لما قريت مشاركة الاخ الفاضل Casber افتكرت موقفين
الحمد لله أنا صليت في جوامع ٤ قارات (أفريقيا، اسيا، أوروبا و أمريكا الشمالية ) بس في مرتين صليت فيهم ليهم إرتباط ما ببعض
٢٠٠١ .... الجامع اللي كنت بصلي فيه في طوكيو تركي.....بمعني إن الارض اللي مبني عليها الجامع ملك للحكومة التركية و مصاريف إدارة و صيانة و تجديد الجامع كلها من الحكومة التركية حتى الامام تركي موفد من قبل الحكومة ....خطبة الجمعة بتتقال بالتركي و الياباني و الانجليزي (نفس الخطبة تتعاد ٣ مرات !) حسيت اني لسة أيام الخلافة العثمانية
٢٠٠٢ لما صليت في الجامع الازرق في إسطنبول (غير إنه تحفة فنية من الداخل و الخارج) الناس كانت في قمة الخشوع غير انهم كلهم لابسين على سنجة عشرة أكنهم رايحين حفلة و اغلبهم شعرهم كان لسة مبلول من أثر الاستحمام (مش قصدي أي مقارنة )
الغريب بأه في الموضوع وانا خارج من الجامع كان فيه مظاهرة ضد قرار حظر الحجاب و كان البوليس بيلم المشاركين و المشاركات في المظاهرة (بدون عنف من الجانبين ...برضه مش قاصد أي مقارنة ) في اوتوبيسات كتير . لما سألت المرشد السياحي بعدين قالي إن الموضوع ده بيحصل كل أسبوع .....الشعب فيه كتير متدين و الحكومة علمانية (برغم حكاية جامع طوكيو !!؟؟) و كل شوية بيحصل تصادم ...على حسب كلامه