الموضوع: الحقووو؟؟ركبت ال byd النهارده... واتفاجأت!!!!!!!!!!!!!!!!!!!!!!!!!!!!!!!!!! !!!!

ثقافة شعبنا الحبيب: ( الوصايا العشر فى شراء سياره فى مصر)

في البداية يسأل الراغب في الشراء كل من يمر بهم ويبدأ في جمع فتاوي وآراء ونصائح أقل ما يقال عنها أنها مضللة، وتزيده هذه الفتاوي حيرة وتخبطاً ليدخل في مرحلة الشد العصبي حيث يفاجأ بفتاوي جديدة من نوعية» الحق هات لك عربية علشان أنا سمعت إن العربيات هتغلي الشهر الجديد» ومع ازدياد الضغط العصبي يدخل المشتري في مرحلة التبلد بعد أن يطارده كل من سبق أن طلب رأيهم بتعليق» هو أنت لسه ما جبتش العربية»!! خلال هذه الفترة يكون المشتري قد استمع للوصايا العشر التي يقدمها له الجميع والتي قد يقوده الالتزام بها إلي التراجع عن الفكرة..

1- قائمة العيوب.. وهي تضم كل العيوب الموجودة في السيارات المتداولة في مصر، الطريف أن هذه العيوب تتنقل عبر الأفواه بنفس تكنيك الشائعات، فالشخص الذي يحدثك عن عيوب السيارات الصينية لم يقد في حياته سيارة صينية واحدة لكنه عرف عيوبها من شخص آخر غالباً هو أيضاً لم يسبق له أن استقل واحدة.

سيقولون لك إن العربيات الكوري خفيفة ولا تحتمل الحوادث، وسيقولون لك إن السيارات ال 4*4 اتزانها ضعيف علي الطرق السريعة، وسيقولون لك إن السيارات اليابانية قطع غيارها غالية، والألمانية قطع غيارها بتسخن بسرعة، وهناك سيارة تكييفها ضعيف، وهناك سيارة أصحاب توكيلها «حرامية»، وهناك سيارة عيبها أن شنطتها صغيرة، وهناك سيارة عيبها أن «شكلها سيارة حريمي»، وهناك سيارة عيبها أنها «عربية ورق لو خدت خبطة خفيفة هتطبق كلها» وهناك سيارة عيبها «إنها متجمعة في مصر»، وهناك سيارة عيبها إنها «ناشفة شوية»، وهناك سيارة عيبها «إنها بتاكل بنزين ».

وهكذا تبدأ رحلة البحث عن سيارة بالاستماع إلي جميع أنواع العيوب الموجودة في السوق، ليستقر في يقينك أن كل السيارات التي تمتلئ بها شوارع القاهرة «معيوبة» وأن كل سائقيها في خطر وأن هناك احتمالاً وهو أن تتعرض لعملية نصب إذا فكرت في شراء سيارة جديدة.

يغيب عن بالك أن حركة شراء كل هذه السيارات المعيوبة لا تتوقف بل في ازدياد وتعتقد أنك أذكي شخص في القاهرة لأنك «لحقت نفسك قبل ما تتدبس في عربية بتاكل بنزين أو تكييفها ضعيف أو قطع غيارها غالية»، ويغيب عن بالك أيضاً أنه لا توجد سيارة كاملة وإلا لتحولت مدينة الحرفيين إلي مدينة مهجورة من زمان!

2- خد بالك ليضحكوا عليك... يستفزك الناصحون بهذه الجملة لتتحول بعدها إلي مريض بالوسواس القهري يدخل معارض السيارات وبداخله يقين أن أصحاب المعارض مسجلون خطر في مباحث مكافحة جرائم النصب.

