الموضوع: هل توافق على سن قانون يفرض على النساء فى المجتمع ارتداء الحجاب ؟

المشاركة الأصلية كتبت بواسطة gebreel

الاول في بعض الحاجات اللي لاز م تتقال قبل الاجابة

1- ان الحجاب فرض على كل مسلمة و مينفعش اني اقول غير كدة
2- في امور الدين لازم تيجي على اقتناع تااااااااام علشان لما تتنفذ تتنفذ صح
3- مش كل غير محجبة غير محترمة او غير متدينة و ليس العكس
4- "كلكم راع و كلكم مسؤول عن رعيته ... "


انا ضد فرضوا بالقانون لأكثر من سبب اولا ردا على المناظر اللي الواحد بيشوفها فده بيبقى لبعض الاسباب
- اما ان البنات دول عاوزين يخلصو من الزن اللي في البيت فيحطوا حتة قماشة على دماغهم و خلاص و اهو انا
محجبة مش عاوزة وجع دماغ
- او انها شايفة انها بكدة ممكن توسع مجال المعجبين بيها لا لشئ الا علشان هي محجبة
- او اكثر من سبب
و سواء انها عاملة كدة علشان اي سبب من الاسباب دي يبقى في وجهة نظري اللي تحتمل الخطأ قبل الصواب متلبسشي حجاب عن دون اقتناع بس تلبس لبس محتشم و تبقى بداية و نواة بعد كدة للحجاب عن اقتناع لأن ساعتها مش هيبقى ناقصها حاجة غير غطاء الرأس و تبقى محجبة بردو

مش معنى ان البنت غير محجبة انها تبقى زي البلاوي اللي الواحد بيشوفها في الشارع

انا لو في واحدة مثلا فكرت في اني ارتبط بيها و تبقى زوجتي بس غير محجبة في الكام قعدة تعارف اللي بتبقى مع الاهل هستشف منها مثلا هي ليه مش محجبة و هفهم اذا كان عندها استعداد تتحجب ولا لأ و مش هاخد اي خطوة جدية الا لو ضمنت انها هتتحجب قبل الزواج لأنها هتبقى مسؤولة مني بعد كدة و ههأسأل عنها و ده هيبقى شرط قبل قراية الفاتحة و الخطوبة و الذي منو بس ارجع و اقول انو بردو لازم تكون على اقتناع و يكون نواتها طيبة علشان اضمن انها مش هتقلعوا ثاني بعد ما تلبسوا و ده هيبقى انيل و انيل

بالنسبة لمصر فالمجتمع بيتضمن ديانات اخرى غير الاسلام و مش لازم افرض عليهم فرض موجود في ديانتي و مش موجود عندهم لكن ممكن افرض الاحتشام لأنو موجود في كل الديانات

مفيش ديانة بتقول اني امشي لابسة لبس مخليني اكني مش لابسة حاجة او مبينة من جسمي اكثر مانا مغطية

و الحمد لله دينا جميل و مبين كل حاجة ثوابها و عقابها و كل انسان / انسانة بالغ عاقل ملزم باتباع تعاليم دينو و سنة نبيه و لو ماتبعهاش هو المسؤول عن افعاله بشرط انو ميأثرش على باقي الناس بتصرفاتو في انو يشجعهم على حاجة غلط فالمجتمع يفلت و يبوظ

لكن اققدر اعمل اكثر من حاجة علشان المناظر اللي في الشارع دي تقل و وعي الناس الديني يزيد

مثلا امنع الافلام الهابطة اللي مبتقلش اي حاجة غير ان ده ولد كل يوم مع واحدة و بيعمل ايه مع دي و ايه مع دي و في الاخر يحب واحدة و يتغير علشانها - يااااااااا سلام استفدت انا ايه غير ان في ناس امعة هتمشي ورا الممثل اللي عمل كدة و يقلدوه تقليد اعمى و بنات يموتو فيه و يبقوا مستنيين يقابلوا واحد زي x في الفيلم الفلاني -

امنع بيع و تجارة الخمور

اغلظ عقوبة بيع المخدرات و اخليها توصل للاعدام حتى لو تعاطي

اخلي عقوبة التحرش حتى لو باللفظ او النظر او او او تبقى اضعاف مضاعفة و لو توصل لاعدام مفيش مانع

حاجات كثير ممكن تتغير تخلي الكويس في المجتمع يعيش مرتاح و اللي مش كويس يتلم و يلم نفسه و يخاف علشان ماطبقش عليه القانون الرادع

قبل ما نمسك في الحجاب - مع اقراري التام انو فريضة و انو لازم كل بنت تلبسوا بس على اقتناع - نعلم اولادنا و بناتنا دين صح في المدارس و الجامعات و التلفيزيون الخ...

