الموضوع: الخوف من السواقة بقى حالة مزمنة .. ايه الحل ؟؟

المشاركة الأصلية كتبت بواسطة د.أحمد عبد الرحمن

الموضوع طبي بحت

Post traumatic stress disorder
أعراض ما بعد الصدمة

ودي بتحصل للناس اللي واجهوا ظروف صعبة زي الحروب والحوادث أو لا قدر الله شاهدوا احد اقربائهم بيحصلوا حاجه

دا اللي حصل للجنود الامريكان بعد حرب العراق ولاحظي انهم بيعانوا منها لحاد دلوقتي

المرض ده عبارة عن نوع من القلق الغير مفسر, وممكن يقعد فترة طويلة

لاحظي ان سنك مش كبير ومع ذلك حصل لك حاجه محصلتش لمعظمنا

مش كتير مننا عربياتهم راحت total loss وبالتالي انت من جواكي حاسه ان حصلك حاجه exceptional بالنسبة للناس اللي انت بتعرفيهم بيسوقوا

رأيي المتواضع :
1. زيارة طبيب نفسي, مش عيب وياما بره عندهم عيادات الخوف من الطيران والخوف من الارتفاع والخوف من الكلاب

2. الاتصال بحد حصلت له حادثة كبيرة وعربيته راحت نوع من ال Group therapy او علاج المجموعة

3. حاولي متعديش من المنطقة اللي العربية عملت حادثة فيها اليومين دول

4. مع الوقت وكل ما (حتتفادي) حادثة قولي لنفسك انا شاطرة والميكروباص ده لو مكنتش دوست فرامل كان زمانه دخل فيا وهكذا حتربي عندك ثقة بتتزايد كل يوم

6. قراءة دعاء ركوب الدابة قبل القيادة وتقولي بصوت عالي لنفسك (قل لن يصيبنا إلا ما كتب الله لنا) ونفر من قدر الله إلى قدر الله

5. على فكرة الاعضاء قالولك على اقتراحات كثيرة حلوة وعجبني انك تروحي الملاهي وتركبي العربيات اللي بتخبط في بعضها حتحسي ان سواقة العربية احلى واهدى وبيعمل نوع من ال desensitization يعني التغلب على احساس الصدمة المخيف ورعب انك تعملي خبطة

شكرا جزيلا بجد يا دكتور على التحليل الرائع دا

1- لو حضرتك تعرف طبيب نفسي كويس يا ريت ترشحلي حد لان انا معرفش و معنديش مانع خالص اروح لدكتور نفسي زي ما بروح لدكتور باطني ما دام محتاجة اعالج حاجة معينة يبقى ليه لأ

2- للاسف معرفش حد بشكل شخصي حصلوا حادثة كبيرة و عربيته راحت ، بس اكيد ممكن يكون في هنا في المنتدى كزا حد مروا بالموقف دا فا ممكن نعمل موضوع نتكلم فيه و نقلب المواجع مش عارفة دا ممكن يعتبر Group therapy ولا لأ

3- مابعديش منها الحمد لله لاني مكان شغلي اتغير و بقى بعيد عنها خالص و بعدي منها كل فين و فين

4-بيحصل معايا العكس بقى كل ما بتفادى حاجة بقول المرة ربنا ستر و هوا انا هافضل في القلق دا كتير ولا ايه

5- ان شاء الله اقول الادعية دي و اداوم عليها

6- بعد ما اعمل الموضوع بتاع الناس اللي عملوا حوادث هنا في المنتدى نبقى نتفق كلنا و نعمل مقابلة في الملاهي و يبقى منها مقابلة للمنتدى و منها علاج و انا اصلا كنت بفكر اروح الملاهي عشان افسح ولاد اختي فا ان شاء الله انفذها قريب جدا

جزاك الله خيرا يا دكتور على النصائح دي كلها و ربنا يجعل فيها الشفا يا رب