الموضوع: ثبات العربيات موضوع للنقاش

ماشاء الله على الأعضاء اللي زي الفل اللي فاهمين و واعيين .. و أنا أول واحد بيدخل هنا علشان يتعلم من الناس الجميلة اللي عمرها ما بتبخل على حد دي ربنا يباركلها ويزيدها علم بإذن الله ...

بالنسبة لموضوع الثبات بقى .. فأنا هتكلم من وجهة نظري و حسب مانا دارس و فاهم ...

الثبات ( حسب ماحنا بنتكلم عليه دلوقتي ) .. كلمة كبيرة ليها أكتر من مدلول ( التحكم - الاتزان - الثبات )

بمعنى :
إنك ممكن تكون سايق عربية على طريق مستقيم على سرعة عالية فتحس إن العربية فعلا خفيفة و تيجي تنقل من حارة لحارة تنقل بحرص أوي لإنك حاسس إن الهوا بيقاوم العربية بعنف .... ده منظور

أو تيجي تاخد ملف على سرعة معينة برضه العربية تخوفك لإنك بتبدأ تحس إنها بتميل منك فتضطر تقلل السرعة علشان ظهرها مايعومش منك .. ده منظور تاني

و ممكن تكون ماشي على سرعة عالية و تيجي تاخد غرزة خطيرة شوية محتاجه العربية تاخد يمين في شمال على طول و بسرعة جدا فتحس إنك برضه تخاف العربية تلف حولين نفسها منك أو تتقلب فماتاخدش الغرزة دي خالص مثلا ..ده منظور آخر برضه

و عموما الموضوع ككل ليه عوامل مؤشر على كل النقاط دي .. لإن الهاندلينج أو الاستابيليتي ماينفصلوش عن بعض أبدا .. فالتزان بدون تحكم مالوش معنى و التحكم بدون اتزان يؤدي إلى كارثة ...

العوامل المؤثرة :
- الأوزان
و هنا مش بنتكلم عن وزن العربية كده و خلاص ... لا .. أولا بنهتم أكتر بوزن الشاسيه نفسه أولا قبل أي شيء .. و نهتم بتوزيع الوزن على العربية توزيع جيد بحيث مايكونش مقدمة العربية أتقل من المؤخرة بفرق كبير أوي أو العكس أو الجنب اليمين أو الشمال مهما حصل حتى لو كانت العربية محملة حمولة كبيرة في الشنطة أوفي المقصورة ...
و هنا برضه و احنا بنصمم خريطة توزيع الأحمال بتاخد في اعتبارنا العربية على سرعات عالية مع تصميم الهيكل فين أكتر مكان من تحت بيكون فيه ضغط من الهوا و نحاول نوزع الضغط اللي هيجي على السرعة العالية على أطراف العربية توزيع مناسب علشان ماتحسش إن العربية مع السرعات العالية وزنها بيكون خفيف ...

- الشاسيه
اتكلمنا مرة عن وزن الشاسيه و إنه لازم يكون ليه الغلبة من وزن العربية إجمالا .. و إن لازم نحسب وزن الموتور ( لإنه بيكون تقريبا أتقل قطعة في العربية ) و نحطها في مكان مناسب و نعرف أزاي بقى ( و هنا اللعبة ) نخلي الوزن ده متفتت و متحمل على شاسيه العربية بتوزيع مناسب ... و هنا طبعا بنضطر نتخن حتت معينه في الشاسيه .. يعني ممكن تلاقي القوائم الخلفية قطرها أكبر و أعرض من الأمامية في العربيات الدفع الأمامي اللي بيكون موتورها في الكبوت ، و كمان بنعمل حساب الميزان الخلفي بالنسبة لوزنه و مكانه من الشاسيه و نعمل حساب العربية و هي محملة وزن تقيل في الشنطة إزاي نفتت الوزن ده بتصميم جيد للشاسيه .. و من أهم النقطة في الشاسيه هو أبعاد العربية من التراك و حوض العربية و ارتفاعها ، لإن تناغم الأبعاد هو نقطة مهمة جدا ، و فيه ناس كتير مش فاهمه إن ممكن ساعات يكون الفرق بين العجلتين اللي قدام مختلف عن الفرق بين الكاوتشين اللي ورا و ده يكون أفضل في ثبات العربية ...و الكلام عن الشاسيه من بعد توزيع الأوزان و تصميم التراك و حوض العربية و الارتفاع لازم ياخدنا للنقطة التانية المهمة جدا و اللي عمرها ماتنفصل عن الشاسيه.

