الموضوع: كل ثورة و انتوا طيبين

مش قادر افهم ليه بس نظره التخوين دى للجيش
موضوع المصالحه او القانون المزمع انشاؤه ياباشا هذا القانون لا يعفى موظف الدوله الذى ساهم بفساده فى ضياع اموال الدوله ولكن هذا القانون يتعامل مع رجل الاعمال الى اضطر انه يدفع من تحت لتحت عشان يمشى اموره عشان النظام كان فارض كده كله فساد فى فساد فطبيعى اليوم انت امام دوله قادمه على الافلاس و ثوره جياع طبعا هتقلولى ده الكلام الى الجيش بيخوف الشعب منه اعتقد فعلا من وجهه نظرى ان حجم الدين العام سواء الداخلى او الخارجى بلغ مستويات قياسيه و كذلك الاحتياطى الخاص بالبنك المركزى لن يصمد طويلا اضافه الى الاضرابات الفئويه و خشيه رجال الاعمال على الاستثمار فى ظل مناخ انتقامى و تصفيه حسابات و كمان البلد مفيش فيها امن ولا امان يبقى مفيش لا استثمارات اجنبيه ولا داخليه يبقى فعلا تدهور اقتصادى ايه المطلوب من الجيش فى المرحله دى شحاته و بيلفوا على دول العالم و المنظمات الدوليه و الخليج عشان يلموا كام مليار يسند البلد شغل محدش فى البلد عايز يشتغل الناس اتعودت على الاعتصامات و الاضرابات سجن لرجال الاعمال ده الى حاصل ومفيش رجل اعمال عايز يشتغل و الكل خايف يجى فى الرجلين يبقى الحل اننا ننزل التحرير و نعمل ثوره جديده و نجيب البلد على الجلده و نبقى خلصنا من مصر و خليها بقا اى دوله فقرانه مهى طول عمرها كده او ممكن نخش فى مطاحانات وفتنه طائفيه و الناس تترحم على المخلوع و على ايامه
ما يقوم به الجيش اليوم هو حصيله جهد ملموس لرجال اتت بهم الثوره و يتحملون مسئوليه البلد المفروض نعطيهم الفرصه كامله ومش كل واحد هيحكم البلد بمزاجه
سوزان مبارك اخلى سبيلها ايه المشكله فى كده ومن امتى كان القانون المفروض انه بينتقم من المتهم ياسيدى الفاضل القانون قاعده عامه مجرده بتطبيق على جميع الناس ولا تفرق بين متهم عادى و متهم سوبر ستار وبعدين سوزان اخلى سبيلها بعدما قامت بعمل توكيلات خاصه تبيح لجهاز الكسب غير المشروع نقل جميع ممتلكاتها الى الدوله كما انها لها محل اقامه معلوم ولا يخشى عليها من الهرب اضافه الى كبر سنها كل تلك الحالات تتيح للقاضى ان يخلى سبيلها على ذمه القضيه اى انها لم تتحصل على براءه بعد بل كل ما فى الامر انها غير مقبوض عليها و غير محبوسه لحين صدور حكم ضدها
اتفق معاك فى جزئيه سوء اختيار المحافظين و خاصه لوءات الشرطه من جهاز امن الدوله السابق و مساعدين العادلى سوء اختيار و تخبط غير طبيعى و معاك فى انه يتعين اقالتهم
الى حصل امام ماسبيرو و الغوغاء الى قاطعين الطريق عشان فى دماغهم ان البلد دى فرده وانهم يقدروا يعملوا الى هم عايزينه و البابا شنوده قلهم فضوا الاعتصام ونفضوا لكلامه لا اعتقد ان الجيش متورط فى ذلك
ما حصل من محاوله اقتحام سفاره اليهود فى مصر لا اعتقج ايضا ان الجيش وراء ذلك بل تلك فوضى الثوره ومنطق كل واحد يعمل الى هوا عايزه من وجهه نظره و احترام لهيبه الدوله التى فقدت و لن تعود الا بعدما يشعر الجميع بقرب النهايه
تعامل قوات الشرطه مع المتظاهرين تعامل طبيعى ماذا تنتظر من غواغائين يرغبون فى حرق شفاره و احراج مصر و اظاهرها بانها دوله ضعيفه ونخش فى مشكله دبلوماسيه وقرف وبالرغم من ذلك لن تحل مشكله فلسطين حتى ولو حرقنا السفاره نفسها
انا احترمت المشير امبارح لما اتكلم بمنتهى الصراحه و مزوقش الكلام ولم يطالب بشى مستحيل كل الى طلبه الناس تشتغل و عجله الاقتصاد تدور و الناس تحط مصر فى عنيهم مش تحت الجزمه
الجيش المصرى جيش وطنى وحرام علينا نظلمه

