الموضوع: معاناتى مع الفتيس الdsg ولحظات احتراقه

المشاركة الأصلية كتبت بواسطة tareksh

السلام عليكم ورحمة الله وبركاته

انا معايا جيتا 2009 ماكنه 1400 tsi , الفتيس dsg

تصدق ان الفتيس ال dsg باظ معايا والعربية راكنه تحت البيت

سمعت الناس بينادوا عليا الحق العربيه بدخن قولتلهم عربية مين

انا مبطل العربيه والمفتاح معايا شوفوا يمكن حد مولع حاجه تحتها

وقمت نازل وفاتح الكبوت لقيت ريحه ذى ريحة كاوتش من اسفل البطاريه

ومافيش نار والناس اتجمعت والى يقولك اطلب المطافى والى يقولك ميكانيكى

والى يقولك الضفيره عملت قافله واتحرقت والى يقولك انت كنت سايب حاجه

شغاله فى الطابلوه قولتلهم الطابلوه انتم شايفينه بعنيكم مافيش فيه اى حاجه

شغاله والمفتاح فى ايدى اهوه وكونتاك العربيه مقفول

وخلال فترة من 5-7 دقائق بدأ الدخان يقل حتى لم يعد باقى منه سوى الرائحه

فدخلت السيارة وقلبى يتقطع واحداث هذا الفتيس ال dsg الملعون فى خلال عام من ركوبى

السيارة زيرو من بداية سماعى صوت شخلله وكنت كل شويه اخرج دماغى من الشباك

عند سماعى الصوت لاتاكد منه وذهابى للتوكيل لاصلاحه ورفض التوكيل

دخول العربيه الا بعد دفع مبلغ 7000 جنيه والتوكيل يقول الجهاز بيقول

ان الفتيس عاطى ايرور ولكن رقم الايرور مالهوش عندنا كود يبين سبب العطل

طيب ايه العمل قالوا احنا هنبعت تقرير الفتيس للشركه الام فى المانيا ونشوف

ايه ردها لاننا مانعرفش نعمل حاجه فى حالتك دى والرد يجى بعد 15-20 يوم

وبعد فترة جاء الرد من الشركة الام تغيير الفتيس وهنا حدثت المفاجئه

المهندس المسؤول عن العربيه يطلب ضمان العربيه قبل تغيير الفتيس قولتله

العربيه خليجى وانا دافع 7000 جنيه

قال انت دافع المبلغ ده علشان تدخل تعمل صيانه عندنا مع عربيات الوكيل

انما احنا لازم يكون فيه ضمان نبعت صورته للشركة فى المانيا مقابل الفتيس

الى هنركبه قولتله انا هدخل للمدير قالى ذى عدمه قمت سايبه وداخل للمدير

قولت للمدير انا معايا عربيه خليجى الفتيس عاوز يتغير ورافضين يغيروه

تتوقعوا اول رد لمدير فرع صيانة فولكس ايه ؟ انت دخلت العربية هنا اذاى ؟

قولتله وانا هدخلها اذاى انا دفعت ال 7000 جنيه ودخلتها

قالى ايه المطلوب قولتله القصه قالى ده نظام شغل عندنا ومافيش حل الا انك

تجيب ضمان للعربيه من بلد المنشأ لاما تركب فتيس على حسابك قولتله

هو سعر الفتيس كام قالى 71000 بالتركيب

ورجعت للمهندس المسؤل عن العربيه تانى قولتله مافيش حل قالى ابعت

شكوى للشركة فى المانيا ومااعتقدش انها هتحل المشكله لانها هتبعت الرد

للوكيل والوكيل هيقولها دى قوانين عندنا فى العمل فى بلدنا

ولم اجد حل فقمت ماشى وراسلت الشركة الام واتصل بى الوكيل فى مصر

وقالى لو معاك ضمان من بلد المنشأ هنغيرك الفتيس وبحثت عن بلد تصدير

العربيه لاجد انها تركيا و لو عاوز جواب من منشأها لازم يشوفوا العربيه

لانها ممكن تكون عامله حادثه وبتطلب ورق للتأمين يعنى مافيش فايده

المهم نرجع للعربيه فتحت الكونتاك اضاءت جميع العلامات فى التابلوه

ثم انطفأت ماعدااااااااااا لمبة الفتييييييييييييييييييييي يس وهو دة الى كنت خايف منه

