الموضوع: معاناتى مع الفتيس الdsg ولحظات احتراقه

ازاى بعد كده حد يشترى عربيى vw

المشاركة الأصلية كتبت بواسطة Meggieboy

باشمهندس فرحات....عندنا فى الشركة توران موديل أواخر 2010 و عاملة 25000 كم جابت فتيس و دايخين دوخة ما يعلم بيها إلا ربنا و خصوصا إن السيارة إيجار تمويلى......

كلمنا مكتب دبى الإقليمى و وصلنا لأعلى المستويات فى ألمانيا و هددنا بقضايا و خلافه و فى الأخر لا حياة لمن تنادى و الشركة الأم رجعتنا تانى للتوكيل فى مصر......يعنى التوكيل مش هوه المشكلة...دى الشركة الأم اللى مدياها أحلى تناش و بالتالى على رأى الفرنساويين " لن يكون التوكيل ملكيا أكثر من الملك "....

meggieboy ، أنا سعيد جداً إن حضرتك تحديداً رديت على النقطة دي ، عارف ليه ؟


عشان إنت معاك ميجان II ، وجبتها بعد كل الإشاعات إلي عليها دي ، هل بعد إلي سمعته عنها مجبتهاش ؟ ، طب ليه جبتها ؟ وهل بعد ما استعملتها الفترة دي كلها اكتشفت انك إتخميت فيها ؟


هو دة سبب سؤالي ، أنا كنت بسأل العضو الفاضل كام عربية بالتحديد هو يعرفها فيها فتيس وإيه نوع العطل ، وكم عربية فيها موتور TSI تالف ؟
مبدئياً مفيش أي حد في الدنيا مش بس في مصر إشتكى من الموتور ال-TSI، وبالتالي لو حد عرف حاله معينة يقول ، مش سمع حد قال لحد بلغ عن حد إن فيه موتور باز في المكان الفلاني .
نفس الحكاية في الفتيس ، كام عربية في حد عارفها فيها مشكلة وفي أنهي جزء فيها بالظبط ، هل الدبرياج ولا البودي فالف ؟ وسؤالي هنا كان على أرقام ، عشان الفطيس دة مثلاً باع في مصر في الباسات والجيتا والجولف من 2009 لحد إنهاردة عدد لا يقل عن 10 ال-15 عربية (مع عدم المبالغة يعني )، كام واحدة من دول فيها فتيس اتغير ؟ 100 - 200 ؟ كام فتيس من دول كان فيه البودي فالف هو إلي فيه المشكلة (يعني توقف تام للفتيس ) ؟


أنا مش بنفي إن الفتيس فيه مشاكل ، وبأكد إن المشاكل أكتر من أي فتيس عادي ، لو كل 1000 عربية بتجبها فولكس مصر بفتيس اوتو عادي طلع فيها 2 عيب صناعة ، يبقى كل 1000 عربية بتجبها فولكس فيها فتيس DSG بيطلع فيهم 20-30 فيهم عيب صناعة ، دي مشكلة ، لكن معناها الناس كلها هتبطل تجيب فولكس أو هتبطل تجيب DSG ؟


أنا عايز الناس تجاوب بنفسها على هذا السؤال ، واطلب منك تحديداً تجاوب عليه مع نفسك ، خصوصاً وإنت جبت الميجان :)


على فكرة أنا ما ليش أي مصلحة في الدفاع عن فولكس ولا غيرها ، ولا بشتغل في فولكس ولا توكيلها ولا ببيع عربيات :)) ، أنا بس بفكر بصوت عالي وبالمنطق .

العربيه دى فاشله والتوكيل ------------ عاوز اشتم -----------الحمد لله الباسات الى عندنا 1600 ولسه بتمشى

ياريت حد يجماعه يعرف عنوان الشركه الأم عشان مش عارف أبعت الشكوى فين وازاي ياريت حد يقولي الموقع اللي أقدر ابعت عليه سواء في المانيا أو التشيك وشاكر ليكم

[QUOTE=Meggieboy;3873885746]

المشاركة الأصلية كتبت بواسطة farahat

meggieboy ، أنا سعيد جداً إن حضرتك تحديداً رديت على النقطة دي ، عارف ليه ؟


عشان إنت معاك ميجان II ، وجبتها بعد كل الإشاعات إلي عليها دي ، هل بعد إلي سمعته عنها مجبتهاش ؟ ، طب ليه جبتها ؟ وهل بعد ما استعملتها الفترة دي كلها اكتشفت انك إتخميت فيها ؟


يجب أن أعترف إن التوكيل كان له دور قوى جدا بل يمكن الدور الأساسى إنى أحب العربية و أتغاضى عن أى مشكلة فيها......