وأهم ما يقصده الناصحون بجملة «خد بالك» هو خد بالك من موديل السيارة الجديدة لأنه توجد موديلات مصنعة للخليج وأخري لمصر، والموديلات الخليجية أرخص سعراً لأسباب يشرفني أن أقول أنني «ما أعرفهاش»، وتمييز الموديل الخليجي من المصري قد يصعب علي المواطن العادي من الوهلة الأولي لكنه «موضوع ما يستخباش»، حيث إن كل سيارة لها ملف مسجل به كل مواصفاتها ويكفي أن تسأل صاحب المعرض وسيقدم لك إجابة يستحيل تزييفها.

نصيحة التمييز بين الموديل المصري والخليجي أشبه بنصيحة «خد بالك ليبيعوا لك الشقة علي أنها علي الكورنيش وهيا جوه ».

3- بلاش الألوان الميتاليك... هذه نصيحة من شخص لم يجد ما يقوله لأنه لا يفهم في السيارات لكنه يود أن يظهر وكأنه يفهم في الألوان، فيردد مقولة استمع إليها في طفولته وترسخت في وجدانه وهي أن «الألوان الميتاليك بتحرر، أو أن الدهانات الميتاليك بها مادة «لا يعرف اسمها طبعاً» وهذه المادة تمتص أشعة الشمس بقوة.

4- بلاش تشتري في أول الصيف... وبلاش تشتري بعد الصيف... وهذه نصيحة للشخص الذي يفكر في شراء سيارة مستعملة، والنصيحة بعدم الشراء قبل الصيف سببها ارتفاع أسعار السيارات في هذه الفترة مع بدء الإجازات ورجوع المصريين من الخليج وارتفاع نسبة السفر للمصايف، هذا الرواج يرفع أسعار السيارات وبناء عليه تستمع إلي نصيحة استني لما الصيف يخلص.

وتستمع في الوقت نفسه إلي نصيحة مضادة وهي «بلاش تشتري بعد الصيف» والسبب هو ارتفاع نسبة الحوادث في الصيف وأن «أغلب الناس بتتقلب بيهم العربيات وهما راجعين من المصيف» وبعد هذه الحوادث يقوم الناس باصلاح السيارات «أي كلام» وإعادة بيعها، لذلك ينصح بعدم شراء سيارة بعد الصيف لأنها غالباً ما تكون «مخبوطة ومرشوشة»، هذا بخلاف أن شهور الصيف تهلك السيارة!

وملخص النصيحتين السابقتين نصيحة ثالثة وهي أن أنسب ميعاد لشراء سيارة في مصر هو «ليلة رأس السنة ».

5- لازم ترفعها في البنزينة... وهي نصيحة بديهية يتم تقديمها لك إذا فكرت في شراء سيارة مستعملة، وسيقدمها لك الجميع بداية من البواب مروراً بزميلك في العمل نهاية بصاحب السيارة التي ستشتريها منه «خدها بنفسك وارفعها في أي بنزينة»، وسيتم رفع السيارة أمامك وأنت تقف كفرس النهر لا تفهم شيئاً، أما الشخص الذي قام برفعها فهو مجرد عامل في محطة البنزين «مش دكتور عربيات يعني» ولن يقدم لك معلومة مفيدة أكثر من أن السيارة سليمة «بس هيا عايزة شوية شغل»، لتعود إلي صاحب السيارة الأصلي وتعيد عليه ما قاله لك العامل دون أن تغير هذه الرحلة «بكل ما فيها من رفع» شيئاً في الصفقة.

6- ما ترفعهاش في التوكيل... نصيحة إضافية يقدمها لك صاحب النصيحة السابقة وإذا سألته عن السبب سيقول لك بدون تردد« أصل التوكيل حرامية ».

7- لازم تسوقها... نصيحة يشدد عليها قائلها وينبهك إلي أهمية أن تقود السيارة التي ستشتريها بنفسك لتعرف عنها كل شيء، إذا افترضنا صحة ما يقوله وإن تجربة السيارة ستجعلني أعرف عنها كل شيء فهذا يعني أن السيارة التي أفكر في شرائها لابد أن أظل أجربها لمدة لا تقل عن ستة أشهر «وبرده مش هاعرف عنها كل شيء... إذا كانت الناس بتتخطب بالسنتين والتلاتة علشان يعرفوا بعض... أنا هاعرف العربية كويس لما أجربها نص ساعة ؟!».