- الهيكل
تصميم الهيكل عمره ما بيكون جهجهوني .. و عمره مابيكون مجرد صفيح بيتعمل بشكل الناس تحبه .. تصميم الهيكل في رأئي هل نقطة أهم من وزن العربية نفسها .. لإن بتصميم مناسب لهيكل عربية وزنها خفيف بنعرف إزاي نخلي الضغط العلوي على العربية من الهوا مع السرعات العالية أكتر من الضغط السفلي + الوزن = ثبات عالي جدا جدا للعربية مهما حصل .. و هنا بنهتم بمساحات الاحتكاك مع الهوا ، و زوايا الاحتكاك ، و توزيع خطوط سريان الهواء فوق و جنب و تحت العربية ، مع سيتاب الهيكل مع الشاسيه و ارتفاع العربية عن الأرض و أبعاد العربية و هل العربية هتكون هاتش باك ولا ليها شنطة ولا استيشن ولا جيب و إزاي نخلي الارتفاع عن الأرض متناغم مع ارتفاع العربية علشان توزيع الضغط و و و .. هي النقطة الأكثر خطورة و تحكما في الثبات .. و في النقطة دي بيكون فيه مشكلة كبيرة إننا علشان نزود الثبات هنضطر نقلل من التسارع .. لإننا لو زودنا مساحات الاحتكاك مع الهوا بطريقة زيادة عن اللزوم مقاومة الهوا هتكون زيادة فالتسارع هيقل و عزم الموتور هيتهدر فاستهلاك البنزين هيكون زيادة عن اللزوم برضه ... فنقطة تصميم الهيكل دي هي نقطة فاصله و مهمة و دقيقة جدا جدا و كل فجوة و تجويف و خط و كل سم لازم يكون محسوب كويس أوي .. و المهمة الأصعب من ده كله إنك تصمم الهيكل مناسب للثبات + شكله حلو و الناس تحبه + يسع مساحة داخلية كبيرة جوه المقصورة و الشنطة + مناسب لكل الطرق !!!

-الدفع
الدفع الأمامي يختلف كثيرا عن الدفع الخلفي و عن الدفع الرباعي .. و نأخذ في الاعتبار أن تغيير الدفع يجب أن يغير أيضا توزيع الوزن .. كما أن مكان الدفع يكون أكثر ثباتا و أسهل في التحكم فيه من المكان الذي لا يوجد فيه دفع ( و ده نتيحة إن بيكون فيه قوة و قوى مضادة ) .. بمعنى لو فيه عربية دفع أمامي ، و هي هي العربية حولناها لدفع خلفي فقط مع تعديل الأوزان هتكون العربية أكثر ثباتا ، ولو حولناها دفع رباعي بتوزيع جيد للوزن برضه هيكون الثبات أفضل من الدفع الخلفي .... لكن طبعا الدفع الرباعي بيحتاج عزم موتور عالي معناها تكاليف عالية و بنزين كتير ، و كمان الدفع الأمامي أفضل في التسارع من الدفع الخلفي على السرعات القليلة من 0 إلى 80 ... بالتالي فهي أيضا مقارنة صعبة و مهمة !!!

- أنظمة التعليق
كتير مننا مايعرفش إن نظام التعليق الخلفي ممكن يفرق في الثبات فرق رهيب جدا .. لكن برضه مش كل مايكون النظام متطور كل مايكون أفضل ... لازم يكون متناغم مع عرض العربية و هل العربية سيدان أم هاتش باك ... يعني هنلاقي عربية تويوتا كورلا تورجن بيم خلفي ( يعني تكنولوجيا قديمة جدا جدا ) لكن ثباتها أفضل بكتير جدا جدا من ثبات هيونداي إلنترا اللي هي نظام تعليق خلفي منفصل غير مستقل ( يعني تكنولوجيا حديثة أكتر ) .. و ده لإن الكورولا عريضة أكثر و نظام التعليق ده متظبط كويس مع تنفيخات الهيكل و تصميم الشاسيه ... و أهمة نظام التعليق بتظهر في الملفات أكتر و تظهر أكتر في الملفات اللي ممكن يكون فيها طوبة أو زلطة أو الطريق مش ممهد كويس لإنها بتوزع الحمل كويس على العربية ... و كمان ساعات ممكن نضحي بنعومة العربية علشان نعمل نظام تعليق مناسب يدي ثبات أفضل للعربية ودي بتكون نقطة محيرة للمصممين إزاي نعمل نظام تعليق خلفي مناسب للراكب و أمان !!!

