تجربه قياده تيدا .....!

**WalidAdel** · 08-05-2011 05:53 PM

تم تجربة قيادة نيسان تيدا بتاعة احمد مصطفي علي طريق الاسماعليه ... محبه يعني
انطباعي عن العربيه كالأتي :

انا سواقتي كانت عنيفه بعض الشئ عليها علشان احاول اعرف قدرات العربيه ايه بالظبط في الفتره الصغيره دي

العربيه كويسه جدا ماشاء الله في التسارع بتاعها بالرغم انها اوتوماتيك لكن اوتوماتيك فايق وقوى مش بطه

وانت سايق ممكن تشغل الاوفر درايف وانت علي 100 مثلا هايقفلك النقله الرابعه و التسارع هايكون كويس عايز اكتر ممكن تحرك عصاية الفتيس نفسها للتاني هتلاقي عربيه تانيه خالص بس كل دا وانت علي 90 مش ازيد من كده علشان هتلاقي الار بي ام عالي (ماختش بالي كام)

مافيش تأخير في استجابة العربيه بمعني لما تقفل الاوفر درايف بتلاقي رد الفعل علطول و في عربيات بيبقي في تأخير كده 6-7 ثواني ولا حاجه انا بقيسها كأني سايق مانيوال و سقط نقله فالفتره بتاعة حركة رجلي علي الدبرياج مع نقلة للغيار الاقل مع رفع رجلي حوالي 3-5 ثواني

الباور بتاع العربيه باور كهرباء بس مش يخوف زى باقى العربيات الكورى بس حساس اوي لدرجه انك ممكن تاخد مطب هوا هتلاقي الدركسيون اتحرك معاك حبه كده او ممكن وانت بتكبس فرامل هتلاقيه اتحرك نتيجه لتحرك جسمك انت

في ناس ممكن تحس بكده و في ناس لأ عادي طبيعة البني ادم نفسه فلازم تكون مثبت ايدك كويس و متحكم في الطاره كويس (مع التعود اكيد هاتروح الحكايه دي)

طبعا العربيه بسبب علوها فانت حاسس انك طاير بعض الشئ و ماتديكش احساس انك متحكم في العربيه بنسبة 100% علي سرعات عاليه

فوق 160 في عربيات وانت قاعد علي الكرسي تحس انك قاعد قريب من الاسفلت و العربيه مرييحه كده علي الطريق و انت متحكم انما في التبدا انا حاسس اني قاعد فوق حبه بيني و بين الاسفلت مسافه ملحوظه (جيت اخد غرزه علي 160 لاقيتني مقلق كده فهديت طبعا حبه)

الفرامل كويسه جدا علي سرعات عاليه بس طبعا لما تيجي تدوس تكبس بتلاقيك اتكبيت لقدام حبه كده و دا لعلوا جسم العربيه و علو العربيه نفسها عن الارض بردوا

طبعا الصالون واسع و القاعده المريحه والكراسى اريح و الاضاءه الخفيفه اللي في الصالون شيك و التكييف قوى و عزل العربيه انك قاعد مش سامع حاجه ولا حتي سامع صوت الموتور ولا اي حاجه ماشاء الله

العربيه تعتبر صفقه رابحه جدا علي سعرها بس دا للناس اللي مش بتجري اخرها 140 مثلا

ملحوظه: انا مش بعمل مقارنه بينها و بين الصني انا بنظر للعربيه بنظره حياديه جدا من حيث السعر مقابل الامكانيات مع الاخذ في الاعتبار اني واحد بحب الجري و كل عربيه و ليها اسلوبها في السواقه لما بركب شيروكي ليبرتي مش بعدي ال 140 غير لما اركب اوكتافيا a5 فوجب التوضيح علشان الناس تفهم تقيمى كان مبنى على اساس ايه

ارجوا اني مكنش طولت عليكم

**Ahmed.TV** · 08-05-2011 07:08 PM

ياخبر يا محمد باشا العربية تحت امرك وعربيتك يا فندم

هو سهانى لان كنت بتكلم فى التليفون بينى وبينك فى جزئية تسقيط على التانى والعربية كانت جايبة 100 او 110 فعلا

بس العربية كانت استجابتها بسم الله ماشاء الله

وقالى انه اخد غرزة غير بتاعت 160 وكان واخدها على ما اعتقد 130 وكانت العربية ممتازة معاه وماخدتش بالى انه اخدها كمان بردوا لانى كنت بتكلم فى التليفون
بس كويس على التيد وارتفاعها العالى انه اخد بيها غرزة على 160 وكان اكيد لازم يكون مقلق , دى غرزة على 160 بعربية سقفها عالى وجنط 15

والجرى والثبات فوق ال140 محتاج لجنط 16 وباذن الله ناوى اجيبه واحتمال اوطى السوست بتعتها ,, بس استجابة الماتور قوى وتسارعها هايل وتجميعه سريع جدا

