اشارك فى عمليات تغيير دستور و انتخابات و كدا
أنا مش بعيب عليه علشان هو جاهل , لو كنت حاولت تفهمه و توعيه قبل الثورة كان هيتقبض عليك!!!!
دلوقتى الموضوع مختلف , لازم يبقى فى توعية و اللى نازل يسمع بحيادية (مش حد ياخده على قد عقله) ليه اه و ليه لا و يفكر مع نفسه مش يسالك فى طابور الانتخابات اصوت بايه علشان انا مش عارف و يقرر و كدا تبقى ديموقراطية مش الديموقاطية انى ادعو ناس بالملايين ينزلوا ينتخبوا و هما مش عارفين هما بيصوتوا على ايه اساسا.

انا مع التعديل طالما دا رايى الاغلبية بس انا بتكلم على بعد كدا علشان البلد متضيعش .

اللى يضحك على الناس و يخليهم يصوتوا فى استفتاء ملوش لزمة بحاجة هو عايزها هو اللى هيضحك عليهم بعد كدا فى انتخابات الشعب و الشورى و الرياسة كمان و ممكن يودى البلد فى داهية.

لعلم حضرتك انا كنت بسمع كتير ناس تنتقد الاخوان و يقولك ازاى بيقولوا على نفسهم هما الاسلام مع انهم مقالوش كدا , قالوا احنا مسلمين مقالوش احنا الاسلام بس مكنتش فاهم و فهمت اليومين اللى فاتوا , لما ينزلوا يقولوا للناس عايزين الدين صوتولنا و يعلوقوا لافتات و لو عايزين الخراب و أمريكا قولوا لأ!!!!

مينفعش انتخابات دلوقتى , البلد مش مستعدة لازم الناس تفهم و يبقى عندها وعى اكتر من كدا بكتير علشان تقدر تصوت و تنتخب و تمارس حقوقها اللى كانت محرومة منها 60 سنة

كلام مظبوط 100 %
الاستفتاء ده اثبت .. ان الشريحه العظمى من الناخبين ..مش هما اللي بيخشوا على الفيس بوك ونيل موتورز انما هما اللي في الارياف و المناطق الشعبيه .. اللي سهل التأثير عليهم بالدين والفزاعات .. وبالتاي فان المفروض .. ان يكون هدف القطاع العريض من الشعب اللي بنتموا للوسطيه والاعتدال .. او بمعنى اصح اللي ما بينتموش لجماعات بعينها .. ان يكونوا لهم احزاب تنمويه تبدا تنتشر ... وتوعي الناس .. وتحسس الناس دي قد ايه صوتهم مؤثر في مستقبل مصر .. الشيء الجميل ان صوت كل واحد فينا بقى مؤثر فعلا في مستقبل مصر .. بس الفكه بقى ازاي توعي الناس ازاي تدي صوتها صح .. ازاي تسمع و تحلل صح عشان تقدر تدي رايها عن قناعه شخصيه .. مش عن تبعيه

جماعة الاخوان محتاجه تعمل فلتره للاعضاء و القيادات....لأن اللي حصل ده كان شيء غير محسوب للاسف وخسرها كتيير...
انما غير كده هي ناس محترمه و وسطيه جدا ..

الله ده احنا طلعنا شعب لذيذ قوى - لما تيجى جهه منظمه شربت المر سنين من النظام وتبتدى تمارس حقها نقول لا دول منظمين وهيكسبوا؟؟؟؟- امال عايزين مهرجين ومتخبطين يكسبوا ؟؟؟
بيقولوا ادوا غيرهم فرصه يكون قاعده شعبيه و ينافس- يا سلام طب ما كان فى احزاب بعدد اللمون ما كونوش قاعده ليه - ثم ما فى فرصه للمستقلين - يتكتلوا وبعد ما ينجحوا يعلنوا احزاب - يعنى كل ذنب الاخوان انهم منظمين - ؟؟؟؟
فى اللى بيقولوا انتهازيين - هو هدف اى حزب ايه مش يوصل للحكم - ؟؟؟
تصدقوا ان الواحد خايف فعلا - بس مش من الاخوان من اللى مش عارفين عايزين ايه ويقولوا الثوره بتتخطف

المشاركة الأصلية كتبت بواسطة dr-mohamed

سؤال يطرح نفسه لماذا يقف البرادعي وعمرو موسي وغيرهم بقوة وراء لا ويستخدمون فزاعة دم الشهداء وخيانة الثورة ببساطة لانهم هدفهم الانتخابات الرئاسية والتشريعية ويعرفون ان لا شعبية لهم في الحقيقة وان ما يكتب على النت شئ وما يجري على ارض الواقع شئ اخر وكلنا عرفنا اساليبهم الامريكية واستخدامهم للمحطات التليفزيونية كلها والجرائد لدعم رايهم ومساندتعم واستضافتهم هم ومؤيديهم وحجب من يعارضونهم

نرجع لنقطة الدستور واصرارهم على دستور جديد الان لان هدفهم تجميد الاوضاع لاكثر من سنة حتي يمكنهم عن طريق الة اعلامية ضخمة تحقق اهدافهم اقناع الشعب باختيارهم وتكفير الاسلاميين ويقضوا على دولة مصرية اسلامية مع ان اول ما سيفعله البرادعي في العلاقات الخارجية كما قال هو اعادة العلاقات مع ايران الشيعية التي قتلت وقمعت الثورة عندها اعنف الطرق مما قضي عليها مبكرا وتطلع علينا الفيديوهات بضرب فلان ومحاولة قتل علان وكلنا شفنا ازاي حشدوا الاعلام كله معاهم

اعادة العلاقات مع ايران ش~ طبيعى زيها زى اى علاقات دبلوماسيه مع اي دوله فى العالم
و من ناحيه اصرارهم على دستور جديد دا لأن اى دستور جديد بعد اى ثوره بيكون عن طريق لجنه تأسيسيه منتخبه مباشرة من الشعب و تمثل كافة طوائف الشعب و دى اسمها السلطه الأصليه مش عن طريق مجلس شعب يمثل قوى سياسيه معينه و قد لايمثل كافة افراد الشعب