الموضوع: أفكار ذكية تخلى صيانة اللوجان إقتصادية

المشاركة الأصلية كتبت بواسطة hobby10

حضرتك وضحتلى نقط كتير ومهمة
بس الفكرة فى الفرق بين بره والتوكيل مثلا فى صيانة ال 20000 من كلام بعض الاعضاء وفى حالة شراء قطع الغيار الاصلية من التوكيل برضه حيتم توفير 200 - 300 جنيه

ايه رأيك فى الحالة دى طيب قطع غيار اصلية حتى الفلاتر بس تركيبها بره حيوفر ضريبة ومصنعية اللى هى حوالى 200 او 300 جنيه ... هل ده ممكن يكون حل معقول لان ده اللى فى دماغى حاليا للمستقبل

واعتقد ان قطع الغيار كده حيبقى ليها ضمانها برضه لمجرد الشراء من فرع التوكيل ... صح ؟

اما بالنسبة للحاجات اللى ممكن تحتاج كشف احتياطى فعندك حق وانا كان نفسى الاعضاء اللى عندهم خبرة يفيدونا فى ايه الحاجات اللى محتاجة تتبص عليها كل عدد كيلوات معينة زى مثلا التيل وهكذا بحيث حتى الواحد لو بيعمل الشغل بره يبقى فاهم احتياطى يبص على ايه وهكذا بغض النظر عن معرفة او عدم معرفة الميكانيكى اللى شغال معاه


اخر حاجة هل التوكيل بعد الضمان ما يخلص هل لو عند حضرتك اى ملحوظة او مشكلة خارج جدول الصيانة المحدد واللى تكلفته معروفة ... هل بيتم اضافة تكلفة للحاجة دى ؟؟ .... زى مثلا تربيط عفشة ظبط التكييف صوت فى اى حاجة .... اين كان يعنى كل الحاجات دى اللى الواحد بيطلبها فى الصيانات داخل الضمان وفى الاخر بيدفع تمن الصيانة بس .. ايه نظامها


انا اكيد فى انتظار رد حضرتك عليا يمكن يكون تفكيرى مش مظبوط فى النقطة دى

متهيقلى الكلام ده يوضح اد ايه ضرورى ان كل واحد فينا يبقى عنده ناس معينة ميكانيكى كهربائى بتاع تكييف شكمان وهكذا وقت اللزوم والحاجة ونبقى متفقين عليهم انهم كويسين لوقت الضرورة

شكراا

شــــوف حضــــرتك :

1 - أنا بأعمل صيانه كل 5000 كيلو ، يعنى بمعدل كل 3 أو 4 شهور أو أكتر ، أنا لو سلمت إن فرق ال 200 أو 300 جنيه دا مظبوط ، فدا معناه إنى هأتحمل فى الشهر تكلفه زياده حوالى 75 : 100 جنيه ، من وجهة نظرى أنا إن الأمان يستحق التكلفه الشهريه الزياده ، مقابل إنى أكون مطمن + محدش يفتى ويخترع ويجرب فى عربيتى + سعر إعادة البيع لعربيتى هيكون مجزى طالما صيانتها الدوريه منتظمه مع التوكيل + الميزات الاضافيه زى تربيط العفشه ومراجعات المساعدين والسيور واختبار الكهربا وفحص الفرامل وخلافه + دقة المواعيد + الاحترام + النضافه .

2 - لو حضرتك إشتريت قطع غيار أصليه من التوكيل ، الضمان بيكون سارى فقط فى حالة تركيب القطعه بمعرفة التوكيل ، ودا طبعا كلام منطقى ومعقول ، هما التوكيل ازاى يضمنوا الميكانيكى ، ممكن يركب القطعه غلط بطريقه تأثر على عمرها وأدائها وتأثر على أداء العربيه كلها ، وممكن يركب حاجه ويلطش حاجه تانيه ودى حصلت معايا كتير ، آخر مره كنت مع واحد صاحبى بيركب كارتيرة رفرف يمين ، وبعد ما استلم لاقينا الفوانيس اليمين مش شغالين ، وبعد مراجعة الكهربائى كانت النتيجه : تغيير لمبة فانوس الشبوره إللى كسرها الصنايعى ب 35 جنيه + 25 جنيه أتعاب كهربائى فك الفانوسين وغير اللمبه المحروقه وعاد تركيبهم وتوصيل الفيش المفصوله وظبط نور الفانوس اليمين تانى ( مسافة وارتفاع النور على الطريق - يعنى ميزان الاضاءه ) + خسارة اللمبه الأصليه لفانوس الشبوره + الوقت والانتظار .

3 - الحاجات البسيطه التوكيل مش بيحاسب عليها خصوصا لو عربيتك بره الضمان يعنى بتدفع تمن كل حاجه بتعملها ، وبالتالى بتنفع التوكيل ، أنا شخصيا آخر مره كان الايريال واقع ، فى التوكيل فكو تنجيد السقف عشان يربطوه وعادوا تركيب التنجيد بعد ما ركبوا الايريال وقبل ما يسلمونى جربوا لمبات الاضاءه اللى راكبه فى سقف العربيه للتأكيد إن كل حاجه صح من غير أى مصنعيات + كان فيه جزء من التابلوه مش بينور عملوا فحص وغيروا لمبه وخدوا بس 9 جنيه تمن اللمبه الجديده من غير أى مصنعيات ، احسبها لو عملت الحاجات دى بره التوكيل ؟؟

4 - لكن لما تكون حاجه مبالغ فيها ( زى موضوع فلانشة الشكمان ) أو حاجه غير أساسيه أو ليها بديل كفائته عاليه زى موضوع تغيير الزجاج الأمامىى ، يبقى مش ضرورى توكيل .

دا مجرد رأىى ، واالله أعلم .

العضوه المحترمه hobby10 ، آسف وياريت تقبلى إعتذارى إنى خاطبت حضرتك بصيغة المذكر فى ردودى على مداخلاتك ، معلش سامحينى أنا رديت من غير ما أشوف التعريف المختصر ، أرجوك إقبلى إعتذارى وكل إحترامى لشخص حضرتك .

الله يبارك لك

المشاركة الأصلية كتبت بواسطة dr_mohamed16

رااائع بجد

انت اللى رائع يا دكتور محمد ، ألف شكر ياباشا على مرورك و إطراءك اللطيف