تعالوا بس نتفق على حاجه عشان الامور متتشعبش مننا
وباختصار وبطريقة متفبركة ححاول اشرح شوية حاجات على السريع وبطريقة سطحية

الامراض نوعين

أولا: الامراض العصبية:
القلق, الاكتئاب, التوتر, الخوف, الفوبيا,الوسوسة, واكتئاب ما بعد الصدمة (اللي بنتكلم عليه هنا)

1.دي كلها اسمها امراض عصبية يعني العيب في الاعصاب
2. المريض طبيعي 100% بس بيتعذب ولكن معاناته لا يشعر بها أحد
3. ممكن يعبر عنها وممكن لأ
4. في رأيي الشخصي المريض بيكون غلبان وبيصعب عليا لانه بيبقى (بيتنشأ) على حد يخلصه من معاناته
5. العلاج: مجموعة من الادوية البسيطة وبكرر البسيطة اللي بترفع المود وتشتغل على مركز الخوف والقلق والتوتر الخ


ثانيا الامراض النفسية
Schizophrenia, الانفصام(بالبلدي كده الجنان), الذهان,
Mania & Bipolar الاكتئاب ثنائي القطب اللي هو ساعة حزين وبعدها ب 5 دقائق يتحزم ويرقص

1. دي بقى الامراض النفسية والعيب في مراكز الشخصية في المخ
2. المريض مش حاسس بحاجه لانه مش بيعاني من اي شيء وبالتالي رافض العلاج (لاننا احنا اللي مجانين وهو الوحيد اللي عاقل)
3. مش ممكن يعبر عنها لانه مش حاسس بحاجه واللي حواليه هما اللي بيشدوا في شعرهم
4. المريض بيبقى صعب جدا وبتحاول تخليه يقتنع بيك الاول عشان يتعطف ويتكرم ويقبل العلاج

ودي بقى هي للأسف كل الأفلام العربي اللي اتفرجنا عليها في حياتنا من اول اسماعيل ياسين في مستشفى المجانين ودكتور خشبة انا مش قصير ازعة انا طويل واهبل


ايه المشكلة بقى ؟؟؟؟

المشكلة ان في العالم كله ارتبطت كلمة الطبيب النفسي والعيادة النفسية بالنوع الثاني مش الاول

ونسيت الناس ان فيه الملايين بتتعذب من الحاجات العصبية البسيطة واللي مش بيحس بالالم النفسي الا اللي جربها

وده للأسف اللي بيخلي اي حد في مصر لما بيعمل عملية بواسير بيقول لمصر كلها
انما لما بيروح لدكتور نفسية وعصبية بيخبي على اهله

وعلى رأي أحد أساتذة الطب النفسي:
احنا بنعالج من اصغر راس لاكبر راس في البلد دي بس محدش بيقول !!!