الموضوع: رابطة ملاك الكيا برايد - كلاكيت تانى مرة!

المشاركة الأصلية كتبت بواسطة msunix

النهاردة بقى انا جايب اسعار طازة من محل حلمى للكيا موجود بجانب محطة مترو عرابى
سير الكاتينة 50 جنيه
بلى الكاتينة 60 جنيه
سير الدينامو 25 جنيه
سير التكييف 25 جنيه
طقم بوجيهات 35 جنيه
فلتر بنزين 15 جنيه
اكصدامين قدام ووراء 175 جنيه للواحد
فانوس اشارة 15 جنيه
قانوس خلفى كامل 70 حنيه
فانوس اشارة اكصدام 15 جنيه

والله كتر خيرهم بتوع حلمى سليمان مغيروش اسعارهم من سنتين واللى قلت عليه هو نفسه اللى سمعته من ساعتها ما عدى سير الكاتينة كان عامل 45 جنيه وسير الدينامو ب 15 جنيه

بس مسألتش على باقى الحاجة لسه ، بس شكله محل رهيب مليان حاجات الكيا برايد، ودى الحاجات اللى طلبها منى مركز الصيانة علشان اجدد العربية بالكامل.

هو محل كويس بس عيبه ان الناس زهقانة من نفسها علطول وحاجاته اغلبها صينى ويقولك عليها اصلى لو عايز حد اشد منه اطلع على الجندى اللى فى شارع دمشق

مهو لو انا مستعجلتش واشتريت العربية اللى معايا كنت اخدت عربية مناور بس للاسف ملناش نصيب. كان معايا ال31 جاهزين والله ورحت اشتريت اللى معايا ب29 ومحتاجة شغل جامد جدا وكتير قوى.

انا على فكرة بعد لما اخلص شغل العربية ورشها من برة وكده تبقى وقفت عليا بحوالى 35 او 36 على حسب تكلفة الشغل.

يلا كل واحد بياخد نصيبه

يا باشا انت جايب العربية بسعر ممتاز جدا ولو وصلت لبعد التظبيط ل 35 فانت كده كسبان لان العربية اصلا بتتباع ب 35 وبطقم السيرفس والتسجيل واللذى منه ممكن توصل ل 36

وبالنسبة لعربيتى فأنا عندى خبر وحش ماكنتش عايز اقوله دلوقتى وهو انى خلاص حابيع العربية واتفقت مع واحد صاحبى حايخلص فيها على أول الشهر الجاى بإذن الله وهو كان بقاله يجى سنة بيزن عليا فى شرائها

بس بالمناسبة يا مناور السيارة اتوماتيك ولا مانيوال؟ وهيه موديل كام؟
وعاملة كام كيلو؟ وياترى فيها شغل ولا خالصة مخلصة اشترى واركب؟
كل دى معلومات للمشترى علشان لو محتاج تبيعها بسرعة ، اما لو عزيزة عليك فأجل بيعها أحسن :(

أنا معايا البرايد الهاتش باك موديل 96 ودى اقل برايد فى الامكانيات يعنى لا تكييف ولا rpm ولا حتى الجراب اللى بيبقى فى الباب .... وعداداها 180000 الف بس الحمد لله أنا كنت محافظ عليها علطول الصيانات فى وقتها وبنزين 92 وأى مشكلة كانت تطلعلى كنت احلها فى وقتها .......وكمان لما روحت لمركز الصفوة وظبطت الكربراتير وركبت بوجيهات ngk سحب العربية بقى حاجة تانية واستهلاكها بقى زى ما فى المانيوال يادوب بتشم بنزين .... ولله الحمد من قبل ومن بعد

وبالمناسبة دى العربية عملت حاجتين حابقى اقولكم عليهم قريب بس انتوا فكرونى اقولكم عليهم

المشاركة الأصلية كتبت بواسطة akramhasan

رابط الموضوع اهو http://www.nilemotors.net/nile/24390...post3873784341

بالتوفيق فى البيع إن شاء الله

النهاردة روحت رديت خبطة الباب على البارد وكان فيه شرخ فى الاكصدام من تحت خليته ربطه بسلك ودفعت 100 وبعدين طلعت على الراجل بتاع الرش لقيته بيتكلم فى 200 جنيه علشان ارش الباب بالرفرف ولازم ارجع للسمكرى يكمل شغل على الساخن وحادفع 50 جنيه تانى فقلتله ده كتير فقالى ممكن امسحلك الباب بتينر علشان يشيل بوية العربية اللى خبطتنى وبعدين وش بولش ثم احط مادة عازلة بنفس لون العريية على الحتت اللى قشرت فوافقت على الاختيار ده وكانت النتيجة مرضية إلى حد ما ودفعتله 15 جنيه

بعدين طلعت على الكهربائى علشان لمبة الصالون اتحرقت جبت واحدة تانية ب 2 جنيه وبعد ما ركبناها لقيناها مش عايزة تنور مع فتح الباب فلقى ان الزرارين اللى فى قايم الباب من تحت عليهم صدأ فنضفهم واللمبة اشتعلت تمام ودفعتله 10 جنيه

ولقيت لمبات الاشارات والعداد بتعلق لما اشغلها وطلع الدراع بتاع النور السبب وقالى الكهربائى انه ممكن يعمله بتاع 75 ل 100 جنيه استيراد فقلت خليها بعدين

المشاركة الأصلية كتبت بواسطة msunix

ربنا يوفقك فى البيع وتشترى حاجة احسن ان شاء الله

طيب سؤال غبى شوية ، علشان انا بس لسه جديد فى الكار ، هوه فين شارع دمشق وعنوان الجندى بالضبط فين ؟؟؟

شارع دمشق ده فى روكسى أنا اعرف اروحه بس ماعرفش اوصفه

المشاركة الأصلية كتبت بواسطة ahmed_jalyyy

لسة شارى كيا برايد سيدان جديد وحسيت بتزييق فى العفشة الى ورا بعد كل مطب افيدونى تقريبا يكون فيها ايه وشكراااااااا على مساهمتكم الفعالة وبارك الله فيكم

مبروك عليك العربية وأهلا بيك معانا فى الرابطة

ان شاء الله تلاقى حد من الاخوة يرد عليك أو ممكن تحط موضوع فى قسم الورشة لردود اكتر واسرع