السعوديات مثلا مع كامل احترامي للمحترمات منهم بمجرد ما يخرجوا من السعودية بتلاقيهم قلبوا على حاجة ثانية خالص و لما يرجعوا السعودية يلبسوا و يتلموا علشان خايفين بس

معتقدش اننا عاوزين نوصل لان بناتنا تلبس الحجاب جوة البلد و لو سافرت اي حتة برة او بعيد عن القوانين دي تفجر و تبقى العن

الكبت بيولد الانفجار لكن المسايسة بتولد اقناع و اقتناع باللي الواحد بيعملوا اللي بدوره بيخليه لو اي حد قالو انت غلط و هو متأكد 100% انو صح يقلوا ماشي ربنا يهدينا جميعا و يفضل زي ما هو ميعمش على عوم الموجة اللي سايدة في المجتمع ساعتها

مع الاحتفاظ بان مفيش حد يتمنع مثلا من شغلانة معينة لا لشئ الا انها محجبة او انو ملتحي زي ما كان بيحصل زمان مع المذيعين و المضيفات

+1111111111111111

المشاركة الأصلية كتبت بواسطة hagan

عزيزي hobiko
لو ذهبت للسعودية و شاهدت كيف يلزم الحاكم اصحاب المحلات علي الغلق اثناء الصلاة
ستندهش و تتعجب و تقول لنفسك يعني هما بكده يعني هيخلو الناس تصلي دي الصلاة دي علاقة بين العبد و ربه طيب هما ضمنو مثلا ان الصلاة اللي بالغصب دي هتتقبل يعني طيب مهو ممكن الناس تقفل و تتهرب من الصلاة
طيب ممكن الناس اللي كانت بتشتري ميرحوش علي المسجد و تروح اي مكان
و تفضل في هذا التعجب فترة الي ان يزول تعجبك حينما تمر بالتجربة فعليا
و اليك ما حدث معي اثناء ادائي لفريضة الحج العام الماضي
نصحني اخواني اني اركز علي شراء الهدايا من المدينة و ليس مكة
و مع البرنامج و الاجهاد كنا انا و اقراني نذهب للشراء مثلا بعد الغذاء و قبل صلاة العصر و مع اللف و الشراء و التدوير فيداهمك وقت الصلاة و اذا بالاذان يرفع و فعلا تجد الكل التزم و تم وقف البيع و الشراء
فيكون امامك احد ثلاث خيارات
1- ان تكون من الاصل مستعد للصلاة و قلبك متعلق بها لانك ناوي الا تنشغل عنها حتي لو استمرت المحلات في البيع و الشراء ( فتذهب للصلاة جماعة )
2- ان تكون من الاصل غير مستعد للصلاة و لم تكن علي بالك و لكنك حينما تجد المحلات قد اغلقت امام البيع و الشراء فتذهب للصلاة في المسجد جماعة ثم تعاود التسوق بعدها
3- ان تكون ايضا غير مستعد و لن تصلي و عازم علي ذلك فتذهب للفندق للجلوس في غرفتك حتي تنتهي الصلاة او تذهب للمسجد شكلا فقط و حين تعاود المحلات فتعود للتسوق و هكذا
هذه الحالات الثلاث تحدث عموما مع كل صلاة في بقاع الارض كلها
و لا يذهب لصلاة الجماعة في الكون كله الا اصحاب الحالة رقم واحد
و لكن في السعودية و بسبب اصدار قانون منع البيع و الشراء اثناء الصلاة فسبحان الله يذهب للصلاة في المسجد نوعان و ليس نوع واحد و هما الاول و الثاني هذا مثال بسيط اخي الكريم اردت ان اوضح لك به ان هناك وسائل مساعدة علي الطاعة
فلو فرض الحجاب رسميا سيكون هناك فوائد كثيرة جدا من وراء هذا القانون و الله اعلي و اعلم
تقبل تحياتي و اسف علي الاطالة

م.حاتم السباعي

بلاش السعودية ....... مش مثل كويس خالص :)))))

مش عرف له محدش بيرد علي ....... هو حصل في التاريخ الإسلام أن قام أحد الخلفاء بفرض الحجاب أو عاقب على تركه ؟؟؟؟؟

المشاركة الأصلية كتبت بواسطة م.احمد زكريا

شوف انا أخترت اوافق في حالة عرض الأمر علي

والسبب .... يوم القيامة ربنا سبحانه وتعالى هايساني .. هاقول ايه ؟؟؟

طبعا الموضوع ده للمسلمين .... الغير مسلمين أحرار فيما يفعلون

لاحظ إن الكلام حيبقى على الكل مسلمين و مش مسلمين

المشاركة الأصلية كتبت بواسطة wesam_salom

مقدرش افيدك فى التاريخ
بس انا شايف ان التوعيه لو انتشرت بين الناس
مش هنحتاج قانون
الناس هى اللى هتصنع قانونها وعاداتها

موافق معك تماماً ....... بس أنا ضد الإجبار


و بصراحة أنا مش عارف الإخوة من التيار الديني عايزين ابقى فيه قانون ليه ........ بعد الثورة (لو كملت على خير) مجال الدعوة واسع و مفتوح على مصراعيه من غير أمن دولة ولا اعتقالات


ليه ألجأ لقانون لفرض فريضة على الناس بقوة القانون ....... فريضة لم ينزل الله حد أو عقوبة لتركها في الدنيا