الموضوع: الحوادث ..الموقف القانونى

المشاركة الأصلية كتبت بواسطة MMamdouh

الموتوسيكل بيعامل معاملة العربية من الناحية المرورية

يعنى هو المفروض يبقى ماشى وراكى و ميحشرش نفسة جنبك بالشكل دة

من الناحية القانونية هو اللى غلطان و من حقك ترفعى علية دعوة مدنية تطالبية بتعويض عن التلفيات اللى فى عربيتك

طبعا بتتعكس الاية لو هو اللى كان فى الشمال قدامك و انتى دخلتى من على يمينة و لفيتى عليه

MMamdouh

لا يااستاذ ممدوح الوضع فعلا زي مانا وصفته كده بالضبط كنت انا اللي قدام ومحضنة مع الرصيف اللي علي شمالي كمان بحيث اني اخد اليوتيرن وكما كنت مهدية سرعتي جدا ومدية اشارة شمال يعني مالوش حجة ابدا في اللي عمله ده لكني اتفاجئت بيه خبطلي الجنب الشمال وكسرلي المرايا ووقع هو وصاحبه من على المتوسيكل قدام العربية بكذا متر وطبعا هو غلطان مليون % وانا مالفيتش عليه خالص انا كنت سابقاه بعربيتي بالعكس هو اللي حاول يتخطاني واعتقد ان الخبطة كانت قوية كده لانه شكله كان جاي على سرعة جامدة او سرح ومخدش باله كمان.

انا عارفة طبعا ان الناحية القانونية تلزمه هو بتصليح العربية لكني كان كل همي اني اخرج من الموقف والولد ميكونش اتصاب والبس انا المصيبة دي طبعا حضرتك عارف بيتعاملوا ازاي مع الحالات دي .

المشاركة الأصلية كتبت بواسطة محمد ابراهيم 1

فى الواقع وليس القانون
أى حادث تصادم فيه مصابين بيكون الطرف التانى غير المصاب هو الغلطان إلى أن يثبت العكس
وطالما لم يتم تحرير محضر فى الحال فالوضع يكون متروك للظروف بمعنى آخر حسب ضمير المصاب لأن الوضع لا يتم إثباته على حقيقته
ولكن الذى يحدث أن المصاب يذهب إلى قسم الشرطه ويدلى بأقواله من جانب واحد وبالطبع سيقول أن الجانب الآخر هو المخطىء مهما كان الوضع الحقيقى (لأنه لو كان عنده ضمير وعارف إن هو اللى غلطان فأكيد مش حيعمل محضر أصلا ) وقد يضيف أن السائق هرب من مكان الحادث
عموما بالنسبه للواقعه التى حدثت لك فإنه ما دام لم يتم إعلانك بالحضور لسماع أقوالك فإن مرور ( بمعنى مضى ) هذه الفتره دليل على عدم تحرير محضر بها
وذلك لأنه فى حالة تحرير محضر بالواقعه يتم استدعاء الطرف المشكو فى حقه لسؤاله فى الأوراق ومن ثم يتم عرض الطرف المشكو فى حقه على النيابه العامه ( وذلك فى الجرائم المعاقب عليها بالحبس مثل الإصابه الخطأ والقتل الخطأ والضرب و السرقه والنصب وأى جريمه معاقب عليها بالحبس )للتصرف فى شأنه
وجدير بالذكر أن عدم وجود ذكر لهذه الواقعه عند استخراج شهادة مخالفات ليس دليلا على عدم تحرير محضر بها
إذ أن شهادة المخالفات تكون صادره عن مخالفات المرورالصادره من نيابة المرور وليس حوادث التصادم لأن الأخيره تختص بالتصرف فيها النيابه العامه التابع لها القسم الواقع فى دائرته الحادث
وأتمنى أن أكون قد أجبت إجابه وافيه وأى استفسار أنا فى الخدمة

أولا متشكرة جدا على اهتمام حضرتك وردك على استفساري.

هو انا وصلت الولد للمستشفي وناس كانوا واقفين وقت الحادثة جم معايا وهما اللي نصحوني اني امشي ومدخلش معاه المستشفي عشان ميلبسنيش تهمة.
هو الحمد لله مجاليش اي استدعاءات والموضوع فات عليه فترة لاتقل عن 5 شهور دلوقتي بس انا خايفة لايكونوا مستدلوش علي عنواني مثلا او العكسري استسهل ومدورش علي العنوان كويس
ولاني كمان شارية العربية بتوكيل من صاحبها ومسجلتهاش بإسمي ولحد لما بعتها فضلت الرخصة بإسم صاحبها واتسجلت بإسم الشخص الجديد ومعرفش اي حاجة عنها من ساعتها يعني انا تقريبا اسمي مش مدرج في المرور لحد دلوقتي اصلا .
ربنا يستر بقي لحسن ييجي بعد سنة ولا حاجة وانا بخلص اي مصلحة حكومية يطلعلي الموضوع ده ويعمللي مشكلة .
عموما انا مقداميش حل غير اني اكبر دماغي وخلاص
ولا حضرتك تقترح عليا طريقة اعرف بيها ان كان في محاضر مسجلة ضدي ولا لأ؟