الموضوع: رابطة ملاك الكيا برايد - كلاكيت تانى مرة!

المشاركة الأصلية كتبت بواسطة المناور

أنا مش عارف ايه حكاية العربية معايا اليومين دول هى بتعاقبنى علشان حابيعها ولا ايه ؟!!!
النهاردة طلعت اخلص مشوار ليا وكنت ماشى فى صلاح سالم وسرعتى حوالى 80 وجى طالع الكوبرى بتاع العباسية ومرة واحدة الاقى عربية نص نقل جاية من الشمال اللى بيضيق لغاية الكوبرى والاقيه دخل قدامى فأنا هديت شوية لانه بقى قريب قوى منى المهم البيه فوجئ بان الطريق هدى جامد علشان كان فيه عربيتين عطلانين فوق الكوبرى فراح مفرمل جامد ووقف قبل عربية لانوس بقليل وأنا طبعا روحت مفرمل جامد وبرضو فراملى اسعفتنى قبل النقل بحاجات بسيطة المشكلة بقى ان كان فيه ورايا عربية سوزوكى اللى هيا 7 راكب فرمل بس فرامله شكلها ضعيف شويتين فراح خبط عربيتى من ورا اللى بدورها خبطت النقل اللى بدورها خبطت اللانوس ... طبعا صوت الخبطة كان جامد وقلت خلاص العربية بعد ما اتعملت ساندويتش اتدمرت نزلت لقيت الحمد لله مفيش غير فانوسين الانتظار اللى فى الاكصدام اتكسروا والاكصدام اللى ورا اتكسر المسمارين اللى ماسكينه من ناحية الرفرف والكرسى اللى أنا قاعد عليه بقى بيزيق طول ما أنا ماشى زائد طبعا بعض الالام فى الرقبة والضهر والحمد لله على كل شىء

لا حول ولا قوه الا بالله ......... الحمد لله انها مش خابطه كبيره و الخساره جت علي قد كدا
و لو علي فانوسين الاشاره يتجابو باذن الله و الكرسي اللي بيزيق هايسكت لوحدو عادي ياما بيقعد يزيق و يسكت ف الاخر مع نفسو و الف سلامه علي حضرتك يا استاذنا والف سلامه علي العربيه بردو .... هيا شطلها بتعمل كدا عشان تاخدها ف حضنك تطبطب عليها شويه قبل ما تسيبها و ربنا يكرمك باحسن منها الف مره

بسم الله الرحمن الرحيم
دي صور لحبيبتي و كعكتي البيضاء الكيا برايد و عايز مشورتكم ف شويه حاجات كدا



دي صوره العربيه و طبعا من الملاحظ ان الفانوس الصغير مش موجود بس انا اشتريته من تلات شهور و راكنه تحت السلم عشان عايز مسامير و حوارات و انا مش فاضيلو

نخش علي التقيل بقي






دي صور الخابطه اللي اخويا عملها و طبعا العربيه اللي عملت كدا كانت نص نقل راكنه ف حالها و هوا راجع ما شفهاش و خبطها و هيا ما جرلهاش حاجة بس المهم دي خاتتصلح ولا لا و اجيب فل و احطوا و كان ما حدش هياخد بالو

اه معلش علامه الكيا اللي بنقس اللون مكان اللي ولاد الحلال شالوها اجيبها منين و بكام



و دي المرايه علبتها اتخبطت من ولاد الحلال بردوا و مش عارف اجيب مراية العربيه ولا اشوف مرايه احسن عشان الرويا ف المرايه دي مش مريحاني



دا طبعا الفانوس بتاع العربيه بس المسمارين دول من كتر اللف بقو يفوتو اعمل ايه ... انا ببقي منور المتوسط والاقيه ضارب ف قفا اللي قدامي و انا عايز انزلو شويه بس المسامير مش عايزة


دي بقي صور الموتور و العربيه يعني و انا بغير للمياه الحضرا اللي جبتها من كارفور اللي قولتلكو عليها بس هيا 4 لتر مش 5 و عاطط تلات تربع خضرا و الباقي مياه عاديه زي ما استاذ مناور قال و العربيه الحمد لله مش بتسخن زي الاول و ابص الاقي العداد علي النص لا بقي قبل النص الحمد لله






دي خبطه ف الرفرف علي قد ما قوسم كدا و هيا دي اللي كنت عايز اعدلها مع اللي ورا ف الشنطه







