يا خبر ابيض يا دكتور، العفو
مفيش حاجة
انا فعلا ساعتها زعلت وكنت ناوي اعمل مشاركة اعاتبك فيها وكنت ناوي مادخلش اقرا اي مشاركة انت كاتبها
بس دلوقتي خلاص مفيش حاجة
الموضوع بأختصار شديد جدا
كنت راجع من الشغل قبل الفطار بحوالي ربع ساعة
طلعت الكوبري علي سرعة عادية ودخلت الملف علي نفس سرعتي
كان في عربية علي يميني في الملف (الملف يمين) اتضريت اخد الملف علي الواسع
العربية عملت ديرفيت وفقدت السيطرة نوعا ما عليها بس كانت بتلم معايا
حظي وانا في نهاية الملف والطريق خلاص هيعدل ان العجل الخلفي شمال لطش في الرصيف وبالتالي الجنط اتني والعجل نام ففقدت السيطرة عليها تماما والعربية عدلت وشها ولفت 180 درجة ودخلت بوشي في السور
الحمد لله بفضل الله نزلت سليم انا وزميلي (مش مجرد زميل عمل دة صديق عمري من حوالي 17 سنة ورفيق الكفاح من اول الثانوية والكلية ولما تخرجنا اشتغلنا سوا في نفس الشركة)
الخسائر
كبوت ورفارف واكصدامين (ورا وقدام) وشبكة وفوانيس و3 جنوط (دة من برة)
فتيس وعفشة كاملة وتكييف وطقم تبريد وخزنة زيت الباور (دة من تحت)
كرسي السائق وحزام الأمان والكونسول وقطمة الدريكسيون والكونتاكت (دة من جوة)
بعد كل دة
اتعملي محضر في القسم واتعرضت علي النيابة تاني يوم الصبح بتهمة اتلاف مال عام ومعمولي قضية
الحمد لله بفضل الله
مش هقولك قد ايه العربية كانت بتخدمني انا شخصيا وكانت بتخدم اسرتي بأكملها فرد فرد
العربية لسة جديدة بقالها حوالي 5 شهور فقط (هي مستعملة بس انا لسة شاريها)
الحمد لله علي كل حال
حالتي النفسية طبعا مش مظبوطة وتأكدت من كدة لما ركبت المواصلات (الميكروباصات) وعديت علي مكان الحادث ولما ركبت مع اخويا واخيرا لما بسوق عربية اخويا
انا اساسا بغض النظر عن الحادث بخاف من الأماكن المرتفعة وطوول عمري بخاف امشي جمب سور اي كوبري (تحديدا كوبري 6 اكتوبر) ولما بسوق وامشي جمب السور عمري ما بفكر ابص تحت لأني بحس اني بدوخ، دايما بمشي ناحية جوة او بمشي وسط العربيات
دة موضوعي بأختصار
والله المستعان
،
،
المفضلات