الموضوع: سؤال عن الكاوتش و الجنوط

اهلا بيك يا اخ مؤمن
انا هارد على حضرتك فى السؤال الاول لأنى جربت الاتنين
من الاخر مفيش مقاس هاتحس فيه ان العربية مزبوطة فيه ع الشعرة غير 185-65 ار 15 المقاس الستوك اللى نازلة بيه العربية ومعمول عليها اختبارات
اى مقاس تانى عندك الموقع ده ادخل وشوف الفروقات بين المقاس الاستوك واى مقاس حابب تركبه
Visual Tyre Size Calculator | Kouki Tech
مع العلم انه عشان تحافظ على اداء العربية واتزانها لازم تحافظ على محيط العجلة الخارجى بمعنى انك لو عاوز تكبر الجنط من 15 ل16 او 17 لازم قصاده تقلل من بروفايل الكاوتش او حافة الكاوتش من 65 الى 55 او 45 وهكذا

تجربتى الشخصية مع المقاس الاستوك كانت العربية انعم وصوت الكاوتش مش مسموع تماما على كافة السرعات ولكن بعد 50 الف كم غيرت الكاوتش ل195-65 ار 15 كونتيننتال فرنساوى وكان الفرق الملحوظ ان الصوت بقى اعلى ولكن انعم فى المطبات وتقريبا العربية ارتفعت واحد سم ع الارض بحيث انها مع اى اوزان ورا او فى الشنطة عمرها ما بتحك معايا فى اى مطب مهما كان غير الاول كانت علبة الشكمان الوسطى بتحك احيانا حسب ميل المطب وعلاوة على كده حصل تغير فى قراية العداد بزيادة 2% يعنى لو العداد قارى 100 كم يبقى انت فعلى ماشى على 102 كم
نصيحة قدر الامكان حافظ على نفس المقاس اللى نازل فى العربية وياريت يكون بريدجستون برضه عشان الصوت فعلا هادىء وناعم

المشاركة الأصلية كتبت بواسطة moumen_hs

متشكر جدا على الرد الوافى بتاع حضرتك بس كنت عايز اعرف بالنسبة لموضوع الثبات بتاع الكاوتش قالى أن 195 هيكون افضل فى الثبات لانة أعرض 1 سم فهل فعلا فرقت معاك ال 1 سم وحسيت بية ولا لا وشكرا

العفو يا باشا لا شكر على واجب
ممكن اقول ان فيه ثبات بس لحد سرعة معينة بس ارتفاع العربية لما زاد أثر على السرعات العالية فوق ال100 كم نتيجة لتعبية هواء تحت العربية وكمان دقة توجيه الدركسيون اتأثرت بصورة خفيفة على السرعات
ما اقدرش اقول العربية بتعوم بس مش زى الاول مع ال185-65

من رأيى المقاسات اللى ممكن تركب بدون اى تعديلات فى العفشة وتكون ماشية كويس ع العربية
الاستوك 185/65 - 15
او 200/60 - 15
او 195/55 - 16
او 210/45 - 17

ورأيى ان اى مقاس غير الاستوك هايخلى العفشة ناشفة اكتر والاحساس بالمطبات اكتر لان التأثير العملى يختلف عن التاثير النظرى بالحسابات