عينك في نص راسك مع اى صنايعي !!؟؟

**KemozTanta** · 07-05-2011 02:32 PM

اول درس اتعلمتة النهاردة بعد ماكنت بتعامل بعشم وبحسن نيه و مراضي اى صنايعي يشتغل في العربية مبفاصلش يعني والكلام دا...

عربيتي لانوس 2 و سيبت العربية مع السمكري اللي بتعامل معاه بقالي سنه يوم كامل و فكيت اكصدام واستعديلته وكان جواه فله الاصلي بتاعتة سليمة زي الفل والحمد لله اني وقفت وانا بشوف الاكصدام وهو بيتفك عشان اعرف ايه اللي جواه

استلمت العربية يوميها بالليل وبعد يومين جت في دماغي ابص ع الفلة دي موجودة واشيك عليها .. المفأجاه اني الاقيها متشالة والاكصدام ع الحديد

رجعتله قولتله ياسطي الفلة متركبة من قبل مايبص قالي اه اكيد ماهو الاكصدام معدول وتمام ولو مش موجودة مش هيبقي كدا.. طبعا لو مكنتش بصيت بعينيا كنت صدقته ومشيت!!

قولتله طيب انزل بص عليها كدا يمكن انا مش شايفها
نزل وبص قالي اية دا ؟ اه مش موجودة ؟؟ فين الواد ومش عارف اية ؟؟

جية الواد قولتله فين الفلة اللي طلعناها من الاكصدام وهو بيتفك قالي معلش ومش عارف اية هدورلك عليها بكرة ان شاء الله اركبهالك معلش بكره الصبح تعلالي اركبهالك اصل انا مش عارف هي فين دلوقتي؟؟
قولتله ماشي وعلي معاد بكرة انها تركب

و الي حصل دا كان بيحصل معايا قبل كدا في حاجات رفايع مثلا تسيب لفة شيكرتون تتاخد او فوطة صفرا تتاخد ويشتغلوا بيها او مثلا علبة شحم تتاخد وكدا انما توصل لفبره الاكصدام تتشال هيلا بيلا كدا!!
الخلاصة.. العربية متتسابش لحد ابدا و الشغل يتعمل وانت واقف ولو حكمت الظروف تسيبها .. تعرف اللي هيتفك اية و تشيك عليه بعد مايركب تاني.

**hpxp** · 07-05-2011 02:44 PM

كلام جميل حتي لو شبخ متامنش

**fouaa** · 07-05-2011 02:49 PM

والله هو فعلا لازم الواحد يبقى واقف على حاجتو وواخد بالو تماما ويبقى عارف ايه البايظ بالظبط وايه السليم عشان الصنيعيه عاوزين كده مهما كانو

**w-m-a** · 07-05-2011 02:50 PM

الحمد لله انها جت على الفله
انا ما لقتش المصفحه بتاعه الموتور وقالى الواد ابن ............... نسيها معلهش !!!

**KemozTanta** · 07-05-2011 02:59 PM

عندكم حق والحمد لله انها جت علي كدا ولو انها مزعلاني لان حاجة العربية الاصلي دي متتعوضش مهما كانت .. الصنايعي طماااااااااع ومهما تبقي زبونة وعربيتك معاه لازم يطلعلة مصلحة من اى حاجة فيها..

**heshamzaky** · 07-05-2011 03:12 PM

هو يفضل أنك تبقى واقف على أيد الصنايعى و هو شغال بس هو حا يتخنق منك و مش عاوز كدة . أنا مش حا أقول أنة بيسرق بس أهمال نوع من أنواع الاهمال أنا لو الراجل فك حاجة عينى معاة بعد فك كام مسمار و صامولة و ساعت التقفيل بتأكد أن كل حاجة ركبت ب العدد بعينى و شايل معايا مغناطيس لما بيفك صواميل لو لقيتة بيرمى بأهمال بحط المغناطيس على صاج العربية و علية الصواميل و الورد بتاعت الصواميل لان الصامولة الاصلية أنظف 100 مرة من الصامولة الى بتتباع فى أى محل

**smsm_cato** · 07-05-2011 03:26 PM

علشان كده انا ببقى واقف مع الصنايعيى علطول وان شال حاجة علشان يغيرها استفسر شالها ليه مش شيل وغير وخلاص

**wsamir** · 07-05-2011 03:44 PM

معظم الصنايعية معدومى الضمير الا ما رحم ربى ياما حصل معايا حاجات من دى كتير

SS · 07-05-2011 10:28 PM

المشاركة الأصلية كتبت بواسطة romio4lovee

جية الواد قولتله فين الفلة اللي طلعناها من الاكصدام وهو بيتفك قالي معلش ومش عارف اية هدورلك عليها بكرة ان شاء الله اركبهالك معلش بكره الصبح تعلالي اركبهالك اصل انا مش عارف هي فين دلوقتي؟؟
قولتله ماشي وعلي معاد بكرة انها تركب

اولاً: ما تضايقش و ادينا بنتعلم

ثانياً: هو مش بكرة الاحد؟؟ شغالين بكرة يعنى؟

ثالثأً: مفيش حاجة اسمها بكرة...احنا فى النهاردة ...يعنى حتى لو ما عملش الشغل و هيأجله

مش من المفروض انك تسيب حاجة طالما تقدر تخليها معاك ...و طالما هو مش هيعمل فيها شغل

تجنباً لانها تتبدل او يحصل فيهل تلفيات نتيجة الاهمال و الغباء