الموضوع: أضراب الاطباء عن العمل

هل الناس اللى مش موافقة على مبدء الاضطراب قرأت المطالب ؟؟
بالنسبة لموضوع مسنود دى فمعلومة جديدة ليا اتمنى لا تكون صحيحة
لانة لو صح هتبقى مصيبة بكل المقاييس . المفروض بعد الثورة مفيش قرابة والكلام دة !
ربنا يستر .. والله البلد الوحيدة اللى فيها اشياء تحير !!! واللى بيحصل فيها حاجات يشيب لها العقل
مرة يمين مرة شمال .. مرة ف النص لا محصل هنا ولا هنا .. كـ المعلق

المشاركة الأصلية كتبت بواسطة metenawy

انت تحس براحتك لان انا ميهمنيش احساسك؟؟؟ و مش حعلق عليك و المنتدي يعرفني كويس كل واحد فيه ليه علاقة بالثورة ؟اما اني معرفشي المطالب فانا مش محتاجها انا عندي اختي دكتورة ليسا متخرجة بتاخد 200 جنيه و والدي استشاري باطنة يعني مش محتاج اعرف احوال الدكاترة لاني عايشها لكن اعتراضي علي توقيت المطالبة انا شايف ان فيها استغلال لوضع البلد و عدم مراعة لوضعها المالي بنقول 6 اشهر و مافيش احتياطي نقدي بنقول شهر و الاكل حيبتدي يخلص بنقول مقدمين علي قرض من البنك الدولي هل دي ظروف تسمح بالمطالبة دي لكن الشي الوحيد الي انا متفق معاكم فيه انكم لازم تتامنو مش يسيبوكوم بدون امن في المستشفيات

طب الحمد لله ان حضرتك شايف اننا محتاجين نتأمن
طيب ايه رأيك فى ان احنا دوخنا ورا الحكومة السبع دوخات عشان يعملوا فى كل مستشفى نقطة شرطة مسلحة مكونة من ظابط و اتنين عساكر وبرده مفيش فايدة -على فكرة عدد مستشفيات مصر مش كبير و الداخلية فيها عدد عمالة ما شاء الله .... يعنى مش هيكلف البلد حاجة -
فمكنش فيه حل الا الاضراب
و النتيجة اننا اخدنا وعود من رئاسة الوزرا بتأمين المستشفيات و عليه تم تعليق الاضراب
على فكرة احنا من يوم الثورة لغاية النهاردة بيحصل اعتداءات على المستشفيات
فقولى بالله عليك ترضى لاختك الدكتورة انها تتشتم او تتضرب او حد يمد ايده عليها بطريقة غير لائقة ....... هل ساعتها تانى يوم بعد الاعتداء عليها هتقولها روحى الشغل عشان خاطر عجلة الانتاج تمشى ولا هتقولها يلعن ابو الشغل اللى يعمل فى صاحبه كده و هتخليها تعد فى البيت حفاظا على حياتها قبل كرامتها

وزى مقولت قبل كده ان المطالب دى لا تعطل عجلة الانتاج
لو الشعب موافق عل خصخصة الصحة و ان السرقة تفضل ماشية زى مهيا فى وزارة الصحة خلى الوزير الفاسد قاعد
لو الشعب هيستحمل ان الميزانية بتاعة الصحة تفضل زى ماهية و ان الناس الغلابة تفضل تموت كل يوم- الاعمار بيد الله - بسبب عدم و جود امكانيات للعلاج يبقا خلوا الصحة زى مهيا
لو ترضى ان الدكاترة يتم الاعتداء عليهم و ممكن توصل حالة الانفلات الامنى فى المستشفيات للقتل او اغتصاب طبيبة او ممرضة ..... يبقى خليها تولع - على فكرة غير التهديد بالسلاح و الضرب و الشتايم تم اختطاف طبيب من الاستقبال باحد المستشفيات و الشرطة والجيش لم يتحرك لهم ساكن -
بخصوص الاجور احنا مطلبناش لنفسنا بس احنا قولنا هيكل عادل للاجور
وعلى فكرة انا بشتغل طبيب بالصحة بقالى تلات سنين و مرتبى الاجمالى بعد علاوة ايريل 288 جنيه فى الشهر
لو فيه موظف فى الدولة مؤهل زى وبياخد اقل منى يا ريت تقولى لانى مش لاقى
وليه البلد جاية على الغلابة اللى زينا و مش بتقلل من مرتبات بقيت الجهات .... ولا نظرية التقشف دى علينا احنا بس
اخر حاجة ممكن تقولى ازاى اقدر اعيش ب 288 جنيه فى الشهر لو انت شايف انى اقدر استنى