بالصور والفيديو: أول تجربة قيادة للأودي a6 الجديدة 2012

**medo_msmsa** · 28-10-2011 05:53 PM

رجاء للادارة انا نزلت التقرير في العام عشان قبل كده حطيت تقرير عن تجربة قيادة للامبورجيني جالاردو وتم نقله لقسم تجارب القيادة وتقريبا محدش شافه وكأنه اتنقل لسلة المحذوفات ربنا يعلم ان انا كل الصور اللي مصورها عشان انزل التقرير هنا بشكل حصري

في يوم الاثنين الموافق 17 أكتوبر الماضي كنت على موعد مع تجربة قيادة جديدة لمدة يوم كامل لأحد الماركات المفضلة لي شخصياً وهي أودي كمان أن بفضل فئة الـ A6 لأن بعتبر حجمها يعتبر مثالي جدا وهي فئتها زي الفئة الخامسة المرسيدس E .
A6 الجديدة وزنها 1485 كيلو وماتورها 2.8 بيولد 245 حصان مع فتيس جديد بالكامل من 8 سرعات أمامية يكفل الانطلاق للسيارة من 0-100 خلال 8 ثوان فقط.. ببساطة الجملة اللي فاتت دي عاملة شخصية للسيارة بشكل كبير جدا خاصة الفتيس لان السيارة محافظة على عزمها وقوتها حتى وهي على ار بي ام 1.5 لحد 6.5 بوتيرة واحدة تحس انك ممكن تنطلق في اي لحظة وده نقطة فرق جوهرية بالنسبة للشكل القديم.
بالنسبة للأداء بشكل عام فطبعا السيارة تمتلك تماسك كبير جدا على الطريق رغم النعومة النسبية للعفشة وده طبعا عشان الـ Quattro اللي بيوزع عزم الماتور بين 60% خلفي و 40% أمامي.
التصميم الداخلي لا يوجد به ثورة او تغييرات جوهرية عن الطابع الجديد للأودي اللي ابتدى تقريبا مع A4 قبل 5 سنين وان كان طبعا شيك جدا وخامات محترمة وتقنيات مبهره خاصة مع المالتي ميديا اللي ممكن تشغلها عن طريق الشاشة – التي لا تعمل باللمس - .
بعض نقط الضعف من وجهة نظري:
1- دواسة البنزين الثقيلة جدا لدرجة ان دواسة الفرامل أخف منها.
2- الكراسي تعمل بالكهرباء لكن لا يوجد خاصية تحريك جوانب المقعد أو أطرافه كما هو موجود في الفئة الخامسة وكمان مرسيدس E اللي تتفوق على الجميع ان كمان في حالة الانعطاف المفاجئ فإن جوانب الكرسي تضم السائق بشكل تلقائي لمزيد من التثبيت.
3- الدركسيون خفيف جدا جدا يعني لو تقدر تلفه لفة كاملة بلمسة صباع واحدة.. وان كام بيعوضها الثبات الكبير فما زال هناك تحكم كامل بالسيارة.
4- في حاجة غريبة حستها وهي الفرامل انا اشتغل الـ ABS معايا في يوم التجربة مرتين في فرامل مش قوية اوي رغم بنفس السواقة اشتغل مرة واحدة في عربيتي المازدا 3 خلال سنة كاملة.

الخلاصة الـ A6 الجديدة ممتازة وتمتلك أداء قياسي ومتعة كبيرة في السواقة لكن لو هشتري هتجه للفئة الخامسة الجديدة اللي في بعض التفاصيل أفضل خاصة في الـ interior كمان الـ exterior اللي بالنسبة ليه برضة أفضل.

الآن مع الصور (اعتذر عن قلة جودة الصور انا مصورها بالموبايل)

Exterior

Uploaded with ImageShack.us

Interior

Uploaded with ImageShack.us

وده فيديو من تصويري لتسارع السيارة من 0-100
New Audi A6 Acceleration 0-100.flv - YouTube

**tareksakr** · 28-10-2011 06:28 PM

تسلم ايدك علي التقرير العربية جميلة جدا وواضح التسارع من الفيديو سيارة رائعة وفخمة من أودي

**SAMEH_FOUAD** · 28-10-2011 06:39 PM

هية من 0 الى 100 فى 8 ثوانى او اقل قليلا قليل على سيارة قوتها 245 حصان , لان كدة البى ام والمرسيدس عدوها لان ال528 محركها 2000 سى سى وبيخرج نفس القوة 245 حصان والتسارع من صفر الى 100 فى 6.2 ثانية

يبقى كدة فعلا البى ام تكسب فى كل حاجة