الاول مبروك عليك الشقة و ربنا يبارك لك فيها
الاول هتشتغل فى الكهرباء و هتحدد للكهربائى اماكن تقريبية للفيش و البرايز و التليفزيون و التكييفات حتى لو مش هتركبها اول ما تتجوز ان شاء الله عشان تعمل حسابك فى توزيع اماكن علب الكهرباء و طالما انت مستلم الشقة ع المحارة فهضطر تكسر فى المحارة عشان خراطيم و مواسير الكهرباء و هتشترى الاسلاك و يشدها الكهربائى و من الافضل طبعا الاسلاك تكون السويدى او جدة و بلاش الرخيص فى حاجات الكهربا و السباكة بالذات و موضوع الكهربا هيتكلف مونة و اجرة حوالى 3500 - 4000 جنيه ، بعد كده هتشتغل شغل السباكة و هتجيب مواسير بولى بروبلين قطر 2/1 او 4/3 بوصة على حسب دخلة المياه العمومية اللى داخلة شقتك و فى الاغلب هتلاقيها 2/1 بوصة و الافضل مواسير باننجر BR او الشريف و الاتنين ممتازين و عليهم ضمان 10 سنين و كمان هتحدد مكان حوض الوش و البانيو و حوض المطبخ و مكان السخان و غسالة الملابس لو اتوماتيك و غسالة الاطباق عشان السباك يعمل حسابهم فى الصرف بتاعهم و ليلة السباكة مونة و اجرة هيعمل فى حدود 3000 جنيه ، بعد كده هتخش على سكة الكرانيش و بالمرة المبيض اللى هيعملك الكرانيس يلملك مرمات المحارة اللى اتكسرت و انت بتركب خراطيم الكهربا ، شوف هتعمل الكرانيش ايه فيوتك جاهزة و لآ كرانيش صب و لآ تمشية و طبعا مفيش كرانيش فى المطبخ و الحمام دلوقتى و تسحب سقف الشقة كله مصيص بالمطبخ و الحمام و ممكن النقاش يبقى يسحب السقف معجون بدل المصيص و لو انه هياخد معجون كتير و انت بتعمل المصيص او الكهربائى و هو بيشد السلوك متنساش تركب جنشات حرف s عشان النجف او مراوح السقف لو ركبت بعد كده تكلفة الكرانيش العادية تعمل حوالى 2500 جنيه ، كده انت خلصت كهربا و سباكة و جبس هتنضف الشقة مكان التكسير و ساقط الجبس و قدامك سكة من اتنين يا تسحب الحوائط و الاسقف سكينة معجون او تبتدى فى الارضيات ، لو هتبتدى فى الارضيات هتشون الرمل و الاسمنت و شوف هتشطب الارضيات ايه و فى الاغلب سيراميك او بورسلين هتشوف مساحات الارضيات كام و هتعمل الغرف نفس بلاطة الرسيبشن او هتغير شوف براحتك هتعمل ايه و كمان متنساش حساب وزرة الارضيات و كمان حوائط المطبخ و الحمام و لو مش هتعرف ترفعهم ييجى المبلط يرفع المساحات و الافضل سيراميكا كليوباترا او الجوهرة او رويال و الفرز الاول فى الارضيات هيعمل فى حدود 35-40 جنيه و الحوائط حسب مقاس البلاطة بس فى حدود 30 - 40 جنيه و اجرة المبلط فى حدود 12 - 18 جنيه حسب مكان الشقة ، بعد كده هتدخل على النجارة و شوف هتجيب ابواب جاهزة و لآ هتفصل و كمان شوف الشبابيك الوميتال و لآ خشب تكلفة الباب بمفصلاته ب كالونه بتركيبه فى حدود 450 جنيه و لو تفصيل فى حدود 700 جنيه ، و بعد كده شغل النقاشة و المتر مصنعيات فى حدود 10-12 جنيه و قطعة الخشب فى حدود 50-70 جنيه و افضل انواع البلاستيك يوتن او سايبس ، و بعد كده هتشطب الكهربا زى اللقم و الوشوش و تشطب السباكة زى طقم الصحى و الخلاطات نسيت اقلك ان البانيو هيركب قبل ما بتاع السيراميك يشتغل عشان يقفل حواليه ، التكلفة الاجمالية لشقة مساحة 80 متر هتبقى فى حدود 35000 تقريبا ، يارب اكون عرفت افيدك و مبروك :)
المفضلات