بسم الله الرحمن الرحيم
هو طبعا الكلام ده هيزعل ناس كتيره اوي و يضايق ناس اكتر لكن خلونا نتكلم بموضوعيه و نقاش هادي من غير تعصب
و على فكره انا مش بدافع عن حد و لا بقول كلام شعر فى حد لكن العقل اللى ربنا ميزنا بيه يخلينا نحكم بالراحه و بالهدوء و من غير ما نسب و نشتم فى حد
و المهم بعد ازن الجميع يعني اللى يقول حاجه يبقى فى دليل عليها او شافها بعينه او سمعها بودانه مش مجرد ميديا و لا كلام من الهوا
اولا هو المجلس العسكرى ده بقى ماسك السلطه ليه ؟
ما تيجوا كده نبص على ليبيا و لا سوريا و لا اي بلد هنلاقى ان الجيش بتاعها و لا عامل اى بتنجان مجرد انهم بيضربوا بعض و السلام
طب و انت جيشك عملك ايه ؟
اولا شالك الريس اللى مش عاجبك و ده محدش كان يحلم بيه
اوعى حد يفتكر ان الشعب بمطالبه هو اللى شال الريس و الا كانت المظاهرات قبل كده شالته لكن الجيش هو اللى شاله
حد كده يفتكر يوم اعلان التنحي مين اللى قال التنحي و بحمايه مين ؟
هل كان الريس نفسه قال انا مشيت و لا حد من الحركات اللى فى التحرير قالت احنا نحينا الريس
و لا عمر سليمان هو اللى طلع ووراه الحرس الجمهورى و الجيش
فكروا فيها بالعقل كده و بهدوء
ثانيا نيجي بقى للناس اللى بتقارن الجيش المصري باي جيش تاني فى العالم العربي
لو جيشك زي جيش باقى الدول مكنش وزاره الدفاع هى الوزاره الغنيه الوحيده فى البلد اللى بتنتج و بتسلف الحكومه السابقه كمان فلوس
حد يقولى كده تعداد الجيش المصري اد ايه ؟
و قبل ما يقولى العدد يقولى كام جندى مجند شغال فى المصانع الحربيه و المشاغل و باقى مشاريع الجيش ؟
و قبلها يعدلى كام واحد على الاحتياط
حد يقولى كده لما جيش انه شعب اتدخل فى المظاهرات اسرائيل اتكلمت و قالت احنا خايفين على حدودنا ؟
حد شاف اى حد من امريكا و لا اسرائيل عمل حساب لاى جيش فى العالم العربي غير الجيش المصري ؟
اللى انا اعرفه ان لما حد يعمل اعتبار لحد يبقى اكيد خايف منه و لا ايه ؟
نمسك بقى افراد الجيش نفسهم ؟
ما تشوفوا كده الظباط و العساكر اللى موجوده فى الشوارع ده عامله ازاى و بتتعامل مع الناس ازاى
و يقولك الجيش ضربهم مش عارف امتى و امتى و هو ضربهم ليه ؟
تخيل حضرتك مواطن عادي و مديرك قايلك متكلمش حد و لا تتدخل مع حد و جه اى حد بيشتمك و يسبك بالفاظ منيله و انت بتقوله شكرا و كمال بيحدفك بالطوب و انت بتقوله شكرا
لو انت بقى اترفع عليك سلاح هتسيبه و لا اصلا انت هتستحمل كل ده
تخيل كده كم الغضب اللى انت فيه من الناس ده كلها و انت فى ايدك سلاح و متضرب و كفاءه تقوم بيهم كلهم و مع ذلك بتضبط النفس و هادي و ساكت
حد يقولى ليييييييييييييييييييييييي ييييييييييييييييييييييييه ؟
عشان يا اساتذه لو الجيش ضرب بجد و استخدم السلاح بجد هتبقى مجزره مش هزار
هتبقى مذبحه المصريين فعلا و للعلم ضتبط الجيش ده متدرب انه يقوم بكتيبه كامله مش شويه ناس مدنيه مش فاهمه الحرب كويس
اه نسيت اقولكم ان الجيش اللى ماسك فى القاهره الكبرى ده الجزء بتاع الشرطه العسكريه بس
و الشرطه العسكريه ده متدربه انها تتعامل مع ظباط الجيش اللى هو متدرب انه يتعامل مع كتيبه متدربه و مسلحه
تخيلوا بقى ايه اللى هيحصل لو الناس ده فقدت اعصابها من التهريج اللى بيحصل زي اللى حصل فى العباسيه كده
عايزين بس نخلى الناس تاخد بالها من النقط الصغيره ده اللى هتفرق بعد كده كتير فى التدخلات لو لقدر الله حصل تدخل
طب المشكله بقى دلوقتى لو الجيش صبره نفد ايه اللى هيحصل حد يقولى ؟
تمرد عسكرى على الشعب يعني حرب بين الجيش و الشعب
تخيثل بقى حضرتك الجيش اللى متدرب انه يتعامل مع افراد اكبر منك قوه و تسليح بيتعامل مع الشعب النتيجه ايه ؟
و حتى لو طلع من الشعب ناس قويه و متدربه ووووووو و هزم الشعب الجيش بعد اد ايه بقى من الضحايا لان الخصم ساعتها خصم عنيف اقوى بلاد العالم عملاله حساب
ساعتها مين اللى هيحمى البلد بره و على الحدود ؟
و مين اللى هيمسك البلد اصلا ده ان اتبقى فيها حد يصلح انه يمسكها ساعتها ؟
و لو فرضنا العكس و الجيش انتصر اخبار الحرب الاهليه ايه بقى ؟
و اخبار الدول اللى حوالينا ايه بقى ؟
و الاحكام العرفيه ايه نظامها ؟
علمونا زمان فى المدرسه اننا نقدر اللى قدامنا صح و نحسب مصادر ضعفه و قوته و منخدهاش كده بالبلدي و يقولك الشعب اللى مش عارف عمل ايه هيعمل ايه
اللى يعرف يجاوب على كل الاسئله ده هيفهم الدنيا ماشيه ازاى صح و فى النهايه انا بحط النقط على الحروف قدام الناس اللى مش واخده بالها بس و اسف على الاطاله
ودي و تقديري و احترامى للجميع و ده مجرد راي و كلام مش اكتر
السلام عليكم
المفضلات