- الجنوط
تعتبر عامل مساعد بعد النقاط اللي فاتت دي لكنها مهما جدا برضه لإن تصميم الشاسيه بيتعمل و في الحسبان حجم الجنط .. و كل ما قل البروفايل و زادت مساحات الاحتكاك مع الأرض و قلت الفجوات بين الجنط و جسم العربية و كانت العربية قريبة للأرض هيكون أكثر ثباتا .. لكن برضه هيكون أصعب على الموتور و هيهدر عزم و بنزين و هيأثر على جسم العربية بالسلب في درجة الحرارة اللي يستحملها الرفارف و ده كمان ممكن يؤثر على الشاسيه لو كان وزن الجنط غير مناسب بحيث إن الشاسيه مش هيعرف يقاوم الوزن ده من نقط الضعف على الشاسيه و الآكسات ..... و من هنا نعرف إن العملية برضه لازم تكون محسوبه كويس .. مش كل ماجيب جنط عريض و رفيع هخلي العربية حلوه و زي الفل !!!

- أنظمة التحكم الإلكترونية
بعد ج7لعربية كده لنقط اللي فاتت بيجي التفكير في الموضوع ده .. لإن زي ماواحد من الشباب هنا قال إن مهما كان التكنولوجيا هيكون العامل المؤثر بتاعها أضعف من العامل الميكانيكي ... و كمان هو التركيز الأكبر لأنظمة الأمان بيكون مع استخدام الفرامل .. لكن أنا في كلامي اللي فات ده كنت بركز على الثبات عموما أيا كان فيه فرامل أو بدون فرامل

- السبويلر
طبعا هو عامل مساعد ثانوي مهمته هي زيادة مناطق الاحتكاك مع الهواء أولا ، ثم زيادة نسبة ضغط الهوا مع السرعة على المناطق اللي بتكون خفيفة على السرعات العالية ..


أكيد على الطريق كمان الموضوع بيختلف .. لإنك و انت فاتح الشبابيك بيكون التحكم في العربية أسهل من إنك تكون قافل الشبابيك لإن سريان الهوا على المحاور الأفقية كده انت خليته متعادل .. لكنه برضه على السرعات العالية ممكن يكون أسوأ لو كانت العربية عالية عن الأرض زي الجيب هتحس إن العربية خفيفة أكتر .......... و كمان الطرق عندنا في مصر غير مؤهلة غالبا لإنك تختبر الثبات الفعلي للعربية لإنها غير ممهدة فعليا ( من الآخر الأسفلت اللي عندنا في مصر درجة 7 ) .. و هل العربية فيها حمولة كبيرة من المقصوة أو من الشنطة ولا لأ .. و عزم العربية في الملف .. يعني فيه ملفات الأصلح فيها إنك تدي الموتور دوسة بنزين واحده و ثابته ماتغيرهاش لحد ما تطلع من الملف ولو فرملت سنة صغيرة في نص الملف هيكون خطر عليك أكتر ، و فيه ملفات تانية مافيش مشاكل ممكن ده أو ده ... و هكذا .... و كمان ممكن تكون عربية ثباتها أقل من التانية بس السواق أكثر خبرة ، أو تكون العربية أكثر ثبات لكن السواق مش متعود عليها .. و هكذا ...

موضوع الثبات ده موضوع كبير جدا جدا ... و صعب الحكم عليه من مجرد النظر بالنسبة لكل المستهلكين ، و صعب كمان الحكم عليه من تقييم شخص أو2 او 10 ... هنا بنعتمد على ثقتنا في الصانع ( لإن هنا فعلا بيكون المبارزة الفعلية بين الشركات ) و بنعتمد على إحساسنا لما بنسوق العربية و لازم نحط في اعتباراتنا آراء الخبراء لإن دول هما اللي من شوية أرقام مع مجردالنظر يحكموا على ثبات العربية ....

آسف جدا إني طولت عليكم ، لكن أنا حسيت إن الموضوع مهم جدا و إن صاحب الموضوع فعلا عايز يفهم كل حاجة عنه , ده اللي أنا فاهمه من حكم دراستي للميكانيكا و خبرتي في المجال ده ... و يارب أكون قدرت أفيد شوية و أوجه نظرك لحاجات مهمة.

لو عايز تقارن بين عربية و عربية ... افتح موضوع في قسم المقارنات .. و قول عايز تقارن بين إيه و إيه في الثبات مثلا ، و هتلاقي خبراء أفضل مني بمراحل بيتكلموا كلام دقيق و علمي أكتر من ده و هما أهل الفتوى أكتر مني في المجال ده.