أنا بأعترف إنى محسوك جدا جدا و حساس لأى صوت فى العربية.....و بأعترف إنى غيرت حاجات كتيرة و مكلفة جدا جدا فى الميجان فى خلال 3 سنين الضمان.. و كمان بعد الضمان طبعا بدون ما أدفع صاغ....و مكنتش بوافق غير بتغيير كامل للقطعة دون أى مفاوضات و بصراحة التوكيل لما كان بيلاقينى فاهم كان بيوافق على طول.....

مفصلات باب و حزام أمان و ماسكة باب داخلية و عمود دركسيون كامل و روتارى سويتش و و و ....دى بعض الحاجات اللى أنا غيرتها و أغلبها لصدور أصوات ضعيفة جدا منها....مكنتش بستنى تبوظ....على طول على التوكيل و فى نفس اليوم شيل و غير .....و النتيجة بعد الخروج من 3 سنيين الضمان الحمد لله العربية مفهاش أى عيوب إلا الإستهلاك الطبيعى و مبسوط منها جدا و الفضل للتوكيل المحترم مع بعض الفهم من مالك العربية......

أنا متفق مع حضرتك تماما إن أى منتج هندسى جديد يجب أن يجرب و نشوف الfeedback من المستخدم و نطور على أساس هذا الfeedback حتى نصل إلى مرحلة من الstability...و لكن ده بيتطلب support رهيب من التوكيل و من بعده من الشركة الأم و هذا للأسف غير متوافر أبدا أبدا أبدا فى شركة فولكس فاجن الأم و لا فى توكيلها........

إنت كدة جبت المفيد فعلاً ، هي مش عيب عربية ولا فتيس على قدر ما هو عيب توكيل أو شركة ، ويمكن في الحالة دي لا يمكن إلقاء اللوم كله على التوكيل أو الشركة ، طب ازاي ؟!!


ذي ما حضرتك قلت بالضبط ، ميجان توكيلها كان بيعمل كل حاجة في العربية على حسابه عشان يدعم سوق السياره ويعمل ليها إنتشار في السوق المصري ، ومن وراه الشركة الأم وهي رينو ، لكن دة مش الوضع مع فولكس لأنها مش محتاجة تعمل إنتشار للأسف ، هي كدة كدة بتبيع فمش شايفة أي مشكلة !!


والنقطة التانية إلي بقول عليها هي نقطة الضمان ، كام واحد معه ميجان خليجي في مصر بدون ضمان ؟! ، تقريباً عدد يتعد على الصوابع ، لكن في الفولكس .. حدث ولا حرج !، وهنا جزء تاني كبير من المشكلة ، الطبيعي في تمن أي عربية إن في من 3 إلى 7% من تمنها بيكون من حق الشركة الأم مع الوكيل على سبيل بند الضمان ، ذي بالظبط الموبيل وذي أي منتج تاني ، لكن الناس بتوفر المبلغ دة لم تجيب عربية خليجي أو اروبي أو غيره وبدون ضمان ، وساعتها ما ينفعش ألوم الشركة الأم ولا الوكيل ولا حتى أقدر أخد حقي منهم لأني قانوناً ماليش حاجة عندهم ما أنا مدفعتش تمن الخدمة يبقى ازاي هطلب بيها .


وأغلب المشاكل بتكون من النقطة الاخيرة دي ، يعني صاحب الموضوع هنا ، وربنا يكون في عونه فعلاً ويعوضه خير ، سبب خسارته هي النقطة دي.


أعتقد إن دة بيكمل الصورة إلي احنا الاتنين متفقين عليها ، وأشكرك مرة تانية على الحوار المفيد دة

المشاركة الأصلية كتبت بواسطة nadoooor

ياريت حد يجماعه يعرف عنوان الشركه الأم عشان مش عارف أبعت الشكوى فين وازاي ياريت حد يقولي الموقع اللي أقدر ابعت عليه سواء في المانيا أو التشيك وشاكر ليكم

العنوان بيكون موجود على الصفحة الرئيسية للشركة ، في جزء contact us ،
لكن أنا أول مرة أعرف إن حضرتك عندك شكوى منهم ، هو إيه العيب إلي عند حضرتك في العربية ؟