الشيء الوحيد الذي يمكن أن تجربه في النصف ساعة المتاحة أمامك هي أن تجرب «هل بتعرف تسوق ولا لأ ».

8- أهم حاجة أن الـResale بتاع العربية يكون كويس، والـ Resale هو إعادة بيع السيارة، وينصحك الأصدقاء بأهمية أن تشتري سيارة تستطيع أن تبيعها بعد قليل «علي أساس إنك بتغير عربية كل أسبوعين ».

ونظرية الـResale الهدف منها أن تحقق أكبر مكسب ممكن عند إعادة بيع سيارتك «يعني تجيب عربية وتستعملها وتحرقها مشاوير وتستمتع بيها ولما تبيعها تكسب كمان» وهي فكرة إن صحت يصح معها إلغاء فكرة نفقة المتعة.

9- روح سوق الجمعة أو هات الوسيط أو شوف ملحق السيارات بتاع الأهرام... وهي أضعف نصيحة يقدمها لك شخص تخبره بأنك تفكر في شراء سيارة، وهي نصيحة يمكن الرد عليها بجملة واحدة «كانت تايهة عني فين الفكرة دي ؟!».

10- قائمة ال «بلاش» الثانية... وتضم «بلاش الكابروليه» علشان مش من عاداتنا، و«بلاش الأتوماتيك» علشان بيسخن العربية، و«بلاش المانيوال» علشان البلد بقت زحمة وبنمشي بالبطيء والدبرياش هيدمرلك مفصل الفخد، و«بلاش عربية واطية» علشان أي غطا بلاعة هيدمرلك «كرونة الزيت»، و«بلاش الألوان الفاتحة» علشان بتلم تراب، و«بلاش الألوان الغامقة» علشان الشمس عندنا بتخليها تبهت، و«بلاش تشتري من المعارض» علشان الأقساط عليها فوايد جامدة، و«بلاش تشتري من التوكيل» علشان حرامية، و«بلاش تشتري مستعمل» علشان المستعمل هيتعبك، و«بلاش تشتري زيرو» علشان البلد عندنا ما ينفعش فيها غير المستعمل.

واسف على الاطاله

العربيات الصيني ممكن تلاقي اداء كويس ويعجبك وكان ليا تجربة مع اسبيرانزا m11 وفضلت ماشي بيها على 180 لمسافة كبيرة وأداءها كان ممتاز لعربية بالسعر ده
لكن مسألتش نفسك ليه هي رخيصة للدرجة دي ؟؟ الاجابة بسيطة وهي الامان واكيد مش يقصد بالامان الـabs والحوارات دي لان دي عوامل بتساعد على تقليل الحوادث مش منعها ،هنا بتكلم على حاجة بتوفر تكلفة رهيبة على المصنع تخليها تبيعها رخيصة زي تكوين سبيكة المعادن بتاعت الشاسيه
وأكيد معظمنا شاف اختبار الامان بتاع البريليانس جالينا اللي كان أداءها رائع بموتور ميتسوبيشي وفراملها وعفشتها ممتازين وفيها abs وايرباج لكن في الاختبار على سرعة قليلة كانت جايبة قوايم وشاسيه !!
يبقى الصينيين بيلعبو على انهم يلعبو في حاجات مخفية مستحيل تكتشفها غير بعد فوات الاوان زي الخامات واعتقد ان لسة قدامها وقت علشان تتحسن ومش من الحكمة ان حد يغامر بحياته علشان عربية رخيصة وبتجري

