الموضوع: القول الفصل فى عنوان مركز الصفا للكربراتير

أنا روحت المركز انهارده الحمد لله بس السكة كانت طويلة و زحمة و خدت وقت و كان فيه حفر فعلا في شارع مختار اباظة ده وإضطريت إني الف من الشارع اللي بعده بس الحمد لله وصلت ...

و أول ما دخلت كان فيه واحد قاعد على مكتب و كمبيوتر بيديك ورقة فيها دورك و بياخد رقم العربية و يديك ورقة فعلا فيها المشاكل الشائعة زي طنطيش و تأخر في الدوارة و بوجهات بتهبب و استهلاك بنزين عالي و كده وإنت بتعلم عالمشاكل اللي عندك و بيجي واحد يسألك برده بتشتكي من إيه ... و بعدها بيجيب جهاز قياس العادم و يقيسه و بيكتب في ورقة المشاكل القراءات بتاعة الجهاز ...

من قبل مايبتدي أي شغل قال لي إن المصنعية 85 جنيه ده غير تمن أي قطع غيار لو احتجناها...

بعد كده بيبعتلك عامل عشان يبتدي يشتغل في العربية و فك الكربيراتير و خدو في اوضة كده بيشتغل فيها يفكه ينضفه و يصلحه لو فيه تصليح و قعد حوالي ساعة كده ..

في الوقت ده أنا طلعت الإستراحة لقيتها كويسة و نضيفة ومكيفة و فيها تليفزيون و فيها إزاز تقدر تبص على عربيتك لو شغالين فيها ... و هو عامةً المركز كله مستواه كويس و فيه مصلى و كافيتريا

و لما لقيته رجع للعربية بعد ما خلص الكربيراتير نزلت اقف معاه أشوفه بيعمل إيه و ركب الكربيراتير و قعد يظبته بالجهاز و يشوفه مع التكيف و كده و قال لي إن الكاربيراتير سليم و البيكات سليمة و ماكانش محتاج حاجة تتغير كان محتاج بس يتنضف كويس عشان مجاري الهوا كانت مسدودة فـكان البنزين مابيتحرقش كويس و غيرلي البوجيهات بس كانت معايا مش من عندهم

بعدها دفعت الحساب في مكتب جوه كان 85 زي ما قال لي قبل الشغل و اداني الفاتورة عشان لما أروح في خلال اسبوعين عشان يعيده على ظبط الكربيراتير و طلعت لقيته طلع العربية عالباب استلمتها و مشيت و حسيت الموتور بقى انعم شوية و السحب بقى أحسن شوية و لسة بقى هشوف استهلاك البنزين بقى عامل إيه والبوجهات هتهبب ولا لأ لإن دول كانوا المشكلتين الاساسيتين عندي

و في النهاية بشكر الناس اللي كانت بترد على اسئلتي و وصفتلي المكان

المشاركة الأصلية كتبت بواسطة aboassem

واحنا يا سيدي متشكرين علي الافادة وشرح احوال العمل بالمركز
وإن شاء الله تكون بفايدة ولاستهلاك يطلع كويس

يا باشا العفو على إيه ده أقل واجب بعد مساعدة الناس الحلوة دي و إن شاء الله يجي بفايدة

بسم الله الرحمن الرحيم
يا جماعة وصفة فوزيه: شارع جسر السويس بعـد ســـوق القنــــال فـى عمـــارات إسمهــا عمارات الفاروقيــــة فيها مطعم الشبراوي بالضبط أدامه فى أولاد رجب خش الشارع بتـاع أولاد رجب حتى نهـايته مـع سـنه بسيطـه يميـن (مركز الصفا لتحليل ومعالجة العوادم)