ادور الكونتك لايعمل العربية اصبحت جثه هامدة

طلبت ونش وحملتها للحرفيين قالى بوردة عقل الفتيس اتحرقت والحمد لله ان الفيوز

بتاع الفتيس ضرب والعربيه ما اتحرقتش كلها

قولتله اذى والعربيه كانت راكنه ومبطله قالى ممكن يكون بدأ يتحرق قبل ماتبطل العربيه

قولتله ايه المطلوب قال تغيير عقل الفتيس ب 19,000 جنيه

قولتله ماينفعش يتصلح قالى انت لو روحت التوكيل هيقولك تغيير الفتيس كامل

قولتله طيب صوت الشخلله الى فى الفتيس هيروح قال هيخف شويه بس لو ذاد اعرف

ان عقل الفتيس هيبوظ تانى قولتله ماشى ما أنا ماعنديش حل تانى

المهم العربيه بعد 3 شهور بدأ يعلى صوت شخلله الفتيس تانى فقررت ان ابيعها لاننى

شعرت ان اعصابى بدأت تنهار وتفكيرى بدأ يتشتت

المهم بعت العربيه بخسارة كبيرة تصل ل 90,000 جنيه فى خلال عام

غير خسارة وقتى وانهيار اعصابى ويشاء القدر ان يشتريها صاحب معرض سيارات

واثناء تجربته للعربيه لزبون يبوظ الفتيس للمرة الثانية ويذهب لنفس الميكانيكى لتغيير

عقل الفتيس حيث وجدت الميانيكى يتصل بى ويقوللى عربيتك عندى فتيسها بايظ تانى

ولاحول ولاقوة الا بالله اللهم اجرنى فى مصيبتى واخلفنى خيرا منها

جيتا 2009 dsg tsi 1400 turbo
معلش بس الجيتا منزلتش بالمواصفات ديه الا فى 2012
بص هو انا معايا ال2011 و dsg و شغالة معايا زى الفل الصوت بتاع النقلة كان قالقنى اول مجبتها بس طلع ده العادى بتاعها و بعد ما سمعت عن المشاكل بتاعتها بقيا اسوقها تيبترونيك فى الزحمة زيادة فى الحرص مش اكتر

المشاركة الأصلية كتبت بواسطة rouky_007

جيتا 2009 dsg tsi 1400 turbo
معلش بس الجيتا منزلتش بالمواصفات ديه الا فى 2012
بص هو انا معايا ال2011 و dsg و شغالة معايا زى الفل الصوت بتاع النقلة كان قالقنى اول مجبتها بس طلع ده العادى بتاعها و بعد ما سمعت عن المشاكل بتاعتها بقيا اسوقها تيبترونيك فى الزحمة زيادة فى الحرص مش اكتر

مش فاهم يعني ايه تسوقها تيبترونيك ؟

المشاركة الأصلية كتبت بواسطة mohab.nabil

يعنى بينقل هو مش بيسيب الفتيس ينقل اوتوماتيك بس مع احترامى لحضرتك دا مش حل انا مش جايب عربية اوتوماتيك عشان اسوقها مانيوال فى الزحمة !

مع احترامي لحضرتك برضه ، إنت مش بتسوقها منوال ، إيه اللي خلاها منوال ؟!! ، ولا بتدوس دبرياج ولا بتنقل فتيس

كل الحكاية انك جايبها على الاول و ضامن انها بتطلع على الاول وكل إلي بتدوس عليه فرامل وبنزين ذي أي اوتو عادي

المشاركة الأصلية كتبت بواسطة tareksh

حضرتك نزلت بالمواصفات دى فى 2009 خليجى
وعلى فكرة انا كنت اسوقها بنفس الطريقة التى تسوق بها فى الزحمه وبدأ يظهر صوت شخلله الفتيس بعد 6 شهور يعنى حرص حضرتك زى عدمه

اسف مأخدتش بالى من كلمت خليجى :) عموما انا معايا ال 2011 و داخلة فى حوالى 9000 كم فمعملتش معايا مشاكل لسة بس انا شايف ان الفتيس ال dsg احسن كتير من الاتوماتيك العادى انا عن نفسى بفضل المانيوال اكتر متعة تانية فى السواقة بس احقاقا للحق الفتيس بتاعها بيبوظ اوقات كتيرة من الاستعمال (يعنى مثلا مينفعش تكون ماشى على سرعة و تدوس فرامل فجأة ال7 نقلات هينزلو مرة واحدة) و اوقات تانية عيوب فى الصناعة (و ديه على حسب اللى سمعته انها اتحلت من اخر 2009 ص اول 2010 ) عموما ده رأى شخصى و ارجو انك متكنش مضايق و ربنا يكرمك تن شاء الله