مش عارف ارد اقول ايه ياجماعه بطبيعتنا كشعب مصرى بنحب نحور كتير ........يعنى الموضوع انا بدائتو بانى مكنتش بطيق حاجه اسمها bydوالصينى على وجه الخصوص ايا كان هو ايه وفجاءة لما ركبتها حسيت بانى كنت غلطان لانها فعلا عربيه محترمه ولازلت بردد انها عربيه محترمه.....لاقيت الموضوع لف ولزق فى عيوب الصينى الرهيبه اللى متمثله فى الاسبرنزا.........وكان البى واى دى اسمها الحقيقى اسبرنزا ومخبين علينا ....واتهامات من غير تجربه من مجرد بس الاسم وعوامل الامان...........بالنسبه للناس اللى كانت بتتكلم على فروق الاسعار مقارنتا بعوامل الامان وان الاى بى اس بتاع الصينى مش حلو..........ممكن سؤال:الفيرنا امان الانوس امان اللوجان امان الانسر بومه بغض النظر عن الاير باج والسوبر اكشن اللى فيها اى بى اس امان....الصنى الجديده اللى من غير اى بى اس امان 128 اللى بتقارنوها بالاسبرنزا اللى من غير شاسيه اساسا امان...........كل دى عربيات نفس الفئه السعريه ومش امان يبقى مش ممكن الواحد يفكر ويجيب بى واى دى وهو مطمن .......ومحدش يقولى الاسبرنزا فىها عيب لانها معيوبه اساسا وانا ركبتها وعارف انها كلها مشاكل ......انما شاتان الفارق بين الب واى دى والاسبرنزا وجربو وانتو تصدقونى..........

المشاركة الأصلية كتبت بواسطة ziabassem

طبيعي يا باشا لازم (وحط ميت خط تحت كلمة لازم) يكون فيه فرق بين العربيات الياباني والصيني ..فيه فرق في الخبرة وبين تاريخ الدولتين في صناعة السيارات .. وإنما لو لاحظت كلامي أني بقول أحسن قيمة بتاخدها مقابل الفلوس اللي بتدفعها .

بالنسبة لسحب الموتور .. بتبقى راجعة لتصميم الموتور نفسة .. ففيه مواتير سحبها بيبقى عالي في الأول لحد 100 أو 120 وتجميعه سريع في rpm قليل زي الفيرنا .. وفيه عربيات بيبقى تجميعها بطيئ في الأول وبعد كدة بيزيد سحبها مع الـ rpm العالي .. وده ميعبش العربية في شيء .. وإنما بتبقى راجعة للراحة النفسية أو طبيعة سائق العربية .


أنا مش عاوز اتكلم عن توكيل اسبرانزا لأنه من وجهة نظري ما عليه أكتر مما يحسب له .. وعن تجارب معاه مع ناس اصدقائي كنت بروح معاهم التوكيل وشفت بعيني المعاملة .. وكفاية شرط الضمان بتاع الـ 3 شهور ده .. تحس أنه بيتلكك أنه يخرجك بره الضمان بأي شكل بعد ما باع ليك العربية .. وعلى فكرة مش هو بس .. إنما أي توكيل بيعمل كدة برضه في نفس الفئة السعرية .. والفرق بين توكيل وأخر بيكون في نقطة محاولته لتحسين نفسه وبين توكيل أخر بيحاول يبيع القضية .



اسفين يا باشا لأن الكلام أخد منحى أخر بعيد عن الموضوع الأصلي .
وأحب أضيف برضه لكلام حضرتك أن من العربيات الصيني المحترمة في مصر (بالإضافة للبي واي دي) الجاك ، البريليانس .. بس البي واي دي بتتفوق في سعرها وأسعار قطع غيارها سواء داخل أو خارج التوكيل .. وده بيديها الأفضلية عنهم .

ياسيدى الفاضل انا اللى اسف ....بس كنت بصحح مجرى امور ممكن جدا انو يقول لمواضيع تانيه كتير مش محل نقاشنا لاننا لو هنتكلم على عيوب كل عربيه نزله السوق مش هيكفينا منتدى كامل مش موضووع واحد .........اننا اسف على طريقتى التهكميه.......وانا مع حضرتك فى ان الشبح الصينى بدا يكشر عن انيابه ......وبدا يقف جنبنا كشعب على قدو ونفسو يركب عربيه محترمه.....تحياتى لكل من شارك فى الموضوع......