مفيش حد صدر له حكم يالبراءه حتى الان وانما اخلى سبيله من الحبس الاحتياطى يعنى عى ذمه القضاء حنى الان
قولنين المصالحه تلزم برد الاموال و تعفى فقط من العقوبه وحضرتك هذا النظام معمول به اساسا فى القانون الجنائى العادى وحضرتك لو حررت شيك بدون رصيد وتحرك عنه جنحه تقدر تتصالح وتتدفع قيمه الشيك و يصدر لك حكم بانقضاء العقوبه الجنائيه بالتصالح
يبقى الدوله لا تشذ عما هو متبع لان الغايه فى هذه المرحله ليست الانتقام بقدر عوده الحياه مره اخرى الى طبيعتها اضافه الى ذلك ان القائمين على الدوله فى تلك المرحله هم من تسببوا فى ذلك وليس المستثمرين فكما هو معلوم المال السايب يعلم السرقه فحضرتك المفروض نحاسب مسئول الدوله الى محافظش على المال بل و عرض هذا المال الى السرقه اما المستثمر فيلزم برد ما تحصل عليه من الدوله ويكتفى بذلك دون حاجه لحبسه
والمرحله الحاليه محتاجه عمل وليس انتقام وارجو من حضرتك مراجعه الثوره الفرنسيه و كيف انها اعدمت الملك و حاشيته وكتب عنها التاريخ انها كانت عنصريه
انا لست ضد كل من اخطا فى حق هذه الامه ان يعاقب ولكن ارجو ان ناخذ فى الاعتبار ان الفساد كان ثمه الدوله السابقه وان من كان قائم على تلك الدوله هو من ساعد على هذا الافساد وبالتالى لا ينبغى ان نساوى بين من ساعد على الفساد و من استفاد من هذا الفساد لانه لو لم يكن هناك من اتاح فرصه الفساد لما وجدنا من استفاد من الفساد
وعلى فكره نظام المصالحه قائم فى دول اوربيه عديده جدا و له اصوله و قواعده و ايضا المجتمع الدولى طبقه فى قضيه لوكربى و الزم ليبيا بدفع تعويضات مقابل رفع العقوبات
وفى النهايه موضوعك موضوع محترم جدا وجهه نظر محترمه وخلافنا فى الراى لا يفسد للود قضيه
خالص شكرى و تقديرى لشخصكم الكريم

إحالة وقائع فساد جديدة ضد سوزان مبارك إلى "الكسب غير المشروع"

الأربعاء، 18 مايو 2011 - 15:33
سوزان مبارك
كتب محمود المملوك وإبراهيم قاسم

أحال النائب العام المستشار الدكتور عبد المجيد محمود ، اليوم الأربعاء، البلاغ المقدم من مصطفى بكرى عضو مجلس الشعب السابق ضد سوزان مبارك حرم الرئيس السابق حسنى مبارك، إلى جهاز الكسب غير المشروع، الذى يتهم فيه سوزان مبارك بإهدار المال العام وتسهيل الاستيلاء عليه من خلال جمعها للتبرعات الخيرية القادمة من المنظمات الإنسانية إلى الجمعية الخيرية التى تترأسها ووضعها فى حساباتها الشخصية.

واستشهد بكرى فى بلاغه بقيام سوزان مبارك بالاستيلاء على المال العام من خلال اعترافها أمام جهاز الكسب غير المشروع، بامتلاكها أرصدة قدرها 20 مليون جنيه حصلت عليها من الجمعيات الخيرية والمنظمات الإنسانية، كونها زوجة الرئيس السابق، وقيامها بالنشاط الاجتماعى والإنسانى، وأضافت أنها سوف تقوم بإعادة تلك الأموال إلى الدولة مرة أخرى، وهو ما تم بالفعل ويثبت جريمة الاستيلاء على المال العام، وطلب فى بلاغه بإحالتها إلى نيابة الأموال العامة حتى تتم محاسبتها على جريمة الاستيلاء على المال العام وأرفق بكرى فى بلاغه عدة حوافظ مستندات.