هى العربية كمان باذن الله لما اعمل ظبط زوايا حخلى وليد يسوقها عشان يجرب تانى , بس اكيد وقتها حيكون بحنية
هو اخد باله ان الطارة عندى معوجة ومحتاجة ظبط زوايا

موضوع حساسية الدركيسيون فى الاستجابات مع وليد عشان نظرا للدريكسيون باور كهرباء مش زيت زى الصنى , ومع ذلك بالنسبة الى اللى متعود عليها مفيش فيها حاجة , ولما اخليه يسوق كام مرة معايا حيتعود عليها هو كمان
بس مفيش فيه خطر ومش اللى هو ناعم اوى لدرجة الناس تقلق لان مطبات اللى اخدناها على سرعة كبيرة كانت مراجيح بصراحة ههههههههه

وبخصوص الفرامل انها تكب بيك لقدام , ممكن يكون فى حاجة فى الفرامل عاوزة تتظبط لان مرة ميكانيكى قال الكلام ده لما كان معايا البولو وظبطلى ريجالاش الفرامل عشان توزيع الفرامل كان وقتها رامى على قدام

غير ان انا داخل على صيانة 40 الف وغير تيل فرامل

وباذن الله حنخلى وليد يجرب عربية حد كمان من زمايلنا تكون معدتش 5000 او 10 االاف كيلو عشان تكون لسه بشوكها

بس بصراحة استمتعت مع وليد فى السواقة جدا , والمقابلات والتجارب الواحد مهما بيعيش بيتعلم وبيجرب فيها حاجات بتفيد بصراحة , وانا استفدت من وليد بصراحة فى حاجات كتير

والعربية عربيتك يا ويل اعمل فيها اللى انت عايزه

وربنا يحفظك من كل شر ويكفيه شر الطريق

تحياتى

**WalidAdel** · 08-05-2011 07:16 PM

المشاركة الأصلية كتبت بواسطة ahmed.tv

والعربية عربيتك يا ويل اعمل فيها اللى انت عايزه

وربنا يحفظه من كل شر ويكفيه شر الطريق

تحياتى

قشطه عليك ياصحبي دا العشم بردوا

**SonaSteel** · 08-05-2011 09:27 PM

وانا وانا وانا
خلاص .... مش هنام يومين بس اخد لفة زي بتاعة وليد ديه ..... ماليش دعوة عااااااااااااااااااا
ويكون وليد راكب الصني واعدي منه ... هههههههههههه
تبدل يابو حمييييييييييد :))

**WalidAdel** · 09-05-2011 02:19 AM

المشاركة الأصلية كتبت بواسطة mohamednagib

تمام يا رجالة النيسان .... مش عارفين تقولولي .. كنت قابلتكم على اسماعلية الصحراوي .... تتعوض يا حبيايب ان شاء الله ... بس لما تكونو عاوزين تعدو من اسماعلية الصحراوي تاني ... لازم يقطع كرته :))))))))

قطعناها ياباشا ب 2 جنيه كمان و قطعناها مرتين ايه رايك بقي

انت اي حاجه راشق فيها كده ياسحس

**No Comment** · 09-05-2011 12:48 PM

لاقيتكم بتوزعوا عربياتكم على بعض فى تجارب قيادة ... قولت ازاحم يمكن أخد لفة .
بس هتكون من وليد بحكم انه جرب عربيتى قبل كدة ... وكمان لانى مجربتش سواقة الميجان قبل كدة .

**BassamHafez** · 09-05-2011 01:20 PM

تجربه جميله فعلا

وانا على فكرة متطوع لوليد بتجربه عربيتي بما انه جرب عربيه احمد وها يقدر يحكم اذا كان في فرق في الاتنين ولا لا

ويكون كمان احمد معانا عشان نعرف نتيجه التجربه

وياريت نرتبها في اقرب وقت عشان انا فعلا عايز حد يكون جرب عربيه غير عربيتي عشان يقول الفرق لو في فعلا ولا لا لان اليومين دول انا حاسس ان العربيه مش زي الاول

يا ريت يا وليد ويا احمد نرتب الموضوع في اقرب وقت

ولو عايزين مكان واسع انا ساكن في التجمع وممكن نتقابل هناك عشان يبقى عندنا الدائري او شارع التسعين او غيرة لسهوله التجربه

انا عربيتي حاليا عامله 13000

**egypt0777** · 09-05-2011 08:07 PM

وليد

ممكن تعمل مقارنة بين سواقة الصنى و التيدى

بما انك جربت الاتنين

-

الموضوع: تجربه قياده تيدا .....!

LinkBack

أدوات الموضوع

عرض

-

-

-

المواضيع المتشابهه

تجربه قياده الضفدعه احم قصدي الفوليستر و يا لها من تجربه

تجربه (مش) قياده bmw 750 2010

تجربه قياده اسبيرانزا m11

تجربه قياده جين 2 2009

الكلمات الدلالية لهذا الموضوع

المفضلات

المفضلات

ضوابط المشاركة