الموضوع: اللوجان مش مريحانى

اولا مرحبا بك فى قسم اللوجان
انا مش عارف ايه حكاية حبايبنا الجداد معانا

المشاركة الأصلية كتبت بواسطة mr_7oda

السلام عليكم يا جماعة

انا الحمد لله معايا لوجان 2011 فول اوبشن وعاملة حوالى 20 الف كيلو ولسة عاملها صيانة ال20

دعونا بس الاول نتفق انى بأمانة ربنا لحد دلوقتى العربية مش قابلها .... يمكن علشان العربية عالية وانا مش بحب العربيات العالية (طبعا ده ميزة علشان هضاب مصر العظمى) وكمان وانا راكب لا شايف كابود ولا شنطة ومقضيها تخمين ابعاد

طبعا العلو دية ميزه عظيمه بالنسبه ليا وممكن تكون عيب عند البعض ومعاك حق فى ابعاد الكبوت والشنطه بس كله بتتعود عليه

المهم .... دلوقتى العربية عندى فيها حاجات كده مش عارف ده عندى انا بس ولا كل اللوجان كده :

1- اول حاجة العربية فيها حاجة غريبة ... ان لو حصل موقف ورحت فارك بالعربية من الثبات .... بلاقى العربية حدفت يمين بطريقة بشعة والدركسيون بفقد التحكم فيه ... الموقف ده حصلى مرتين ... مرة حصلت حادثة قدامى والحمد لله لميت نفسى قبل لما البس فى الناس وبعد شوية الناس زنقت عليا فروحت فارك لاقيت العربية حدفت يمين بطريقة بشعة والدركسيون فقدت التحكم فيه .... وحصلى موقف تانى برضه وحصلت نفس الظاهرة ده

بلاش حكاية الفرك الكتير دية والنبى احسن كده غلط عليك وعلى العربيه وغالبا كان فيه رمله تحت العجله اليمين فده سبب حدفه للعربيه لان العجله لفت على نفسها فى مكانها والعجله الشمال كملت

2-الدركسيون بتاع العربية غريب جداااا .... تقيل وانا ماشى على السرعات البطيئة (اقول يا واد استحمل ده بيديك ثبات) .... وعلى السرعات العالية بلاقيه خفيف جداااا ... وكمان لما ماشى على سرعة مثلا 100-120 والارض اللى تحتيك مش منتظمة والاسفلت متعرج ... بلاقى الدركسيون بيمشى مع الاسفلت مش مع ايديا وطبعا ده خطر على السرعات ده وبيخلى العربية عاوزة تعوم

ده طبيعى طبعا مفيش اى مشكله الباور بتاعها زيت مش كهربا طبعا مع السرعه العاليه بيخف وعلى فكره انا بسوق وبلف الدركيسون بايد واحده مش عارف ليه الناس بتشتكى من الباور هو صحيح مش بخفة اللانوس اللى سقتها فعلا بس برده ناعم وكويس
وعادى برده ان الدركسيون يلف مع الاسفلت

3- فيه حاجة عندى شمال العربية ورا فى الشنطة .... كل لما بمشى بسرعة بلاقيها طقت بصوت عالى جدا لدرجة انى بشك ان الكاوتش حصله حاجة ... والموضوع ده اتكرر اكتر من مرة ومش عارف ايه السبب ( انا مش بزود عن 140 كحد اقصى )

مش عارف بصراحه

4-تكيف العربية كان تلاجة بصراحة ربنا فى الاول .... ولما العربية كملت ال10 الاف فضت شحن .... وشحناها فى التوكيل ... ومن ساعتها التكيف مش بيسقع زى الاول والمهندس اللى هناك لما روحت اعمل صيانة ال20 بيقولى انه شغال بكفاءة

لازم تشغل التكييف كل اسبوع ياما حيسرب فريون ويحتاج اعادة شحن

5-سحب العربية بعد صيانة ال20 بقى وحش جدا وبالذات مع التكيف العربية بقت بطة... مش عارف ايه اللى حصل وايه اللى ممكن اعمله .... انا خايف لايكون عملوا حاجة فى التوكيل غلط

احتمال البنزين وحش وجت صدفه معاك لكن سحبها مع التكييف كويس جدا مش بطه يعنى

6-الفرامل عندى بتصفر ولما روحت صبانة ال20 قالولى ان فيه شوية طين على الطنبورة ونضفناها ..... وطبعا الصفارة لسة شغالة ... وده بتحصل لما بفرمل بالراحة مش جامد .... وكفاءة الفرامل عندى لما بشغل التكيف بتضيع وبحس ان العربية مش عاوزة تقف

الفرامل ملهاش علاقه بالتكييف ابدا ده احساس عندك الله اعلم سببه ايه والصفاره ياما تيل عاوز يتغير او رمله وتراب على الطنابير وعاوز يتنضف

7-حاجة اخيرة .... عندى الصالون بيطقطق دايما مش عارف ليه ... وده بيجبلى احباط وبيحسسنى انى مركب طابلوه عمولة مش عارف ازاى يعنى والعربية تقريبا زيرة

الصالون بيطقطق ازاى مش فاهم الصوت من التابلوه ولا منين

بجد يا جماعة الموضوع ده سرد لعيوب فردية بتواجهنى فى العربية بتاعتى .... عاوز بس ماشورتكم فيها لانى بدأت اقفل من العربية وانا حاسس ان العربية كويسة بدليل انها منتشرة انتشار جامد ما شاء الله

نصيحتى ليك طالما قفلت منها شوفلها بيعه وسعرها حلو فى اعادة الييع 2010 بتعمل 60 الف للفابريكه لان الواحد لما بيقفل من حاجه ومش طايقها بيشوف فيها القطط الفطسانه ( على راى المثل حبيبك يبلعلك الزلط وعدوك يتمنالك الغلط )

بالتوفيق ان شاء الله

اتمنى لك التوفيق وواضح ان حضرتك اول مره تسوق عربيات كانت مع اللوجان لان معظم مشاكلك حاجه عاديه فى اى عربيه واتمنى انى اكون افدتك بشىء

طبعا الردود كلها استاذ مصطفى ذكرها و مش هزود بس بالنسبة لنقطة 3 الخاصة بالطقطقة أتاكد أن الكوريك و العدة راكبة كويس و مش بتتحرك لأن ممكن تكون هي اللي بتعمل الصوت

و أهلا بيك معانا في القسم :)