الموضوع: تحذير من اصلاح الكاوتش في بنزينة مصر للبترول أول عباس العقاد

انا برضه اتعمل معايا نفس الموضوع ودفعت حوالى 100 جنيه فى بنزينه توتال على الاوتوستراد عند مدخل دجله واللى زود الموضوع قرف وخسارة انه حط خوابير على جوانب الكواتش وكل اللى يشوف كده يقول حرام كده الكاوتش باظ ...

على الاقل لما تحط خابور اوعى يتحط على اطراف العجلة

بالمناسبة انا عايز اشترى كومبريسور والبتاع اللى بيقيس ضغط العجلة .... حد عنده فكرة احسن مكان اجيبهم منين

راديو شاك عنده مقياس عجل ديجيتال كنت جايبه من حوالى سنه ب 120 جنيه معرفش سعره كام دلوقتى

هتلاقى الكمبروسور ده موجود فى كارفور و بيشتغل على ولاعة العربية 57 و هو فية عداد و فى العادى 25 جنية

الكمبرسور الصينى انا اشتريته مرتين مرة من التوفيقية و مرة من كارفور لما باز الاولانى و فى حدود 50 او ازيد حاجة بسيطة ، هو ممتاز و بيحل مشاكل كتير بس عايز استخدام بحرص يعنى لا تستخدمه اكثر من 10 دقائق فى المرة الواحدة و بين كل مرة و مرة 8 دقائق راحة كما هو مكتوب

لا تضعه فى مكان قابل للرزع كل شوية و لا حيبوز و هو فى شنطة العربية ، اما بالنسبة للعداد فهو ملحق به عداد لكن غير دقيق ، و لهذا اان ايضا اشتريت مقياس عجل منفصل ب 20 جنيه من محل بجوار قسم الازبكية او ممكن ايضا تلاقيه فى ش الجمهورية من اوله الى العتبة و الميزة انه بيخليك تعرف تظبط الضغط فى العجل كله بنفسك من غير الاعتماد على الصنايعية .

المشاركة الأصلية كتبت بواسطة mohamed_rhem

اقولكم علي احسن حل
لو اتعرضت للموقف ده بعد كده اتبع الاتي
الكاوتش نام ركب الاستبن ولاقرب بتاع كاوتش
روحله ويكون معاك داخلي (شنبر) جديد جاهز للاستعمال في حدود 15 جنيه
قوله ركبلي الشمبر ده هنا
حيشيل البالف التيوبلس ويفتش الكاوتشوك لو في مسمار حيشيله ويركبلك الشمبر ولو عايزه يركبلك العجله مكانها بالكتير 5 جنيه
ومن الاخر حيعرف انه مش حيعمل عليك شغل
ولما ترجع ابقي روح للي بتتعامل معاه وخليه يلحمه وبرضه تشيل الشمبر معاك
ده احسن طريقه انا اتعلمتها
ارجو ان حد يستفيد بيها

+1
ده أفضل حل علي الإطلاق أنا وصلتله
أنا ركبت كمر للعجلتين اللي اتبهدلوا و ماشي بيهم لأن مشاويري قصيرة شوية و جوه البلد دلوقتي
بس خلاص صوتهم علي قوي و الصيف جاي ، حاغير الكاوتش كله و احتفظ بالداخلي و ربنا عالمفتري

انا حصلت معى برضوة عند واحد بتاع جنوط و كاوتش فى اخر سارع سوريا بالمهندسين لما يخلص خالص و يكون شارع سوريا عمودى على شارع السودان تلاقي بالترتيب من اليمين صيدلية و بعدين معرض سيارات جديدة و بعدين الافندى بتاع الجنوط ده قلت ازود الكاوتش شوية لان الدريكسيون تقل راح برضوة نفس الشغل معه ازازة بمية بصابون و راح حط الميه بصابون راح كذا خرم ظهر طبعا يظهر عمل حاجة خرم بيها معرفش ازاى و انا مش حاسس كام يا عم الخرم ب5 جنيه و كمان هو غلط فى خرم معرفش يعمله كويس بالخبور كان عايز يحسبه على قلت له عشرين جنية راح قال طيب بصراحة نصاب محترم قلت كنت حطيت شمبر احسن و من ساعتها اذا حصل حاجة اغير بشمبر على طول لغاية لما كلها بقت شمبر و بقت لا تهوى العجلة معى تقريبا خالص
كل ده و انا عربيتي 125 بولندى :) يمكن علشان كده رخص على شوية بس كنت عايز اسال سؤال فنى اظن الجنوط الاسبور ممكن يتحط لها شمبر صح ولة لا؟؟