معلش طولت بس اهوه حاجة نسخن بيها شويه

ايه يا ايمن ده انت مزعل العربية كده ليه دى بنت ناس ومش حمل اللى أنت عامله فيها ده

المشاركة الأصلية كتبت بواسطة may_moon911

بسم الله الرحمن الرحيم
دي صور لحبيبتي و كعكتي البيضاء الكيا برايد و عايز مشورتكم ف شويه حاجات كدا



دي صوره العربيه و طبعا من الملاحظ ان الفانوس الصغير مش موجود بس انا اشتريته من تلات شهور و راكنه تحت السلم عشان عايز مسامير و حوارات و انا مش فاضيلو

أولا أنت محتاج تعالج النقر اللى منتشرة فى العربية بتاعتك لانهم مع اللون الابيض مخلين شكلها يعصب ده غير انه ما ينفعش تسيب الصاج كده لان على حسب علمى لازم تبقى فيه طبقة حماية فوقيه

والحكاية مش مكلفة لو مش عايز ترش اعمل زى ما عملت اخلط المادة العازلة بلون ابيض وخليه يعملها بقطنة ومع اللون الابيض مش حايبان قوى

نخش علي التقيل بقي






دي صور الخابطه اللي اخويا عملها و طبعا العربيه اللي عملت كدا كانت نص نقل راكنه ف حالها و هوا راجع ما شفهاش و خبطها و هيا ما جرلهاش حاجة بس المهم دي خاتتصلح ولا لا و اجيب فل و احطوا و كان ما حدش هياخد بالو

دى سهل أى سمكرى يعملهالك ماتقلقش هما عندهم ادوات معينة تخليهم يستعدلوا أى جزء فى العربية

اه معلش علامه الكيا اللي بنقس اللون مكان اللي ولاد الحلال شالوها اجيبها منين و بكام

لو قلنا حاتجيب المضروبة انزل التوفيقية بيتهيألى مش حاتزيد عن 20 جنيه هما على العموم موجودين كتير قوى فى التوفيقية يعنى حتقدر تفاصل براحتك اما الاصلى فجرب تسأل بقى عندى الجندى أو حلمى سليمان

و دي المرايه علبتها اتخبطت من ولاد الحلال بردوا و مش عارف اجيب مراية العربيه ولا اشوف مرايه احسن عشان الرويا ف المرايه دي مش مريحاني

شوف سعرها جديد يعمل كام واستيراد يعمل كام واللى تلاقيه ارخص هاته مش حاتفرق وبالنسبة لمرايتك دى أنا ممكن اخلى صاحبى اللى حايخد عربيتى ياخدها منك لان عندى الدراع اللى بظبط بيه المراية اتكسر ومحتاج واحد مكانه من مراية مكسورة

دا طبعا الفانوس بتاع العربيه بس المسمارين دول من كتر اللف بقو يفوتو اعمل ايه ... انا ببقي منور المتوسط والاقيه ضارب ف قفا اللي قدامي و انا عايز انزلو شويه بس المسامير مش عايزة

هاتلك مسمار مقاس اكبر وخلاص

دي بقي صور الموتور و العربيه يعني و انا بغير للمياه الحضرا اللي جبتها من كارفور اللي قولتلكو عليها بس هيا 4 لتر مش 5 و عاطط تلات تربع خضرا و الباقي مياه عاديه زي ما استاذ مناور قال و العربيه الحمد لله مش بتسخن زي الاول و ابص الاقي العداد علي النص لا بقي قبل النص الحمد لله

تمام يا باشا بس ابقى خلى الموتور يستحمى كده كل شهرين تلاتة كده حتى شكله لما بيبقى نضيف بيشرح الصدر

انا برضو بعد تغيير الميا الخضرا حسيت بفرق وبالتجربة مشيت فى يوم مشمس لدرجة الصهد لمدة تزيد عن الساعتين ما بين طوالى وزحمة مدن والعداد لم يتعدى المنتصف

دي خبطه ف الرفرف علي قد ما قوسم كدا و هيا دي اللي كنت عايز اعدلها مع اللي ورا ف الشنطه

امبارح لما كنت عند السمكرى لقيته فى الاول رد اغلب الباب بايده يعنى زق الصاج بكف ايده راح الصاج منطور لبرا وبعد كده باقى العوجات اشتغل عليها دقدقة جرب كده تدخل كف ايدك من ورا الرفرف واضغط عليه جامد شوفه حاينطر معاك لبرا ولا لأ لو ماجتش يبقى السمكرى يشتغلك فيها مع الخبطة اللى ورا