الموضوع: استهلاك البنزين

اهلا بيك اخي الكريم
انا عندي لوجان وعامله معايا 5000 كيلو
بالنسبه لحسبة الاستهلاك
برجاء العلم ان العداد بيحسب معاك الاستهلاك الكلي يعني انا لو ماصفرتش العداد لمدة ال 5000 كيلو هيحسب الاستهلاك او معدله على مدار ال 5000 كيلو
الصح انك عشان تحسب الاستهلاك
انك لو مسافر صفر العداد بتاع الاستهلاك قبل ما تسافر لو السفر مباشر ومسافة بعد ما تملاء العربيه بنزين
وشوف الاستهلاك بعد ما توصل بالسلامه
انا لاحظت ان عربيتي بتستهلك من 6,5 الى 7 ليتر لكل 100 كيلو وانا كنت ماشي على 120 طول الطريق تقريبا بمعدل 95 كيلو في الطريق والمسافة كانت 350 كيلو والمكيف ما انطفاش والعربيه ما وقفيتش يعني العربيه تعمل معايا حوالي 280 كيلو في الصفيحة ال20 ليتر
لما جربت العربيه داخل المدينه لاحظت ان الاستهلاك ثابت عند 8 الى 8.5 لتر لكل 100 كيلو والمكيف شغال على طول
لاحظت السيارة بتعمل 235 الى 250 كيلو في الصفيحة
طبعا الاستهلاك ده ممتاز جدا مع ملاحظة اني كان عندي عربيه لادا 2107 وكانت بتعمل اقل من 200 كيلو داخل المدينه في الصفيحه
وكانت بتعمل حوالي 230 كيلو في السفريات

المشاركة الأصلية كتبت بواسطة hragheb007

أستاذي الفاضل جبريل ، ما هو برضه غربية لما تلاقي الوحوش العداد بتاعهم بيطلع 8 و 9 أو حتى 10 و يقولوا جوا المدينة و أنا يبقى عندي 13 و جوا نفس المدينة اللي مجنناني




انا ده اللي كنت بعمله و ما كنتش ببقى مشغل العربية و هي واقفه بس طبيعي اني لما اسخنها أكون واقف و فعلاً زي ما حضرتك بتقول المعدل بيزيد و هيا واقفه و شغاله بس هل المعدل ده مش بينزل ؟ يعني بيطلع بس؟

طيب لو في حاجه في العربية مش مظبوطة تبقى أيه ؟

المفترض ان كل ما معدل السرعة يزيد مع طول المسافات معدل الاستهلاك يقل
يعني المعدل بتاع الاستهلاك بمرور الوقت لو انت ما صفرتش العداد هتلاقيه بيقل واحده واحده لحد ما يثبت على رقم
يعني 13 دي هتلاقيها بتقل واحده واحده برور الوقت
الفكره كلها زي ما قلتلك بالبلدي كل ما سرعتك تزيد مع استخدام غيارات اسرع يعني بتستخدم قوة العربيه في الحصول على سرعه اعلى ودورات الموتور بتدي معاك سرعات اعلى الاستهلاك الطبيعي يقل
يعني التلات غيارات الاولانيه بتستهلك اعلى من الغيار الرابع والخامس لنفس المسافة المقطوعه
ولحد سرعة معينه لحد حوالي 100 او 120 مثلا وبكده كمية البنزين اللي كانت بتعمل معاك 10 كيلو على السرعات البسيطه هتعمل معاك اكثر من 10 كيلو على السرعة 120 ولو زودت السرعة عن ال120 هتلاقي استهلاك العربيه هيزيد معاك لان العربيه قوتها مش قادرة تقاوم الهواء وبالتالي تحرق بنزين اكثر عشان توصل للسرعة اعلى من 120 انا مش عارف اوضح اكثر من كده
الفكره انك تعرف تستفيد بأقل كمية بنزين في انك توصل لابعد مسافه وده بيتم بأنك تتستفيد بقوة العربيه في اخر غيار عشان تديك سرعة اعلى وبالتالي تديك مسافات ابعد بنفس الاستهلاك
لو فيه حاجه مش مضبوطه في العربيه واعتقد الموضوع ده صعب عشان جديده هتبقى ان العربيه بتاكل بنزين وده بيبقى ليه اسباب تتعلق بضبط الموتور الهواء والكهرباء والبنزين مع بعض وبيتم في التوكيل
هذا والله اعلم
والعربيه بيبقى فيها حساسات بيوصلوها على الكمبيوتر وبتبين كل العيوب دي